Domoŋasá Ipisa'ŋ ma̱sɨ̂gkwǎ–sí áddeŋ káwe ¹ Ma̱sɨ̂gkwǎ ǎl Ipisa deém ka̱ɨŋꞌíŋ–sí melega–sí rímmeŋ jáa: 'Dʉó alá úríŋá saabe dééŋ dóŋá súru–lé bǎw ná siirꞌíŋ másárája'ŋ mardába saabe'ŋ táas–lé ɨloŋ ná kin ʉʉŋa beléŋ. ² Ká kɨ́eŋ tááríŋá na dɨ́eŋ táárí tokkê na dɨ́eŋ jɨrɨ́mó'ŋ jɨrɨ́mó–sís aluŋ. Ká aluŋ–si bɨ́ jɨttɨŋakwǎ–sí taga áláŋ á bɨrɨ́móba, na bɨ́ kila kwǎ–sí bárra asá in kɨ́tɨ́méli âl kʉréemeŋa gé maraŋ yeeŋ kʉréemeŋa á geba, namás bʉmmó yeeŋ âl pɨékwǎ ge. ³ Bɨ́ jɨrɨ́mós baiŋ na kúíŋ kona'ŋ ʉʉ́ŋ tááríŋá tokkéŋa–sí bɨrɨmo ná á bʉmmoba. ⁴ Marraŋ ká in–sís dɨ́eŋ konsa aiŋ, alá bɨ́ ila joiŋí–sí bundí asá waar baáŋá. ⁵ Na naa, bɨŋa ǎw nái ta̱bʉŋ wá̱ɨ́ŋɨ́tɨ illa joiŋí –le ay karra bawŋí asá waar baáŋá. Tʉ́ʉ́beŋ beeŋ na ʉ́tóŋá kɨt báa ǎl waar báa. Abá tʉ́ʉ́beŋ á bɨndelba, ká báŋ dɨ́e–lé êl ná dɨ́eŋ másárája'ŋ mardâb–sí dééŋ lóó–le túga awí. Ila namá dééŋ arrá in lóŋ, ká áláŋ kɨ́eŋ ma̱sɨ̂gkwǎ–sí túga awí. ⁶ Marraŋ a̱rɨ tog asá bɨ́ baiŋ bá ni–ii, bɨ́ âl Nikola'ŋ ka̱rɨjʉ́lokwǎ'ŋ tááríŋá–sí banan, kila ǎl ká dog anan. ⁷ Dʉó ɨt nás kɨ́ló kee, ǎw nás a̱rɨ ɨt kelamí asá Kʉo ma̱sɨ̂gkwǎ–sí beléŋá. Dʉó ɨt nás kóos ʉ́ndʉl, ká bá síŋ yee–sí ɨɨn ná jaiŋꞌíŋ kurú'ŋ kwǎ amí, ǎl Wʉ́o'ŋ rúmány kee.' ⁸ Ma̱sɨ̂gkwǎ ǎl Simirana deém ka̱ɨŋꞌíŋ–si meleg–sí rímmeŋ jáa: Ílla dʉó ǎl Waarkʉŋo na ka̱rɨkʉŋo–ii, alá wai nás sállá eŋa kin ʉʉŋa beléŋ. ⁹ Ká dɨ́eŋ miine na pa̱gɨrɨŋ–sís aluŋ, marraŋ bɨ́ jaawíl kawája baŋ! Ká kila ʉ́tóŋá jɨttɨŋa–sís aluŋ ǎl kila kwa dɨ́eŋ konsa aáŋé ǎl in kámiŋa âl Ya̱ʉ́da gé marraŋ walá Ya̱ʉ́da á geba. Marraŋ yeeŋ illa daara'ŋ kwa gé ǎl Sitanꞌíŋ ge. ¹⁰ Ka̱lɨ ái tɨ̌ɨba áláŋ naa dakki mííneŋ beeŋ. Ba̱gɨ́l Ányádɨɨŋáŋta̱bʉ naa dakki áláŋ kwa dǐi–sí túmná jíŋí, áíláŋ mat karre na áláŋ kí soga weyye mííneŋ beeŋ. Ǎ̱w ná Seejǎ̱ɨkwǎ baŋ annaŋ in lóŋ náis wǎy–lé keeríti, na ká áíláŋ jaiŋ lʉʉt aní ǎl kóosjêldʉŋo'ŋ sáas–ii. ¹¹ Dʉó ɨt nás kɨ́ló kee, ǎ̱w nás a̱rɨ ɨt kelamí asá kʉo ma̱sɨ́gakwǎ–sí beléŋá. Dʉó ɨt nás kóos ʉ́ndʉl wǎy a̱wkʉŋo áwereŋ áŋpiába.' ¹² Ma̱sɨ̂gkwǎ ǎl Pergamum deém ka̱ɨŋ–si meleg–sís rímmeŋ jáa: Ila dʉó asá saar sabbaŋa a̱w sikkáŋa kee kin ʉʉŋa beléŋ. ¹³ Ká ása aluŋ bɨ́ aál baiŋ, lóó alá Sitanꞌíŋ kʉttɨ kee. Marraŋ kúíŋ kona–sí pʉttó béél, na bɨ́ dɨ́eŋ seejǎ̱ɨ–sí dúíŋ eré á bawríŋíba namaŋ dúíŋ nʉ́ŋɨ́dʉŋo seejǎ̱ɨdʉŋo Antipas'íŋ sog–lé, alá dɨ́eŋ táas–lé ka̱wŋɨ, ɨlla lóó–lé alá Sitan kee. ¹⁴ Marraŋ ká ása dɨ́eŋ konsa ótá ittâ aiŋ. Bɨ́ íllâ kwa dǐis baiŋ alá Balamꞌíŋ gʉʉd–sí ka̱rɨ kʉle, asá Balag –sí gʉʉd páálí áláŋ Izraílíŋá–sí ʉgó ná ka̱tɨ́eŋa káwa, namá illa na̱mɨ́e káwe asá kʉnʉ́so–sí gôbbo ka̱rʉ́l na a̱jɨlɨŋ káwe. ¹⁵ Kí illa dorá tág, dɨ́eŋ dɨó kwa dǐi ka̱ɨŋ ná Nikola'ŋ ka̱rɨjʉ́lokwǎ'ŋ gʉʉd–sí ka̱rɨ kʉle. ¹⁶ Na naa tʉ́ʉ́beŋ beeŋ na abá á bɨndelba, ká áláŋ naa dakki dɨ́e–lé êl ná dɨ́eŋ konsa kí dúíŋ ʉto'ŋ saar ééro. ¹⁷ Dʉó ɨd nás kɨ́ló kee, ǎ̱w nás a̱rɨ ɨt kelamí ása Kʉo ma̱sɨgakwǎ–sí beléŋá. Dʉó asá kóos ʉ́ndʉl ká báŋ manna dǐi aní asá jʉ́ʉ́lɨ́ŋ. Na ká illa dʉó–sí dog níŋ dɨ́tó pattâ aní, kí kona kɨwwóŋa ŋ ná dééŋ írí rímmeŋ ɨŋɨ, kila asá dʉó tog dog á keba nás loŋ bás délliŋ illa dʉó loŋ asá yeeŋ–sí bóóyé. ¹⁸ Ma̱sɨ̂gakwǎ ǎl Suartira deém ka̱ɨŋꞌíŋ–si meleg–sí rímmeŋ jáa: 'Wʉ́o'ŋ Kwědee ǎl kééŋ kʉ́ŋɨ́ in lóŋa inná utú ǎl lííŋ na kééŋ tarŋa ná in ulmeli inná nihâs asá utûŋebede–lé kɨɨrʉl kin ʉʉŋa beléŋ. ¹⁹ Ká ása kɨ́eŋ tááríŋá na dɨ́eŋ joiŋí na seejǎɨ na ájíŋá na jɨrmó'ŋ jɨrmó alaŋ. Ká ása aluŋ bɨ́ naa âl táárí suŋŋâ baw illa–lé suŋŋá ǎl waar báa. ²⁰ Marraŋ ká in–sís dɨ́eŋ konsa aiŋ, alá bɨ́ illa yáa Jezebel–sí bɨrmel, alá dééŋ suur–sí domoŋdʉŋo ta̱rɨ̂ŋ namás kúíŋ tááríkwǎ–sí gʉʉd paalíti na dǒra rééŋél áláŋ a̱jɨlɨŋ kawe na áláŋ ila na̱mɨ́e kawe asá kʉnʉ́sa–sí gôbbo ka̱rʉ̂l. ²¹ Ká yee paraga aní áláŋ tʉ́ʉ́beŋ eeŋ, maraŋ á kóilba áláŋ dééŋ a̱jɨlɨŋ–lé tʉ́ʉ́beŋ eeŋ. ²² Ká yee–sí wajáŋpɨ́tɨ níŋ amíŋi, na ká kila kwa–sí kojoja suŋŋâ–lé níŋ amíŋi alá kíeŋ mʉʉsɨnɨŋ kawe, namaŋ níŋ yeeŋ kééŋ koraŋa jɨttɨŋa–lé tʉ́ʉ́beŋ kɨŋɨ. ²³ Na ká áláŋ kééŋ dogólá–sí aldó ná aw. Kila namá kééŋ ka̱rɨjʉ́lokwǎ ge. Lia ma̱sɨ̂gkwǎ nyét ásáŋ bá kalŋa ká âl illa dʉó aŋ alá kilmaŋa na júúrúŋá–sí kʉlgʉ́té ʉrgʉl, na ká áláŋ bɨ́ dɨ́eŋ dɨó dʉó bi dʉó–sí kééŋ tááríŋá'ŋ temen kééŋ dʉléŋá aní. ²⁴ Marraŋ dɨ́eŋ dɨó kwa dǐi alá Suatira ka̱ɨŋ alá in gʉʉd–sí ka̱rɨ á kʉ́leba, na asá illa a̱rɨ–sí á kɨ́wɨ́tɨ́aba alá Sitana'ŋ bʉ̌tʉ kʉlgʉ́te ka̱rɨa, ká bɨŋa–sí in gís ámiŋ, áíláŋdɨ́rrô keer tog dog írí á a̱gɨ́ba. ²⁵ Bá délliŋ a̱rɨ ɨt–sí pʉ́ttôn bǎ̱ɨ asá baiŋ namaŋ níŋ ká á̱ɨ́ŋa. ²⁶ Dʉó ɨt nás kóos ʉ́ndʉl na dúíŋ áare–sí pii namaŋ jágíŋi–lé, ká ye–sí báŋ bá̱rʉ́ŋá'ŋ taál aní, ²⁷ na yé áláŋ yeeŋa–sí kí dáwrá'ŋ táatá̱sʉ tɨ̌ɨ, na yé áláŋ yeeŋa–sí dokké dókkên piá inná daalú'ŋ belgáŋá, ²⁸ délliŋ inná asá ká dúíŋ Báa–lé taála oomé áláŋ bá̱rʉ́ŋá–sí ǎ̱ɨ. Na ká yee áláŋ úrí súurꞌíŋ aní. ²⁹ Dʉó ɨt nás kɨ́ló kee, ǎ̱w nás a̱rɨ ɨt kelamí asá Kʉo ma̱sɨ̂gkwǎ–sí beléŋá.'