¹ Lia namá jaawil dɨwwô na sʉʉrʉ dɨwwô a̱gɨla, illâíŋ ná jaawil waarkʉŋo na sʉʉrʉ waarkʉŋo wa̱rɨ ɨŋɨ, na roo naa á keba. ² Namá deem teyyâ Jurusalam dɨwwô–sí a̱gɨla, na jaawíl Wʉ́o–lé kéŋá ná bʉʉŋeliŋi, nás in ásíleŋ káwe inná bɨrsɨl asá dééŋ jaré–si doldólé káwe. ³ Namá kʉttɨ–lé ʉrʉ́ sîw kelámi ná in beléŋá, " Ba̱gɨ́l! Wʉ́oꞌŋ jaiŋꞌíŋ lóó naa kawꞌŋ dɨó kee. Yé áláŋ kíeŋ kóol. Na yeeŋ áláŋ kééŋ kwa kɨŋɨ, na Wʉ́o kí dééŋ dorol áláŋ kíeŋ gé ná dɨ́eŋ Wʉ́o eeŋ . ⁴ Na yé ásáŋ kɨ́eŋ kʉ́ŋɨ mírmira bi mírmira–sí paasó. Na naa híllâ wǎy na mʉʉnɨŋ na kola na wa̱y áŋ ka̱ɨŋba, illâíŋ ná ótáꞌŋ táara toykʉŋo paasiŋo". ⁵ Lia illa dʉó ǎl kʉttɨꞌŋ írí kayé namá in kwǎ, " Ba̱gɨ́l ká ótáŋá nyét–sí kɨwwóŋa awíti." Naŋ dog in kwǎ, "in ʉʉ–sí rímmeŋ jáa, ilâíŋ ná kin ʉʉŋa seeŋakwǎ na seeŋa gé. " ⁶ Namáis kaa in kwǎ, " Ótáŋá nyét ɨŋɨ ! Ká Alapa na Omega aŋ na juuŋ na Jágíŋi aŋ. Dʉó ɨt ná buur–ii bá síŋ jaiŋꞌíŋ koroꞌŋ pojor–lé koro hǒo aní. ⁷ Dʉó asá kóos ʉ́ndʉl báŋ kin ótáŋá mɨrot piá. Na Ká áláŋ dééŋ Wʉ́o eeŋ na yé ná dúíŋ kwědee eeŋ. ⁸ Maraŋ kaaluŋa na seejǎ̱ɨwa̱rɨkwǎ na kwa anyágá na kuíŋájǎ̱ɨkwǎ na ajɨlɨŋkwǎ na sanyítakwǎ na kʉnʉ́soꞌŋ ba̱gɨjáakwǎ na pɨékwǎꞌŋ mɨrot báŋ utúꞌŋ baw–ii illa alá kí utú daáru lííŋ. In utúꞌŋ baw namá wǎy awkʉŋo–ii". ⁹ Lia melega saabeꞌŋ dɨó díg asá maúna saabe kéŋá asá jʉ́ʉ́rá ka̱rɨkwǎ saabe dɨó píssiŋ ka̱ɨ́ŋ namá êl náis risiŋo, ná in beléŋá, "jéla náis bɨrsɨl áwli, Dolêŋkwěꞌŋ yáakwě." ¹⁰ Namáis kí Kʉo Teyyáŋaꞌŋ dɨo pʉ́gó appâ kurrâꞌŋ írí nyaŋá náis Jurusalam, Deem Teyyâ–sí paalí ná Jaawíl Wʉ́o–lé kéŋá ná bʉʉŋeliŋi. ¹¹ Illa deem namá kí Wʉóꞌŋ galaga úlmélíŋí. Na dééŋ júlmóla ná in lóŋá inná dagâg tárra na inná rées naŋ in ser kéŋá inná teltel. ¹² Na tirja appâ kurrâs kéŋá kí tʉ́sʉ́ŋá weyye an awiŋ na melega weyye na a̱w ná tʉ́sʉ́ŋáꞌŋ wʉoŋa ka̱ɨ́ŋ. Izrǎilꞌíŋ órréŋá weyye na a̱wꞌíŋ kona ná tʉ́sʉ́ŋá–le rimmeŋ káwe. ¹³ sabba bi sabba–lé tʉ́sʉ́ŋá ɨɨs ka̱ɨ́ŋ, ɨɨs sabbaꞌŋ ere na ɨɨs sǎ̱ɨdꞌíŋ ere na ɨɨs rɨ́ɨꞌŋ ere na ɨɨs dʉgʉ́ꞌŋ ere. ¹⁴ Na deemꞌíŋ tirja ebedeŋa weyye na a̱w–sí kéŋá ná dɨ́eŋ írí Dolêŋkwěꞌŋ kʉréemeŋa weyye na a̱wꞌiŋ kona ka̱ɨ́ŋ . ¹⁵ Illa meleg aísa kaa risiŋo jarriꞌŋ ba̱rɨs kéŋá alá siir–lé káwe áláŋ deem na kééŋ tʉ́sʉ́ŋá na tirjaŋa–sí arri. ¹⁶ Deem–sí in kʉtʉmʉl inná ká̱rá̱ma̱tâg na dééŋ muut na wa̱ssɨŋ bá arrá téssiŋ gé. Meleg namá illa deem–sí kí jarriꞌŋ ba̱rɨ arra, namá bʉ́ló ná muut kɨlʉmítira líriŋa a̱w na píríŋa a̱w na weyyéŋá a̱w (2,220) –ii Dééŋ muut na wa̱ssɨŋ na kʉrrɨŋírí bá arra téssiŋ gé. ¹⁷ Na dog dééŋ tirja arrq ná duráŋá píri na weyyéŋá oŋŋal (144) kéŋá kí dʉldɨꞌŋ kwěꞌŋ jarri;ŋ dorá asá meleg táárí pieŋi . ¹⁸ Na tirja–sí kí rées kʉtʉmʉl deem–sí gal kí siir ser kʉtʉmʉl na siir ná in ser kéŋá inná mandara . ¹⁹ Deemꞌíŋ tirjaꞌŋ ebedeŋa–sí namás kí kɨ́tóŋá tárráŋáꞌŋ órréŋá nyét bírnyá káwe. Dííkʉŋo namá rées kéŋá na a̱wkʉŋo namá dɨ́tó silinysiliny ʉyo kéŋá na ɨɨskʉŋo namá dɨ́tó dɨɨdɨɨ kéŋá na oŋŋaalkʉŋo namá dɨ́tó silinysilíny kɨrrô kéŋá . ²⁰ na ooskʉŋo namá dɨ́tó silinyslíny uyú kéŋá na osondíígkʉŋo namá ga̱ldɨ́ kéŋá na seebekʉŋo namá dɨ́tó silinysilíny úlá kéŋá na tammankʉŋo namá dɨ́tó silinysilíny kɨrrókɨrró kéŋá na tiisekʉŋo namá dɨ́tó silinysilíny soónâŋkoro kéŋá na weyyékʉŋo namá dɨ́tó silinysilíny kɨrrókɨrró pattápattá kéŋá na weyye na díígkʉŋo namá dɨ́tó silinysiíny núnyánúnyá kéŋá na weyye na a̱wkʉŋo namá dɨ́tó silinysilíny da̱lɨ́m kéŋá . ²¹ Na tʉ́sʉ́ŋá weyye na a̱w namá sa̱mmɨta weyye na a̱w ka̱ɨ́ŋ ná tʉ́sʉ́ bi tʉ́sʉ́–sí kí sa̱mɨt tog káwe. Na deemꞌíŋ oro–sí namá kí siir ser káwe ná in ser kéŋá inná mandara. ²² Na ká íne deém Toŋteyyâa á a̱gɨ́laba, ilâíŋ ná Wʉ́o Loŋpii Ka̱kkɨ́rekʉŋo na Dolêŋkwě dééŋ Toŋteyyâ gé . ²³ Illa deem dʉlé wala gal dúal–sí á kóelba ásáŋ ye–sí lóóerriŋe, ilâíŋ nás Wʉ́oꞌŋ galaga ye–sí erriŋeli na Dolêŋkwěná dééŋ másárája–ii . ²⁴ Na bá̱rʉ́ŋá áláŋ deemꞌíŋ hěrra–lé kɨ́lŋɨ́a na sʉʉrʉꞌŋ ábakúriŋa ásáŋ kɨ́eŋ galaga dée–lé kélal . ²⁵ Illa deemꞌíŋ tʉ́sʉ́ŋá ásáŋ kí soog nyét pa̱a̱lɨ́ŋá ná péllét ásáŋ á ʉ́rrɨ́ŋɨ́alba, ɨdɨ̂ɨ́ŋ ná híllâ luul áŋ keba. ²⁶ Kwa ásáŋ dée–lé bá̱rʉ́ŋáꞌŋ galaga na ba̱gɨ kélal. ²⁷ Maraŋ a̱rɨ rúbbá á keba áláŋ dée–lé ká̱rɨ́ wala dʉó á keba alá a̱rɨ nayág pii wala gal pɨé pii áláŋ dée–lé ká̱rɨ́. Bá délliŋ kila kwa gé áláŋ ka̱rɨ́a alá kɨ́eŋ kona Dolêŋkwěꞌŋ jaiŋꞌíŋ dombore–lé rímmeŋ ɨŋɨ.