Dolêŋkwě ósoma saabe'ŋ saabekʉŋo–sís pa̱a̱lɨ́ ¹ Asábá Dolêŋkwě ósoma saabe'ŋ saabkʉŋo–sí pa̱a̱lɨ́,ɨ́de jaawíl namá gʉ̌b kí tinꞌíŋ sabba kéŋá. ² Lia namá kila melega saabe–sí a̱gɨla alá ka̱ɨŋ ná Wʉ́o'ŋ ta̱bʉ́ŋ kɨɨréliŋi namá ambayáŋá saabe kaníe. ³ Meleg keer ǎl siirꞌíŋ mubbar tɨɨ́lɨŋɨ namá êl ná gôbboa'ŋ lóó–le keera. Yé–sí namá sʉ́ʉ́lá suŋŋâ kaníe áláŋ kí ta̱gɨŋa nyétꞌíŋ jʉ̌maŋ arrá siirꞌíŋ gôbboŋa'ŋ lóó'ŋ írí illa kʉttɨ'ŋ ta̱bʉ́ŋ gôbboŋa rááŋ. ⁴ Sʉ́ʉ́lá'ŋ sʉ́ʉ́l, kí ta̱gɨŋa'ŋ jʉ̌ma arrá namá melegꞌíŋ dóŋa Wʉ́o'ŋ ta̱bʉ́ŋ nyěŋe. ⁵ Lia meleg namá mubbar bawa nás kí gôbboŋa'ŋ lóó'ŋ utú pis piá, namás sʉʉrʉ́ ímíŋi. Ɨ́de namá kuyíŋkola rimitîti na wiísꞌíŋ kola rimitîti na kuyíŋjúlmólaŋa na sʉʉrʉ́ŋjɨ́rtɨ́ŋóla ka̱ɨ́ŋ. ⁶ Na kila melega saabe asá ambayáŋá saabe ka̱ɨŋ namá ásíleŋ ɨŋɨ áláŋ pʉe. ⁷ Meleg díígkʉŋo namá dééŋ ambayá pʉo, namá urány na utú kʉrʉl nás kí kewa úrríŋiŋi. Kin–sí namá sʉʉrʉ́ kamíŋíe.Sʉʉrʉ'ŋ sáárá ɨɨsꞌíŋ tog namá sʉɨ́ŋá. Na kurúŋá'ŋ sáárá ɨɨsꞌíŋ tog namá sʉɨ́ŋá. Na daíŋá kɨ́rróŋa namá nyét sʉɨ́ŋɨ. ⁸ Meleg a̱wkʉŋo namá dééŋ ambayá pʉo, namá a̱rɨ díg inná pʉ́gó appâ ná sʉɨŋeliŋi roó kamíŋíe, roo'ŋ sáárá ɨɨsꞌíŋ tog namá kewa eŋa. ⁹ Roó karába sálláŋa'ŋ sáárá ɨɨsꞌíŋ tog namá wa̱ɨ́ŋɨ, na pulluŋa'ŋ sáárá ɨɨsꞌíŋ tog namá asitóg paasiŋo. ¹⁰ Meleg ɨɨskʉŋo namá dééŋ ambayá pʉo,namá úrí appâ jaawíl pólólé, ná in lííŋ inná sʉ́llam, namá rooŋa'ŋ sáárá ɨɨsꞌíŋ tog na koróŋkʉ́ɨ́'ŋ sáárá ɨɨsꞌíŋ togꞌíŋ írí póyyâ. ¹¹ Na illa úrí'ŋ kona Absinsos~si gé alá dééŋ arrá pʉyyɨ́'ŋ–ii. Koro'ŋ sáárá ɨɨsꞌíŋ tog namás puyyá eŋa, namá kwa suŋŋâ kʉ́sɨŋɨ alá kila koro ká̱bɨ́, ɨdɨ̂ɨŋ nás puyyá ɨŋɨ, ¹² Meleg oŋŋalkʉŋo namá dééŋ ambayá pʉo, dʉlé'ŋ sáárá ɨɨsꞌíŋ tog na dúalꞌíŋ sáárá ɨɨsꞌíŋ tog na úríŋá'ŋ sáárá ɨɨsꞌíŋ tog namá la̱ddɨŋʉl, lia dɨ́eŋ hěrra á kéŋába, indálaŋ dog luulꞌíŋ sáárá ɨɨsꞌíŋ tog–lé walá hêrra á kéŋbába, ¹³ Lia namá nʉ́ŋɨ́ awí namá kelámí ná dʉʉl kí ʉrʉ́ belé tawrá jáwíti iladɨo ǎl írí arda pia,"Ra̱sɨ́e kasâŋ yeeŋa poí! Ra̱sɨ́e kasâŋ yeeŋa poí! Ra̱sɨ́e kasâŋ yeeŋa poí, kila kwa alá sʉʉrʉ'ŋ írí ka̱ɨŋ, a̱rɨ illa'ŋ ʉʉ́ŋ ǎl dúi áláŋ eeŋ abá meleg ka̱rɨkwǎ ɨɨs kɨ́eŋ ambayáŋá pʉe!"