¹ Lia asá kin ʉ́tóŋá bɨtʉl, bá jaawíl a̱rɨ díg kelámi nás kóómʉitíeŋi inná kwa'ŋ dáldá suŋŋâ'ŋ arka ná ʉrʉ́ láddéŋí ná in beléŋá,"Halalúya! Jopóŋó na galaŋa na kʉrro dáíŋ Wʉ́o'ŋ ge. ² Kééŋ jandiŋa seeŋa na wǎ̱rɨga gé; ilâíŋ n's yé ajáala appâ–sí já̱bɨ́, alá sʉʉrʉ–sí kí kééŋ mʉʉsɨnɨŋa jɨttɨ piá. Na Wʉ́o dééŋ írí kééŋ tááríkwǎ'ŋ kewa'ŋ dáŋgá bawa." ³ Namá asi keer ʉrʉ́ ka̱ldʉl," Halalúya! Dééŋ jʉyꞌíŋ sʉ́ʉ́l báŋ írí kúrél ná namaŋ níŋ kee báŋ kee." ⁴ Sábáŋáta̱bʉŋakuráŋakwǎ weyyéŋá a̱w na oŋŋal na karába sálláŋa oŋŋal namá kʉrboŋ ká̱wyɨ̂ŋɨ ná Wʉ́o–sí ba̱gɨ káwe alá kʉttɨ'ŋ írí ǎ̱wɨŋɨ, ná in ká̱mɨŋɨ,Ee yáa. Halalúya!" ⁵ Namá kʉttɨ~lé arka kuro ná in beléŋá," Dáíŋ Wʉ́o–sís mʉjjé báa, bɨ́ kwa nyét kééŋ tááríkwǎ, bɨ́ alá yee ba̱gɨ́ŋka̱lɨ baw, míŋ dokkéŋa namaŋ appáŋa." ⁶ Lia namá a̱rɨ díg kelámi nás in kóómítíeŋi inná kwa'ŋ dáldá suŋŋâ'ŋ kola na inná kuyíŋkola rimitîti ná ʉrʉ́ kaldeŋi ná in ká̱mɨŋɨ,"Halalúya! Ilâíŋ ná Dolêŋkwě'ŋ bɨrsɨlɨŋꞌíŋ tin paago, na dééŋ suur–sís ásíleŋ piá. ⁷ Ǎ̱w nái kilmaŋa sɨmmó ɨŋɨ na kilmaŋa pattá kǎ̱ɨ,, na ye–sís galaŋa káwli! Ilâíŋ ná Dolêŋkwě'ŋ bɨrsɨlɨŋꞌíŋ tin paago, na dééŋ bɨrsɨl dééŋ suu–sís ásíleŋ piá. ⁸ Namá harîr pattâ dʉrtê na teyyâ kaníe áláŋ jíŋí. Ilâíŋ ná harîr dʉrtê Wʉ́o'ŋ kwa teyyáŋa'ŋ tááríŋá wǎ̱rɨga'ŋ lóó kɨɨrél." ⁹ Meleg namáis kaa in kwǎ," In belé–sí rímmeŋ jáa: Borapattá kila kwa'ŋ–ii alá Dolêŋkwě'ŋ bɨrsɨlɨŋꞌíŋ sǔbu'ŋ kamaŋe." Naŋ gís in kwǎ," Kin Wʉ́o'ŋ ʉʉŋa seeŋa gé." ¹⁰ Lia ká namá kééŋ tarŋa–lé kí kʉrŋa óóŋó áláŋ yee ba̱gɨ áa, maraŋ yé namáis kaa in kwǎ," Illa ʉʉ–sí á jáaba! Ká ampâr táárídʉŋo aŋ inná jɨ́ na kɨ́ɨ́ŋ bârŋa alá seejǎ̱ɨkwǎ ge ásáŋ Ísa'ŋ kɨbɨ́a. Bá délliŋ Wʉ́o–sí ba̱gɨ jáa. Domoŋkwǎ'ŋ domoŋꞌíŋ aji b' illa–ii ásáŋ Ísa'ŋ jɨ́bé. ¹¹ Lia namá jaawíl–sí a̱gɨla nás pa̱a̱lɨ́ŋɨ́. Namá múrtá pattâ lóŋóla! Na dééŋ bôrna–sí Seejâ̱ɨdʉŋo na seekʉŋo ka̱rɨ́a. Na yé kí wa̱rɨgɨŋ–si bétél naŋ–si kí wa̱rɨgɨŋ deer já̱gɨ́tɨ. ¹² Kééŋ kʉ́ŋɨ́ in lóŋá inná utú'ŋ ulma, na dééŋ tɨbʉ́ŋ taaja suŋŋâs kee. Na konas kee ná dééŋ suúr rímmeŋ ɨŋɨ ná dʉó á keba ása loŋ bá délliŋ yé–ii nás loŋ. ¹³ Na ye–sí garambʉ̂bʉ díg–si kiŋíe asá kí kewa ká̱bɨ́.Na kééŋ kona ása "Wʉ́o'ŋ Belé" ge. ¹⁴ Na jaawílꞌíŋ ka̱lda̱ga nás murtaŋa ká̱wɨŋɨ nás harîr dʉrtê'ŋ jʉrɨŋa pattáŋa na teyyáŋa kiŋíe ná ye–sí ka̱rɨ kʉleŋi. ¹⁵ Dééŋ úúŋ namá saar sikkâ díg kúréliŋi áláŋ kíe bá̱rʉ́ŋá–sí kʉ̌ʉŋ. Na yé yeeŋ–sí kí dáwrá'ŋ táatá̱sʉ níŋ tɨ̌ɨ. Na yé áláŋ illa kiráŋjɨ́to'ŋ dʉ́lo–sí armínyó asá Wʉ́o Ka̱kkɨ́rekʉŋo'ŋ kilmá'ŋ tkkɨŋ suŋŋâ kee. ¹⁶ Dééŋ garambʉ̂bʉ na dɨwɨl–lé kin kona rímmeŋ káwe. ¹⁷ Lia namá meleg a̱gɨla ná dʉ̌le kɨɨréliŋi.Yé namás kíaŋa nyét ǎl írí arda pɨe kí ʉrʉ́ arka piá, nás in kwǎ,"Béla, ná Wʉ́o'ŋ luulínamɨ́e appâ'ŋ dorol beeŋ. ¹⁸ Béla ná ábakuriŋa na ka̱lda̱ga'ŋ ǒrnaŋa na kwa ka̱kkɨ́reŋa na murtaŋa na bôrnaŋa na kʉldɨŋa nyétꞌíŋ, míŋ baja na koya na dokkéŋa na appáŋa'ŋ nɨ́nó bâm." ¹⁹ Naa namá illa karâb a̱a̱sɨ na sʉʉrʉ'ŋ ábakuriŋa na kɨ́eŋ ka̱lda̱ga–sí a̱gɨla ná dorol kɨŋɨ ásáŋ bôrna alá múrtá'ŋ írí kéŋá na kééŋ ka̱lda̱ga'ŋ konsa deer ka̱gɨ́a. ²⁰ Maraŋ karâb a̱a̱sɨ–sí kéyé. Na illa domoŋdʉŋo pɨédʉŋokí kin ósoma pirjeŋa namá kila kwa–sí júúleŋ pɨeŋi asá karâb a̱a̱sɨ'ŋ ósom ka̱ɨ́ŋ na dééŋ jaluŋ–sí ba̱gɨ kaweŋi. Na illa karâb a̱a̱sɨ na illa domoŋdʉŋo pɨédʉŋo–sí namá a̱w dog utú'ŋ bǎw sálláŋa kamíŋíe illa alá kí daáru lííŋ. ²¹ Na kerŋa gal namá kí illa saar kʉ́sɨŋɨ alá bôrna'ŋ úúŋ kúréliŋi alá múrtá'ŋ írí kéŋá, kíaŋa nyét–sí namá kí kɨ́eŋ nɨ́nóŋá kɨdoŋa pis ɨŋɨ.