Dolêŋkwě osoma osondííŋ waarkwǎ–sís pa̱a̱lɨ́ ¹ Ká pʉ́ttôn a̱gɨla iladɨo asá Dolêŋkwě ósoma saabe'ŋ waarkʉŋo–sí pa̱a̱lɨ́, na kelámi ná kila karába sálláŋa oŋŋalꞌíŋ dɨó díg kí ʉrʉ́ inná kuyíŋkola in beléŋá," Jéla" ² Naa ká namá nʉ́ŋɨ́ awí, namá múrtá pattâ kéŋá.Na dééŋ bôrna namás nabbâl kéŋá, namá sáas kaníe.Namás múrtá–sí in a̱rgɨ́ inná jɨɨrédʉŋo ásáŋ děrŋá suŋŋá–lé kóos êl na ásáŋ kóos bóóyé. ³ Asábá ósoma saabe'ŋ a̱wkʉŋo–sí pá̱á̱lɨ́, namá karâb sállâ a̱wkʉŋo–sí kelami ná in beléŋá, jéla!" ⁴ Namá múrtá keer kuro ná pukkâ kéŋá namaŋ ulmela. Na dééŋ bôrna–sí kɨɨnes áláŋ Sʉʉrʉ'ŋ írí dóŋá–sí bǎw, áláŋ kwa sǔrŋá kawe. Yé–sí namá saar appâ kaníe. ⁵ Asábá ósoma saabe'ŋ ɨɨskʉŋo–sí pa̱a̱lɨ́,namá karâb sállâ ɨɨskʉŋo–sí pa̱a̱lɨ́ kelámi ná in beléŋá, Jéla!" namá nʉ́ŋɨ́ awí, namá múrtá dɨkkô kéŋá! Dééŋ bôrna namás dóŋá delladéllá kee. ⁶ Namá arka díg kelámi nás in píŋítíeŋí inná ǎl kila karába sálláŋa oŋŋalꞌíŋ túle kuro ná in beléŋá, Gomnoŋa'ŋ kɨlʉgirâmꞌíŋ sabba kí dinâr tog–ii na saɨro'ŋ kɨlʉgɨrâm na dééŋ sabba kí dinâr tog–ii, na da̱y na ínaba'ŋ kira–sí jɨttɨ as jáaba!" ⁷ Asabá ósoma saabe'ŋ oŋŋakʉŋo–sí pa̱a̱lɨ́, namá karâb sállâ oŋŋalkʉŋo–sí kelámi ná in beléŋá,Jéla!" ⁸ Namá nʉ́ŋɨ́ awí, namá múrtá urbe kéŋá! Dééŋ bôrna'ŋ kona namás wây ka̱ɨŋ na Utú ná ye–sí dakki ka̱rɨ lʉeŋi.Na yeeŋa–sí namá sʉʉrʉ'ŋ kwa'ŋ sáárꞌíŋ taála kaníe,áláŋ kwa–sí kí saar na kí duur na kí moŋgol na kí sʉʉrʉ'ŋ karába a̱a̱sɨŋa kawe. ⁹ Asábá ósoma saabe'ŋ ooskʉŋo–sí pa̱a̱lɨ́,namá gôbboŋa'ŋ lóó'ŋ ebede–lé kila kwa'ŋ kuíŋá a̱gɨla alá Wʉ́o'ŋ belé'ŋ ʉʉ́ŋ illa asá kɨbɨ́e. ¹⁰ Yeeŋ namás ye–sí arka káwe,"Á̱jɨ́ Ábakuri Loŋpii, teyyâ na seekʉŋo, niín síŋ óóŋ main áláŋ jɨ́ kwa–sí jánsá jaa na kila kwa–lé dáŋgá jabúŋ alá sʉʉrʉ'ŋ írí ka̱ɨŋ aíla kɨŋa–sí ka̱wŋɨ?" ¹¹ Namá dɨ́eŋ dɨó dʉó bi dʉó–sí garambʉ̂bʉ pattâ kaníe namás in aáŋé áláŋ ʉmel ittírǐg jáwí, namaŋ níŋ kɨ́eŋ ampára tááríkwǎ na kɨ́eŋ bârŋa'ŋ diigiŋ tímmeŋ eeŋ. Kin ampára tááríkwǎ na kɨ́eŋ bârŋa'ŋ diigiŋ tímmeŋeeŋ.Kin ampára tááríkwǎ na bǎrŋa–sí ka̱nnɨ̂ŋɨ áláŋ in kawe inná alá yeeŋ –sí ka̱wŋɨ. ¹² Asábá ósoma saabe'ŋ osondíígkʉŋo–sí pa̱a̱lɨ́, namá nʉ́ŋɨ́ awí namá a̱gɨla ná sʉʉrʉ́ŋjɨ́rtɨ́ŋóla ka̱kkɨ́re kéŋá.Dʉlé namá in dɨkkó na kussé eŋa inná delêlꞌíŋ jʉrɨ, dúal nyét gal namá in pukká eŋa inná kewa. ¹³ Na úríŋá jaawíl ná sʉʉrʉ'ŋ írí pólólíŋíe inná bʉʉro ǎl kééŋ kwǎ kɨrróŋa jíŋíti iladɨo abá kí da̱wlo ka̱kkɨ́re ɨ́rtɨ́ŋóla. ¹⁴ Jaawil namá ŋááríŋí namá in nɨɨŋɨŋo inná murul, na pʉ́góŋá na domnyaŋa nyét–sí nás kɨ́eŋ lóóŋá–le ka̱wnyɨ́ŋɨ́e. ¹⁵ Liáŋ sʉʉrʉ'ŋ ábakuriŋa na ta̱bʉŋa na ka̱lda̱ga'ŋ ta̱bʉŋa na kawája na kʉrrokwǎ na koy bi koy na dʉó baj bi baj namás kɨ́eŋ sǔrŋá ka̱rgʉla–lé na pʉ́ŋóŋá'ŋ taaruŋa'ŋ túle kʉʉle. ¹⁶ Namás pʉ́ŋóŋá na taaruŋa–sí ta̱rɨ́ kaweŋi," Dáíŋ írí báwyâ náis illa dʉó'ŋ kʉ́ŋɨ alá kʉttɨ'ŋ írí ǎ̱w na Dolêŋkwě'ŋkilmá'ŋ tʉkkɨŋ–lé bʉʉl. ¹⁷ Ilâíŋ ná dɨ́eŋ kilmá'ŋ soog appâ paago.Kɨ́e ásáŋ taga illa kilmá'ŋ tʉkkɨŋ–si konsa keer?"