¹ Lia namá melege a̱gɨla ná jaawíl bʉʉŋeliŋi. Ná yé dʉrʉmꞌíŋ gonyâyéŋkwě dóŋa tɨɨ́lɨŋɨ. Naŋ dog nyirríŋ appâ dóŋa tɨɨ́lɨŋɨ. ² Namá illa málál–sí dá̱bbɨ́ŋ tɨ̌o illa alá tóórígꞌíŋ nʉ́ʉ́m–ii alá Ányádɨɨŋáta̱bʉ wala gal Sitan–ii ná kí ayéŋá líri rɨgo. ³ Namá dʉ́rʉ́m ímíŋi na pá̱á̱gɨ́s nás ɨwo, áláŋ naa bá̱rʉ́ŋá–sí júúleŋ taga á piába namaŋ síŋ ayéŋá líri agíŋíal. Lia báŋ kí tin ittî baj kundía . ⁴ Lia namá kʉttɨŋa a̱gɨla. Kila kwa alá taála kaníe ásáŋ kwa–sí kande namá kʉttɨŋaꞌŋ írí kayé. Naŋ dog kila kwaꞌŋ kuíŋá a̱gɨla alá dɨ́eŋ jɨbé Ísaꞌŋ ꞌíŋ ʉʉ́ŋ na Wʉ́oꞌŋ beléꞌŋ ʉʉ́ŋ ta̱bʉŋa kándé. Ná yeeŋ karâb a̱a̱sɨ wala gal dééŋ jaluŋ–sí ba̱gɨ á káweba walá kɨ́eŋ a̱rɨ́ŋá–le wala gal kɨ́eŋ koŋa–lé dééŋ ósom á kaníeba. Namás sállá kɨŋɨ ná kí Jáásodʉŋoŋ ayéŋa líri kuriŋa ka̱ɨ́ŋ . ⁵ Kwa waitólá kerŋa sállá ás kɨŋɨba namaŋ–si ayéŋá líti agíŋíe. In namá sállájeeŋ díígkʉŋo–ii. ⁶ Ná dʉó asá sállájeeŋ díígkʉŋo–lé sá̱dɨ́eŋ eŋa bá borapattádʉŋona teyyâ–ii ! Wǎy a̱wkʉŋo kwa kininiŋꞌíŋ írí kʉrro ás keba, maraŋ yeeŋ áláŋ Wʉ́o na jáásodʉŋoꞌŋ pǎ̱gɨŋa kɨŋɨ, na yeeŋ áláŋ kíeŋ kí ayéŋá líri kuriŋa gé. ⁷ Iladɨo abás ayéŋá líri agíŋíe, Sitan–sí dééŋ túmná báŋ karûl. ⁸ Ná báŋ kúró ná bá̱rʉ́ŋá–sí júúleŋ piá alá kí jǐim júuj na Majúuj ka̱rɨ́a kila alá sʉʉrʉꞌŋ korgi oŋŋal–lé ka̱ɨŋ. Na yé áláŋ yeeŋa–sí geerꞌíŋ ɨsó. Na dɨ́eŋ diigiŋ nii–ii inná rooꞌŋ ŋáány. ⁹ Yeeŋ sʉʉrʉ nyétꞌíŋ írí perra kɨŋɨ nsmás Wʉ́oꞌŋ kwaꞌŋ ka̱lda̱gaꞌŋ kóyó na illa deem térérémerere káwe ǎl Wʉ́o kóel. Maraŋ namá utú jaawíl bʉʉŋo ná kila kwa–sí amí asá kóyó na deem–sí térérémerere káwe . ¹⁰ Lia illa Ányádɨɨŋáta̱bʉ, alá yeeŋ–sí júúleŋ piá, namá utúꞌŋ bǎw kamíŋíe alá kí daáru lííŋ, illa lóó–le alá karâb a̱a̱sɨ na domoŋdʉŋo pɨédʉŋo–sí kamíŋíe. Yeeŋ–sí kí luul na tóó níŋ jággá kaye ná namaŋ níŋ ka̱ɨŋ báŋ ka̱ɨŋ. ¹¹ Lia namá kʉttɨ pattâ appâ a̱gɨla na dʉó ǎl dééŋ írí kayé. Sʉʉrʉ na jaawíl namá dééŋ wajɨ–lé bíe, maraŋ wasá lóó á bʉ́léba áláŋ déé–le jɨa̱ . ¹² Lia namá kwa waitólá appáŋa na dokkéŋa a̱gɨla ná kʉttɨꞌŋ ta̱bʉ́ŋ kééréliŋi. Namá domboreŋa pa̱a̱lɨ́ŋɨ́e. Lia namá dombore keer pa̱a̱lɨ́ŋɨ́, illa alá jaiŋꞌíŋ dombore–ii. Namá kwa waitólá–sí kí kila ʉ́tóŋá jánsá kayé alá kila domboreŋaꞌŋ dɨó rímmeŋ ɨŋɨ, kí kila ʉ́tóŋáꞌŋ dorá alá yeeŋ káwe. ¹³ Roo namás kila kwa waitólá–sí éla alá dééŋ dɨó ka̱ɨ́ŋ. Wǎy na Utú namás kila kwa–sí waitólá–sí éla alá dɨ́eŋ dɨó ka̱ɨ́ŋ. Dʉó bi dʉó–sí bá jánsá kayé, kí kila ʉ́tóŋáꞌŋ dorá ǎl yé pía. ¹⁴ Lia Wǎy na Utú–sí namá utúꞌŋ bǎw kamíŋíe. Utúꞌŋ baw namá wǎy a̱wkʉŋo–ii . ¹⁵ Dʉó ɨt nás kééŋ kona jaiŋꞌíŋ domboreꞌŋ dɨó á bʉ́lɨ́ŋɨ́eba, bá utúꞌŋ bǎw kamíŋíe.