¹ Wʉ́o'ŋ kilmá'ŋ tʉkkɨŋ maúna saabe Liá namá Toŋteyyâ–lé ʉrʉ́ sîw kelámi nás meleg saabe–sí in beléŋá, Boo ná Wʉ́o'ŋ kilmá'ŋ tʉkkɨŋꞌíŋ maúna saabe–sí sʉʉrʉ'ŋ írí buló." ² Indálaŋ meleg díígkʉŋo namá nyaŋá ná dééŋ mǎun sʉʉrʉ'ŋ írí julo, namá kíáŋá jɨttɨŋa wa̱ɨŋólá kila kwa–sí kʉrʉl asá karâb a̱a̱sɨ'ŋ ósom ka̱ɨ́ŋ na dééŋ jaluŋ–sí ba̱gɨ kaweŋi. ³ Lia namá meleg a̱wkʉŋo dééŋ mǎun–sí roó dɨó julo, roo namá in eŋa inná dʉó waitólꞌíŋ kewa. A̱rɨ bi a̱rɨ sállâ ná roó kéŋá bá wai. ⁴ Lia meleg ɨɨskʉŋo namá dééŋ mǎun rooŋa na koróŋkʉ́ŋɨ́–le julo, namá kewa ɨŋɨ. ⁵ Lia namá kelámi illa meleg ǎl koro'ŋ taáladʉŋo kéŋá ná in beléŋá," Jɨ́ wǎ̱rɨg jaŋ, Á̱jɨ́ Teyyâkwaŋ, Dʉó alá kee na alá kérrég kéŋá, ilâíŋ ná jɨ́ jandiŋa–lé wâ̱rɨg jaŋ. ⁶ Ilâíŋ ná yeeŋ ta̱gɨŋa na domoŋkwǎ–sí ka̱wŋɨ, naa jɨ́ gal namás yeeŋ–sí kewa naní áláŋ ka̱bɨ. In namá a̱rɨ ɨt–ii ǎl in lóŋ áláŋ yeeŋ kʉ̌ma!" ⁷ Namá gôbboŋa'ŋ lóó–le arka díg kelámi ná in beléŋá, " Ee, Wʉ́o Loŋpii Ka̱kkɨ́rekʉŋo, kɨ́ɨ́ŋ jandiŋa seeŋa na wǎ̱rɨga gé!" ⁸ Lia meleg oŋŋalkʉŋo namá dééŋ mǎun dʉlé'ŋ írí julo, dʉlé–sí namás kɨɨne áláŋ kwa–sí kí tʉkkɨŋ tokkê sʉʉ. ⁹ Innâŋ kwa namá kí tʉkkɨŋ tokkê kʉ́ɨ́ŋɨ́e, kwa namá Wʉ́o'ŋ kona–sí nááleŋ káwe, Wʉ́o asá kin jʉ́ʉ́rá'ŋ írí kʉrro kee. Yeeŋ tʉ́ʉ́beŋ á kɨŋɨba na Wʉ́o–sí galaŋa ás káwlíaba. ¹⁰ Lia meleg ooskʉŋo namá dééŋ mǎun illa karâb a̱a̱sɨ'ŋ írí julo, illa karâb a̱a̱sɨ'ŋ kʉrɨŋ–lé namá lóó dɨkkó eŋa. Kwa namá dɨ́eŋ wa̱yꞌíŋ ʉʉ́ŋ kɨ́eŋ káálíntá kasse. ¹¹ Yeeŋ namá kɨ́eŋ wa̱ɨŋa na kíáŋá'ŋ ʉʉ́ŋ jaawílꞌíŋ Wʉ́o–sí nááleŋ káwe. Yeeŋ kɨ́eŋ tááríŋáꞌŋ ʉʉ́ŋ tʉ́ʉ́beŋ á kɨŋɨba. ¹² Meleg osondíógkʉŋo namá dééŋ mǎun Iporata Roo appâ'ŋ írí julo, kééŋ koro namá bɨɨ́ŋɨ́e, ásáŋ ábakuriŋa–sí dorá ásíleŋ piá ǎl saába'ŋ ere kʉ́ndʉla. ¹³ Lia namá kʉo rúbbáŋa ɨɨs a̱gɨla ná in lʉ́ŋɨŋɨ inná goroŋa ná málál na karâb a̱a̱sɨ na domoŋdʉŋo pɨédʉŋo'ŋ úúŋ kúréliŋi. ¹⁴ Ilâíŋ ná yeeŋ ányádɨɨ'ŋ kʉo gé alá ósoma pirjeŋa pɨe. Kin kʉo ɨɨs namá da̱ldɨŋꞌíŋ ábakuriŋa nyét–le dúítía, áláŋ Wʉ́o Kakkɨ́rekʉŋo'ŋ soog appâ'ŋ deerꞌíŋ dorol pɨ̌al. ¹⁵ Séttiŋ Ísa namá risiŋo ná in kwǎ," Ba̱gɨ́l, ká konyjol níŋ êl inná kaam! Borapattá illa dʉó'ŋ–ii alá lá̱ɨ́ŋ, nás kééŋ jʉrɨŋa jaan, áláŋ paál pogo á ɨlŋɨ́ba na ásáŋ kí ta̱bʉ́ŋ tʉ́ɨ́ paál á ísáríŋíba!" ¹⁶ Lia kila ányádɨɨ'ŋ kʉo ɨɨs namá ábakuriŋa–sí illa lóó–le dorol pɨ̌e ǎl kí Hɨ́bróŋá'ŋ belé Armageddon ka̱rɨ́a. ¹⁷ Meleg saabekʉŋo namá dééŋ mǎun da̱wlo–lé julo, namá Toŋteyyâ'ŋ dɨó kʉttɨ–lé ʉrʉ́ sîw kuro ná in beléŋá," Eŋa!" ¹⁸ Lia ɨ́de namá kuyíŋjúlmólaŋa na wiísꞌíŋ kola rimitîti na kuyíŋkola rimitîti na sʉʉrʉ́ŋjɨ́rtɨ́ŋóla arnân ka̱ɨ́ŋ, na sʉʉrúŋjɨ́rtɨ́ŋóla ininiŋ tóóríg á ɨ́rtɨ́ŋólaba míŋ alá dʉldɨ'ŋ kwě sʉʉrʉ'ŋ írí ooŋo. Illa sʉʉrʉ́ŋjɨ́rtɨ́ŋóla saa suŋá kéŋá. ¹⁹ Illa deem appâ namá a̱rɨ́ŋá ɨɨs ŋááríŋí, na ba̱rʉŋa'ŋ deema ná rúúriŋi. Wʉ́o–sí namá Babilonꞌíŋ deem appâ'ŋ ka̱tɨ́eŋa ta̱bʉ́ŋ wá̱ɨ́ŋe namá yee illa tógóló íní asá kí dééŋ kilmá'ŋ suŋŋâ'ŋ kira pis káwe. ²⁰ Domnyaŋa nyét namá wa̱rɨ ɨŋɨ, na pʉ́góŋá nyét ná ka̱ɨ́ŋba. ²¹ Na urányá appáŋa, ná urány bi urányꞌíŋ dɨrrɨŋ kɨlʉgiráma weyyéŋá oŋŋal káŋá, ná jaawíl kwa'ŋ írí pólólíŋíe. Kwa namá Wʉ́o–sí urányꞌíŋ ʉʉ́ŋ nááleŋ káwe, ɨdɨ̂ɨ́ŋ ná in jʉ́ʉ́r saa suŋá kéŋá