¹ Ma̱sɨ̂gkwǎ ǎl Saridis deém ka̱ɨŋꞌíŋ–si meleg–sí rímmeŋ jáa: 'Jlla dʉó asá Wʉ́o'ŋ kʉo saabe na úríŋá saabe kee kin ʉʉŋa beléŋ. Ká ása kɨ́eŋ tááríŋá aluŋ. Bɨ́ kí kona sálláŋa baiŋ, marraŋ bɨ́ waitólá baŋ. ² Ba̱lɨŋolas, nás a̱rɨ ɨt asá saí na a̱rɨ ɨt asá dakki piá áláŋ waí–sís ka̱kkɨ́ré báa, ilâíŋ ná ká ʉmmó ná kɨ́eŋ tááríŋá dúíŋ Wʉ́o'ŋ kʉ́ŋɨ ás agíŋíebba. ³ Na naa a̱rɨ ɨt gí ta̱bʉ́ŋ ʉ́ndʉl asá boomé na asá kelbámi. ba̱gɨ báa na tʉ́ʉ́beŋ beeŋ. Abá ás ba̱lɨŋolaba, ká báŋ in êl inná kaam, na bɨ́ ásáŋ á baluŋba ká â̱y tin lé–ii áláŋ dɨ́eŋ konda êl. ⁴ Marraŋ dog bɨ́ báis ba̱ɨ́ŋ nás Saris dɨó kwa ittâ baiŋ alá kéŋ jʉrɨŋa rúbbá á káweba. Ká áláŋ kíeŋ ka̱lɨŋa na áláŋ jʉrɨŋa pattáŋa kiŋíal, ilâíŋ ná yeeŋ kééŋ temena gé. ⁵ Illa dʉó asá kóos ʉ́ndʉl–sí jʉrɨŋa pattáŋa in síŋ kiŋíal inná yeeŋ. Na ká kí seéŋsee kééŋ kona–sí jaiŋꞌíŋ dombore–lé áŋ áásoba mááŋ áláŋ kééŋ kona–sí dúíŋ Báa'ŋ ta̱bʉ́ŋ na kééŋ melega'ŋ ta̱bʉ́ŋ tawrá awí. ⁶ Dʉó ɨt nás kɨ́ló kee, ǎ̱w nás a̱rɨ ɨtkelamí asá Kʉo ma̱sɨ́gakwǎ–sí beléŋá .' ⁷ Ma̱sɨ̂gkwǎ ǎl Piladelpia deém ka̱ɨŋꞌiŋ meleg–sí rímmeŋ jáa: Kiŋ illa dʉó Teyyâkwaŋ na Seekʉŋo'ŋ ʉʉŋa gé asá pa̱a̱lɨ́tɨ ná dʉó á keba ásáŋ taga ʉ́rrɨ́, na asá ʉ́rrɨ́tɨ ná dʉó á keba ásáŋ taga pa̱a̱lɨ́ kin ʉʉŋa beléŋ. ⁸ Ká ása kɨ́eŋ tááríŋá aluŋ. Ká dɨ́eŋ ta̱bʉ́ŋ gis tʉ́sʉ́ palaŋ undí illa alá dʉó á keba ásáŋ taga ʉ́rrɨ́. Ká aluŋ–si bɨ́ ása kʉrro ɨttá baiŋ marraŋ, dog bá dúíŋ ʉʉ–sí ba̱gɨ báa na kúíŋ kona–sí á baaríŋíba. ⁹ Ká kila kwa'ŋ níŋ oro áa ǎl Sitanꞌíŋ daara'ŋ kwa gé. Yeeŋ ǎl in kámiŋa âl Ya̱ʉ́da gé na Ya̱ʉ́da á geba, marraŋ namá pɨé kawe. Yeeŋ–sí níŋ undí ná kélal náis bɨŋa–sí kɨ́eŋ tarŋa'ŋ ta̱bʉ́ŋ ta̱bʉŋa sʉ́ʉ́ ka̱bɨ́al, na yeeŋ bá síŋ kɨwe ká ká áíla bɨŋa wǒel. ¹⁰ Ɨdɨ̂ɨ́ŋ ná bɨ́ dúíŋ ʉʉ–sí ba̱gɨ báa ǎl jɨrmó'ŋ jɨrmó'ŋꞌíŋ risíŋ. Ká dog gíŋ bɨŋa jarri'ŋ tin–lé aáno illa alá da̱ldɨŋ nyét–le ʉ́ndʉl áláŋ kwa nyét–sí arri ǎl sʉʉrʉ́ ka̱ɨŋ. ¹¹ Ká naa dakki ʉ́ndʉl. A̱rɨ ɨt–sí pʉttó bǎ̱ɨ asá baiŋ, áísáŋ dʉó tog dog dɨ́eŋ sáas á rɨ́éba. ¹² Dʉó asá kóos ʉ́ndʉl–sí báŋ dúíŋ Wʉ́o'ŋ toŋteyyâ'ŋ na tobá áa. Na yé dʉ́t dééŋ paál áŋ kúróba. Ká báŋ dééŋ írí dúíŋ Wʉ́o'ŋ kona na dúíŋ Wʉ́o'ŋ deemꞌíŋ kona rímmeŋ áa, deem dɨwwô ǎl Jurusalam ka̱rɨ́a, ǎl jaawíl dúíŋ Wʉ́o'ŋ –lé kee ná dǔu bʉʉŋel. Na dog níŋ dééŋ–le kúíŋ kona kɨwwóŋa tágá rimmeŋ áaa. ¹³ Dʉó ɨt nás kɨ́ló kee, ǎ̱w nás a̱rɨ ɨt kelamí asá kʉo ma̱sɨ́akwǎ–sí beléŋá." ¹⁴ Ma̱sɨ̂gkwǎ ǎl Lidika deém ka̱ɨŋꞌíŋ–si meleg–sí rímmeŋ jáa: Ila dʉó ǎl Eeyáa ka̱rɨ́a na ǎl seejǎ̱ɨdʉŋona nʉ́ŋɨ́dʉŋo seekʉŋo na Wʉ́o'ŋ jetéréŋá'ŋ ka̱rɨ–ii, kin ʉʉŋa beléŋ. ¹⁵ Ká ása kɨ́eŋ tááríŋá aluŋ. Bɨ́ walá lúllá á baŋba walá tokké á baŋba. Ká wǒeliŋi álâŋ bɨ́ lúllá wala gal tokké baáŋá! ¹⁶ Naa ɨdɨ̂ɨ́ŋ ná bokké á baŋ, ná lúllá á baŋba wala tokké á baŋba, áíláŋ dúíŋ ʉtó aráŋ. ¹⁷ Bɨ́ in bámiŋ "Kɨ́ kawaja kaŋ na ása ka̱wa̱jɨŋ suŋŋâ koomé ná a̱rɨ tóg dog á kǒelba." Marraŋ ás bɨ́wélba âl taltála na ragasána na pa̱ga̱rɨŋa na ka̱ra̱ŋa na pogoŋa baŋ. ¹⁸ Ká ʉʉ́ŋsee gís ámiŋ áláŋ dúi–lé siir balu asá kí utú kɨɨrʉl. áláŋ mat kawája beeŋ. Dúi–lé jʉrɨŋa pattáŋa bulu áláŋ taga biŋí áláŋ dɨ́eŋ pʉgɨŋ óorakwaŋ paál á jáwíŋíba. Dúi–le kʉ́ŋɨ́'ŋ dawa bulu áláŋ kɨ́eŋ kʉ́ŋí–le biŋí na taga lóó ba̱gɨ́l. ¹⁹ Ká kila kwa nyét–sí álá wǒel, upúríti na dǒra awíti. Naa kíkurrâ boiŋí na tʉ́ʉ́beŋ beeŋ. ²⁰ Ká tʉ́sʉ́–le éérél ná tʉ́sʉ́ aldi. Abá dʉó díg dúíŋ arka kelamí nás tʉ́sʉ́ pa̱a̱lɨ́, ká báŋ dée–lé oo náa kíe na̱mɨ́e káa na yé báŋ dúi–lé êl ná kíe na̱mɨ́e káa. ²¹ Dʉó asá kóos ʉ́ndʉl–sí, ká bá síŋ ɨɨn ná kíe dúíŋ kʉttɨ'ŋ írí kôŋ, inná asá bá ká kóos éla ná kí dúíŋ Báa dééŋ kʉttɨ'ŋ írí kóóŋó. ²² Dʉó ɨt nás kɨ́ló kee, ǎ̱w nás a̱rɨ ɨt kelamí asá Kʉo ma̱sɨ́gkwǎ–sí beléŋá."