¹ Ajáala appâ na karâb a̱a̱sɨ Lia kila melega saabe asá maúna saabe ka̱ɨ́ŋꞌíŋ dɨó díg namá êl náis in kwǎ," Jêl, náis ajáala appâ'ŋ jansa áwli alá koroŋa suŋŋâ'ŋ írí ǎ̱w. ² Sʉʉrʉ'ŋ ábakuriŋa kíeŋ a̱jɨlɨŋ káwe, sʉʉrʉ'ŋ jôŋkwǎ–sí namás kira tɨe alá dééŋ a̱jɨlɨŋꞌíŋ amalíŋwa̱rɨŋꞌíŋ kira ká̱bɨ́." ³ Ká namá Kʉo Teyyáŋa'ŋ dɨó aáŋá meleg namái bawa náis jutá nyaŋá. Ɨ́de namá yáa a̱gɨla ná karâb a̱a̱sɨ pukkâ írí ǎ̱wɨŋɨ. Illa karâb a̱a̱sɨ namás jányíŋo'ŋ kona suúr píssiŋ kéŋá, nás ta̱bʉŋa saabe na kolpa weyye kéŋá. ⁴ Illa yáa–sí namás jʉrɨ púa na pukkâ kiŋíe, nás kí siir na kɨ́tóŋá tárráŋa na sa̱mɨta bírnyá káwe. Namás dóŋa siirꞌíŋ tógóló kéŋá nás kí dééŋ a̱jɨlɨŋꞌíŋ ótá anyágá na rúbbáŋa pi's káwe. ⁵ Kona asá bʉ̌tʉ'ŋ ka̱ɨ́ŋ–sí namá dééŋ a̱rɨ́–le rímmeŋ káwe. ⁶ Namá illa yáa–sí a̱gɨla asá Wʉ́o'ŋ kwa na kila kwa'ŋ kewa kira tɨe asá Ísa'ŋ jɨbé–sí kɨbɨ́e. Ǎlbá ká a̱gɨla, namás saa suŋá pirje eŋa. ⁷ Maraŋ meleg namás in kwǎ," Kaáŋ–ii nás pírjeŋ jaw? Ká áísáŋ illa yáa na illa karâb a̱a̱sɨ'ŋ bʉ̌tʉ'ŋ arrá aráŋ asá yé ǎ̱w, illa karâb asá ta̱bʉŋa saabe na kolpa weyye kee. ⁸ Illa karâb a̱a̱sɨ, illa ǎl jɨ́ ja̱gɨla, tóóríg kéŋá na naa á keba, maraŋ áláŋ dʉ́rʉ́m kúró ná dééŋ jáásíŋo'ŋ jee. Na sʉʉrʉ'ŋ jôŋkwǎ alá kɨ́eŋ kona jaiŋꞌíŋ dombore–lé rímmeŋ á káweba míŋ da̱ldɨŋꞌíŋ jetéré–lé ásáŋ suŋŋâ pírjeŋ káwa abá karâb a̱a̱sɨ–sí ka̱gɨ́la, ɨdɨ̂ɨ́ŋ ná tóóríg kéŋá na naa á keba, maraŋ áláŋ êl. ⁹ In lóó–le ta̱bʉ asá rɨɨŋ kee joiŋí'ŋ–ii, na ta̱bʉŋa saabe pʉ́góŋá saabe gé alá illa yáa dɨ́eŋ írí ǎ̱w. Kin ta̱bʉŋa saabe dog ábakuriŋa gé. ¹⁰ Kila ábakuriŋa saabe'ŋ dɨó oos kágíŋíes, na tog nás ká̱ɨ́ŋ ná lóó tɨél. Keer nás ká̱ɨ́ŋ ná á éleba na abá éla, báŋ délliŋ kí tin ittírǐg lóó tɨ̌ɨ. ¹¹ Illa karâb a̱a̱sɨ, alá tóóríg kéŋá na naa á keba, yé namá ábakuri tammankʉŋo–ii. Na yé kila ábakuriŋa weyye gé asá kʉrɨŋ á koomíeba, maraŋ ásáŋ kí tin tog jǎ̱ɨ'ŋ taála koomía indálaŋ inná ábakuriŋa kí illa karâb a̱a̱sɨŋ arrá. ¹² Na kila kolpa weyye ǎl jɨ́ ja̱gɨla ábakuriŋa weyye gé asá kʉrɨŋ á koomíeba, maraŋ ásáŋ kí tin tog jǎ̱ɨ'ŋ taála koomía indálaŋ inná ábakuriŋa kí illa karâb a̱a̱sɨŋ arrá. ¹³ Na yeeŋ aji tog–si ka̱ɨŋ na kɨ́eŋ kʉrro na taála illa karâb a̱a̱sɨ–si dóŋa kawrítía. ¹⁴ Na yeeŋ ásáŋ Dolêŋkwě'ŋ konsa deer ka̱gɨ́a, na Dolêŋkwǎ ásáŋ dɨ́eŋ írí kóos éla, ilâíŋ ná yé sagala'ŋ Sagal na ábakuriŋa'ŋ Ábakuri–ii, na kila kwa ǎl kí Dolêŋkwěŋ arrá kɨloŋe, kila kwa gé asá ta̱rɨ́ káwe na alá seejǎ̱ɨkwǎ ge." ¹⁵ Meleg namáis kaa in kwǎ," Kila koroŋa asá jɨ́ ja̱gɨla, illa lóó–le alá ajáala ǎ̱wɨŋɨ, kwa na kwa'ŋ dáldá suŋŋâ na bá̱rʉ́ŋá na beléŋá ge. ¹⁶ Na kila kolpa weyye na illa karâb a̱a̱sɨ alá jɨ́ ja̱gɨla áláŋ–sí ná̱á̱nɨ́al. Yeeŋ áláŋ ye–sí pʉttô júndíal ná pogo saí ná dééŋ nɨ́nó ammíal ná kí utú nyóm sʉe. ¹⁷ Ilâíŋ ná Wʉ́o kin ábakuriŋa'ŋ kilmaŋa–lé áare jáá ásáŋ dééŋ áare–sí ta̱bʉ́ŋ kááría kí illa dorá áláŋ táárí arrá káwel na áláŋ illa karâb a̱a̱sɨ–si dɨ́eŋ kʉrɨŋ'ŋ taála kaníal, namaŋ níŋ Wʉ́o'ŋ ʉʉŋa tímmeŋ ɨŋɨ. ¹⁸ Na illa yáa alá jɨ́ ja̱gɨla deem appá–ii illa alá sʉʉrʉ'ŋ ábakuriŋa'ŋ–sí tɨél."