Murul na Wʉ́o'ŋ Dolêŋkwě ¹ Lia namá murul a̱gɨla illa dʉó'ŋ dóŋá súru–lé alá kʉttɨ'ŋ írí ǎ̱wɨŋɨ. Illa murulꞌíŋ sabbaŋa a̱w dog–lé namá rima ka̱ɨ́ŋ, illa murul–sí namás kí ósoma saabe ósom ka̱ldʉl. ² Ká namá meleg ka̱kkɨ́re a̱gɨla ná kí ʉrʉ́ sîw belé tawrá jáwíti, "Kɨé ná nii–ii ásáŋ in murul–sí pa̱a̱lɨ́ na kééŋ ósoma duu?" ³ Jaawíl wala gal sʉʉrʉ'ŋ írí wala gal sʉʉrʉ'ŋ dɨó dʉó tog dog á kéŋába ásáŋ taga illa murul–sí pa̱a̱lɨ́ ná dééŋ dɨo já̱gɨl. ⁴ Naa ká namás aá ná kí kurrâ oom ɨdɨ̂ɨ́ŋ ná dʉó ás bʉ́lɨ́ŋɨ́ba ǎl nii–ii ásáŋ illa murul–sí pa̱a̱lɨ́ wala gal áláŋ dééŋ dɨo já̱gɨl. ⁵ Lia sábáŋáta̱bʉŋakurráŋakwǎ'ŋ dɨó díg namáis in kwǎ, "A joomba! Yʉda'ŋ órre illa Mʉʉrʉ́–sí ja̱gɨ́l, Dǎ̱ʉdꞌíŋ Dɨɨrɨ́e–ii nás kóos éla. Na yé kʉrros kee ásáŋ illa murul na kééŋ ósoma saabe–sí pa̱a̱lɨ́." ⁶ Ká Dolêŋkwěs a̱gɨla ná illa kʉttɨ'ŋlóó'ŋ túle kɨɨrél, na karába sálláŋa oŋŋal na sábáŋáta̱bʉŋakurráŋakwǎ nás dorol káwe. Illa Dolêŋkwě namás in lóŋítíeŋi inná asá ka̱wŋɨ. illa Dolêŋkwě namás kolpa saabe na kʉ́ŋɨ́ saabe kéŋá, ǎl Wʉ́o'ŋ kʉo saabe gé ǎl sʉʉrʉ nyét–le áddeŋ káwe. ⁷ Namá nyaŋá ná illa murul–sí illa dʉó'ŋ dóŋá súru–lé bawa ǎl kʉttɨ'ŋ írí ǎ̱wɨŋɨ. ⁸ Indálaŋ lia ǎlbá murul bawa, kila karába sálláŋa oŋŋal na sábáŋáta̱bʉŋakurráŋakwǎ weyyéŋá a̱w na oŋŋal namá Dolêŋkwǎ'ŋ ta̱bʉ́ŋ kí kʉrŋa kʉ́ʉl. Na dɨ́eŋ dɨó dʉó bi dʉós goŋgoŋjárrá kéŋá. Na siirꞌíŋ mubbara koŋa–lé kééliŋi nás sʉ́ʉ́lá dɨó píssiŋ ka̱ɨ́ŋ. Kila sʉ́ʉ́lá aláWʉ́o'ŋ kwǎ'ŋ jʉ̌ma gé. ⁹ Namás kona kɨwwóŋa káwe alá in beléŋá, "Jɨ́ nii jaago áláŋ illa murul jabúŋ nás kééŋ ósoma já̱wlɨ, ilâiŋ nái jɨ–sí daabeŋ káwe, na kɨ́ɨ́ŋ kewa nás Wʉ́o–sí órré bi órré na belé bi belé–le na kwa'ŋ daara bi daara–lé na ba̱rʉ bi ba̱rʉ–lé kwa'ŋ dulum jáyé. ¹⁰ Na jɨ́ yeeŋ–sí jundí ná Wʉ́o'ŋ kʉrɨŋꞌíŋ kwa na pǎ̱gɨŋa kɨŋɨ na yeeŋ áláŋ sʉʉrʉ'ŋ írí kuriŋ gé." ¹¹ Lia namá nʉ́ŋɨ́ awí, namá melega suŋŋâ'ŋ arka kelámi nás dɨ́eŋ diigiŋ jɨɨ́lo á kéŋába, líriŋa'ŋ líríŋá na dɨ́eŋ diigiŋ nás jɨɨ́loá kéŋába, míriŋa'ŋ míriŋa nás kʉttɨ na karába sálláŋa na sábáŋáta̱bʉŋakurráŋakwǎ–sí téréremerere pɨ̌e. ¹² Na kí ʉrʉ́ síw in beléŋá, "adaolêŋkwě asá daábeŋ káwe nii–ii, ásáŋ kʉrro na ka̱wa̱jɨŋ na rɨɨŋ na ka̱kkɨrɨŋ na ba̱gɨ na galaŋa na mʉjjé bóóyé!" ¹³ Lia namá karâb bi karâb–sí jaawíl na sʉʉrʉ'ŋ írí na sʉʉrʉ'ŋ dɨó na koró kelámi na kila karába nyét ǎl dɨ́eŋ dɨó ka̱ɨŋ ná in beléŋá, "Ǎ̱w mʉjjé na ba̱gɨ na galaŋa na ka̱kkɨrɨŋ ná illa dʉóǎl kʉttɨ'ŋ írí kee na illa Dolêŋkwě'ŋ gé namaŋ níŋ ka̱ɨŋ báŋ ka̱ɨŋ!" ¹⁴ Kila karába sálláŋa oŋŋal namá in aáŋé, "Ee yáa!" sábáŋáta̱bʉŋakuráŋakwǎ namá kí kʉrŋa kʉ́ʉl ná ba̱gɨ káwe.