¹ Lia asá kin ʉ́tóŋá bɨtʉl namá meleg keer a̱gɨla ná jaawíl bʉʉŋeliŋi. Yé namás taála suŋŋâ kéŋá na kééŋ galaŋa ná sʉʉrʉ nyét–sí teyyá térél pɨ̌e. ² Namá kí ʉrʉ́ sîw ʉrʉ́ taan," póyyâ! Babilon appâ–ii ná póyyâ! Yé ányádɨɨŋa'ŋ jôŋꞌíŋ eŋa, kʉo rúbbáŋa bi rúbbáŋa'ŋ ba̱rʉ eŋa, día rúbbâ bi rúbbâ'ŋ ba̱rʉ eŋa. Karâb a̱a̱sɨ rúbbâ bi rúbbâ na anyág bi anyágꞌíŋ ba̱rʉ eŋa. ³ Ilâíŋ ná bá̱rʉ́ŋá nyét dééŋ a̱jɨlɨŋꞌíŋ surma'ŋ kɨra kɨ́bɨ́, na sʉʉrʉ'ŋ ábakuriŋa kíeŋ a̱jɨlɨŋ káwe, na sʉʉrʉ'ŋ ja̱bɨ́ŋjarâŋkwǎ kí dééŋ jaiŋ mʉ̂nne'ŋ kʉrro kawája kɨŋɨ. ⁴ Namá jaawíl arka keer kelámi ná in beléŋá, Kúíŋ kwa, dée–lé karra bawŋí, ásáŋ kééŋ ka̱tɨ́eŋa–lé sá̱dɨ́geŋ á beeŋba, ⁵ Ilâíŋ ná kééŋ ka̱tɨ́eŋa rímíŋá ná jaawíl péégéli, na Wʉ́o–sí namá kééŋ ja̱nɨŋa ta̱bʉ́ŋ wá̱ɨ́ŋe. ⁶ Ye–sí dog bá indálaŋ tág bǎ̱ɨ inná ǎl yé kwa kerŋa–sí tɨ̌o, na kila tá̱á̱ríŋá ǎl yé piá dɨ́eŋ rʉ́bʉs bawí, kí dééŋ tógóló, ye–sís kira kilailiŋ asiŋa a̱w burró. ⁷ Inná asábá yé dééŋ suur–sí galaŋa suŋŋâ paalí na mʉnnɨŋ suŋŋâ–lé kéŋá, ye–sí jagga na mʉnnɨŋꞌíŋ jarri illa tág baní. Ilâíŋ ná yé kí dééŋ kilmá'ŋ dɨo in kwǎ,' ká kʉttɨ'ŋ írí bá in á̱w inná yáakuri. Ká bɨrmɨ̂t á aŋba, ká mʉʉnɨŋ dʉ́t áŋ áaba.' ⁸ In sibbe'ŋ ʉʉ́ŋ, kééŋ jʉ́ʉ́rá báŋ soog togꞌíŋ dɨó éla: wǎy na mʉʉnɨŋ na duur. Na ye–sí kí utú níŋ kʉye, ɨdɨ̂ɨ́ŋ ná Wʉ́o Loŋpii alá ye–sí jánsá jáwríti, ka̱kkɨ́re–ii." ⁹ Na sʉʉrʉ'ŋ ábakuriŋa alá kíeŋ a̱jɨlɨŋ káwe na kíeŋ kí mʉnnɨŋ kóo, báŋ dééŋꞌíŋ komólal na mʉʉnɨŋ káwal iladɨo abá dééŋ jʉyꞌíŋ sʉ́ʉ́l ka̱gɨle. ¹⁰ Na yeeŋ báŋ dééŋ jagga'ŋ ka̱lɨ'ŋ karra kaare, ná in aáŋal," Ra̱sɨ́e kaísâŋ jɨ–sí poí! Ra̱sɨ́e kaísâŋ jɨ–sí poí! Á̱jɨ́ deem a̱ppʉ̂! Á̱jɨ́ Babilon deem appâ! Ilâíŋ ná tin togꞌíŋ dɨó dɨ́ɨ́ŋ jáíseŋjeeŋ éla." ¹¹ Na sʉʉrʉ'ŋ ja̱bɨ́jarâŋkwǎ bá síŋ ye–sí komálal na mʉʉnɨŋ káwe, ilâíŋ ná naa dʉó á keba ása kɨ́eŋ julúŋátá julel inná: ¹² siir na podda na kɨ́tóŋá tárráŋa na sa̱mɨta na harîr dʉrtê na jʉrɨŋa púaŋa na sórmolꞌíŋ jʉrɨŋa na jʉrɨŋa pukkáŋa na kurúŋá mʉrréŋa'ŋ órréŋá nyét na ótáŋá'ŋ órréŋá nyét ǎl kí áŋgírꞌíŋ kagi káwe, na kurú tárrâ'ŋ ótáŋá'ŋ órréŋá nyét na nihâs na dáwrá na kɨ́tóŋá pusula'ŋ átáŋá ¹³ na gîrpaŋa na mʉrréŋa na sʉ́ʉ́lá na ra̱a̱rʉ́ŋá na sumbúga mʉrréŋa na kira na za̱tʉ̂nꞌíŋ da̱y na wʉ̌o dʉrtê na gomoŋa na kuu na ʉrɨ́ŋá na murtaŋa na kârroŋa na kʉldɨŋa–sí ná koya kuleliŋi. ¹⁴ Na yeeŋ báŋ in aáŋal," Á̱jɨ́ Babilon illa kurú'ŋ kwě asá dɨ́ɨ́ŋ kuy–sí ta̱a̱rɨŋɨ, dɨ́e–lé wa̱rɨ ɨŋɨ, ná asi keer á síŋ bʉ́lɨ́ŋɨ́aba!" ¹⁵ Na kila ja̱bɨ́jarâŋkwǎ ǎl kin ótáŋá–sí kuleliŋi, alá kí dééŋ dorá kawája kɨŋɨ, báŋ dééŋ jagga'ŋ ka̱lɨ'ŋ karra kaare. Na yeeŋ áláŋ komólal na mʉʉnɨŋ káwal. ¹⁶ Na kila" Ra̱sɨ́e kaísâŋ jɨ–sí poí! Ra̱sɨ́e kaísâŋ jɨ–sí poí! Á̱jɨ́ deem a̱ppʉ̂! Jɨ́ hatîr dʉrtê jiŋí, na jʉrɨŋa púaŋa na kukkáŋa jiŋí, asá kí siir na kɨ́tóŋá tárráŋa na sa̱mɨta bírnyá káwe! ¹⁷ Tin togꞌíŋ dɨó in ka̱wa̱jɨŋ niinâŋ namá wa̱rɨ eŋa." Pulluŋꞌíŋ já̱rgɨkwǎ nyét, na kwa nyét ǎl kí pulluŋ ka̱nnɨ̂ŋɨ na pulluŋkwǎ nyét na kilakwa nyét alá dɨ́eŋ na̱mɨ́e roo'ŋ írí kawe, báŋ dog karra kaare. ¹⁸ Iladɨo alá yeeŋ illa utú'ŋ sʉ́ʉ́l ka̱lʉe ǎl ye–sí nyóm sʉél, namá in káiŋa," Tóóríg deem in–lé suŋá appâ kéŋá la?" ¹⁹ Yeeŋ áláŋ sǔrŋá ta̱bʉŋa–lé sʉʉrʉ kiŋía na kí kola na mʉʉnɨŋ ʉrʉ́ ka̱ldɨ́a, ná in aáŋal: Ra̱sɨ́e kaísâŋ jɨ–sí poí! Á̱jɨ́ deem a̱ppʉ̂! Deem asá dée–lé kwa nyé roó pulluŋa ka̱ɨ́ŋ na kí dééŋ ka̱wa̱jɨŋꞌíŋ doá kawája kɨŋɨ! Tin togꞌíŋ dɨó yé namá paasiŋo. ²⁰ Á̱jɨ́ jaawil, dééŋ gi írí kilmá sɨmmó eeŋ! Bɨ́ ta̱gɨŋa na kʉréemeŋa na domoŋkwǎ, dééŋ gi írí kilmaŋa sɨmmó ɨŋɨ! Ilâíŋ ná Wʉ́o ye–sí kila ʉ́tóŋá'ŋ ʉʉ́ŋ aísa bɨŋa–sí piá ja̱nɨ írí já̱bɨ́!" ²¹ Lia meleg appâ namá dɨ́tó írí já̱gɨ inná dɨda appâ namá roó ímíŋi, ná in beléŋá," Kí in arnana tág Babilon deem appâ–sí báŋ dǔu innâŋ kamíŋíal, náŋ asi keer á ka̱gɨ́lalba. ²² Na dɨ́ɨ́ŋ dɨó goŋgoŋjárrákwǎ na gaŋgaŋkwǎ, naniiníekwǎ na ambayákwǎ'ŋ kola–sí asi keer kel á síŋ kámmíaba. Jápírtígo'ŋ jápírtígodʉŋo dɨ́ɨ́ŋ dɨó asi keer á síŋ bʉ́lɨ́ŋɨ́ba. ²³ Na másárája'ŋ hěrra dɨ́ɨ́ŋ dɨó asi keer á síŋ erriŋba. Dʉóbɨrsɨl na bɨrsɨlꞌíŋ arka dɨ́ɨ́ŋ dɨó asi keer kel áŋ amíŋíba. Ilâíŋ ná kɨ́ɨ́ŋ ja̱bɨ́jarâkwǎ sʉʉrʉ'ŋ írí bârŋa'ŋ kʉrrokwǎ ka̱ɨ́ŋ, na bá̱rʉ́ŋá nyét kí kɨ́ɨ́ŋ sanyíta'ŋ dorá júúleŋ kɨŋɨ. ²⁴ In deem–lé, domoŋkwǎ na Wʉ́o'ŋ kwa teyyáŋa'ŋ kewas bʉ́lɨ́ŋɨ́e, na kila kwa nyétꞌíŋ–si kewa bʉ́lɨ́ŋɨ́e ǎl sʉʉrʉ'ŋ írí ka̱wŋɨ."