¹ Lia asá kin ʉ́tóŋá bɨtʉl, namá nʉ́ŋɨ́ awí namá jaawíl tʉ́sʉ́ palaŋ a̱gɨla! Na ʉrʉ́ sîw inná ambayá, ǎl waar kelámi náis kaa risíŋá, ná in beléŋá, "Íne írí jêl náis a̱rɨ ɨt áwli ǎl in lóŋ áláŋ eeŋ lia alá kin ʉ́tóŋá ɨŋɨ." ² Iddálaŋ ká namá Kʉo Teyyáŋa'ŋ dɨó aáŋá. Híllâ jaawíl, namá kʉttɨ kayé, namá dʉó díg kéŋá ná illa kʉttɨ'ŋ írí ǎ̱wɨŋɨ. ³ Na dʉó ǎl híllâ ǎ̱wɨŋɨ namás jaluŋa julmiŋol kéŋá inná kɨ́tóŋá jaluŋakwǎ tárráŋ, inná rées na ga̱ldɨ́. Na bɨdɨgɨ̂r ná in ulmeliŋi inná dɨ́tó silinysilíny kɨrró nás kʉttɨ–sí dorol piá. ⁴ Illa kʉttɨá̱rɨ́ŋá–le namá kʉttɨŋa kerŋa weyyéŋá a̱w na oŋŋal ka̱ɨ́ŋ, na sábáŋáta̱bʉŋakurráŋakwǎ weyyéŋá a̱w na oŋŋal ná ka̱ɨ́ŋ ná kila kʉrttɨŋa'ŋ írí ká̱wɨŋɨ. Na yeeŋ–sí namás jʉrɨŋa pattáŋa kiŋíe na siirꞌíŋ–si taaja ta̱bʉ́ŋ ka̱ɨ́ŋ. ⁵ Na illa kʉttɨ–lé ná kuyíŋjúlmólaŋa kúréliŋi na wiísꞌíŋ kola rimitîti na da̱ɨ́lꞌíŋ kola rimitîti. kʉttɨ'ŋ ta̱bʉ́ŋ namá sʉ́llama saabe ka̱ɨ́ŋ ná lííŋiŋŋi. Kin namá Wʉ́o'ŋ kʉo saabe gé. ⁶ Na dog híllâ illa kʉttɨ'ŋ ta̱bʉ́ŋ a̱rɨ díg kéŋá ná in jóŋá inná mandara'ŋ roo, ná in kéŋá inná teltel. Na illa kʉttɨ'ŋ lóóŋ túle na illa kʉttɨ'ŋ á̱rɨ́ŋŋá–le namá karába sálláŋa oŋŋal ka̱ɨ́ŋ ná kɨ́eŋ sǔrŋá nás kʉ́ŋɨ́ píssiŋ ka̱ɨ́ŋ. ⁷ Karâb sállâ déégkʉŋo namá in lóŋá inná mʉʉrʉ́, na karâb sállâ a̱wkʉŋo namá in lóŋá inná nuŋí, na karâb sállâ ɨɨskʉŋo namás wa̱jɨ in kéŋá inná dʉldɨ'ŋ kwě'ŋ wa̱jɨ, na karâb sállâ oŋŋalkʉŋo namá in lóŋá inná dʉʉl ná arda píéŋí. ⁸ Na kila karába sálláŋa oŋŋalꞌíŋ dɨó karâb bi karâ namás pělega osondííg kéŋá na kɨ́eŋ sǔrŋá na pělega'ŋ dǔu namás kʉ́ŋɨ́ píssiŋ ka̱ɨ́ŋ. Na kí luul na tóó péllét á kɨɨréliba bá in beléŋá, "Teyyâ, teyyâ, teyyâ bá Wʉ́o Loŋpii ka̱kkɨ́rekʉŋo–ii, alá kérrég kéŋá na alá kee na asá ká̱ɨ́ŋ áláŋ êl !" ⁹ Na tin bi tin asá kila karába sálláŋa ye–sí galaŋa páálítía na ba̱gɨ pɨe na assós beléŋá illa dʉó–sí alá kʉttɨ'ŋ írí kee ná ǎ̱w, illa dʉó alá namaŋ níŋ kee báŋ kee. ¹⁰ Na kila sábáŋáta̱bʉŋakurráŋakwǎ weyyéŋá a̱w na oŋŋal dééŋ ta̱bʉ́ŋ kʉrboŋ ká̱wɨ kee. Yeeŋ ɨ́eŋ taaja illa kʉttɨ'ŋ ta̱bʉ́ŋ kawrítía ná in kámiŋa, ¹¹ "Jɨ́ in lóŋ, dáíŋ Loŋpii na Wʉ́o ásáŋ galaŋa na ba̱gɨ na kʉrro joomé, ilâiŋ ná jɨ́ ótáŋá nyét jetéré, na dɨ́ɨ́ŋ áare'ŋ ʉʉ́ŋ yeeŋ namá ka̱ɨ́ŋ na yeeŋ tééríŋíe."