¹ Lia meleg jaiŋꞌŋ koroꞌŋ roo gís paalí. Na kééŋ koro nás ser na teyyá in gé inná teltel, ná Wʉ́oꞌŋ kʉttɨ na Dolêŋkwěꞌŋ kʉttɨ–lé eeríŋá. ² Illa roo namá kí deemꞌíŋ oroꞌŋn túlé ja̱ɨ́l. Na illa rooꞌŋ sbba bi sabba–lé ná jaiŋꞌíŋ kurú kee. Na illa jaiŋꞌíŋ kurú kwǎꞌŋ órréŋá weyye na a̱w–si kee ná dúal bi dúal kɨrel. Na illa jaiŋꞌíŋ kurúꞌŋ nyúlúmá–sí kíes bá̱rʉ́ŋá–sí dááweŋ kawe. ³ Na naa ɨ́de naála áŋ keba. Maraŋ Wʉ́oꞌŋ kʉttɨ na Dolêŋkwǎꞌŋ kʉttɨ áláŋ deém ka̱ɨŋ na kééŋ tááríkwǎ áláŋ yee ba̱gɨ. káwa. ⁴ Yeeŋ Wʉ́oꞌŋ wa̱jɨ níŋ ka̱gɨ́lal, na kééŋ kona–sí áláŋ kɨ́eŋ a̱rɨ́ŋá–lé rímmeŋ káwa. ⁵ Na naa híllâ luul áŋ keba. na yeeŋ másárájáꞌŋ hěrra wala gal dʉleꞌŋ hěrra áŋ kǒeliba, ilâíŋ ná Wʉ́o Loŋpii yeeŋa–sí síŋ erriŋ. Na yeeŋ áláŋ ábakuriŋa gé namaŋ níŋ ka̱ɨŋ. ⁶ Lia meleg namáis kaa in kwǎ, " Kin beléŋá seeakwǎ na seeŋa gé. Na Wʉ́o Loŋpii ǎl domoŋkwǎ–sí upurel, dééŋ meleg áddeŋ piá ásáŋ kééŋ tááríkwǎ–sí a̱rɨ ɨt paalí ǎl dúíti áláŋ naa dakki eeŋ. ⁷ Loŋpii namá in kwǎ, " Ba̱gɨ́l, ká naa dakki ʉ́ndʉl. Borapattá ila dʉóꞌŋ–ii ǎl in domboreꞌŋ dɨó domoŋkwǎꞌŋ domoŋ–sí ba̱gɨ pii." ⁸ Ká Yáaye dʉó ɨt aŋ ǎl kin ʉ́tóŋá–sí kelámi na a̱gɨla. Na ǎlbá kelámi na a̱gɨla, namá illa melegꞌíŋ tarŋa–lé kí kʉrŋa óóŋó áláŋ yee ba̱gɨ áa aísa kaa kila ʉ́tóŋá–sí paalítíŋi . ⁹ Maraŋ yé namáis kaa in kwǎ," Illa ʉʉ–sí á jáaba! Ká dog bá ampâr táárídʉŋo in aŋ inná jɨ́ na kɨ́ɨ́ŋ bârŋa domoŋkwǎ, namaŋ kila kwa nyét alá in domboreꞌŋ domoŋ–sí ba̱gɨ káwe. Bá délliŋ Wʉ́o–sí ba̱gɨ jáa. ¹⁰ Namáis kaa in kwǎ, " In domboreꞌŋ dɨó domoŋkwǎꞌŋ domoŋa–si miliny as jáaba, illâíŋ nás tin dakki piá áláŋ kin ʉ́tóŋá nyét ɨŋɨ. ¹¹ Jɨttɨŋjáadʉŋo ǎ̱w ná ʉ́tóŋá jɨttɨŋa piá na dʉó ta̱bʉ rúbbá ǎ̱w na ta̱bʉ rúbba ǎ̱w na dʉó wǎ̱rɨg ǎ̱w na ʉ́tóŋá wǎ̱rɨga piá na dʉó teyyâ ǎ̱w ná teyyâ ǎ̱w." ¹² Ísa namá in kwǎ, " Ba̱gɨ́l ká naa dakki ʉ́ndʉl, na ká kí kúíŋ dʉléŋá, na jáíseŋjáaŋ aŋ, na dʉó bi dʉó–sí báŋ kí illa a̱rɨꞌŋ dorá awí alá yé piá. ¹³ Ká Alapa na Omega aŋ na waarkʉŋo na ka̱rɨkʉŋo aŋ na Juuŋ na jágíŋi aŋ . ¹⁴ Borapattá kila kwaꞌŋ–ii alá kɨ́eŋ garambʉ̂bʉŋa kale, ásáŋ mat aar ka̱ɨŋ ásáŋ jaiŋꞌíŋ kurúꞌŋ kwǎ kámmíal na áláŋ mat deém kí tʉ́sʉ́ŋá ka̱rɨ́a. ¹⁵ Ásaŋa na sanyítakwǎ na ajɨlɨŋkwǎ na kʉnsʉ́oꞌŋ ba̱gɨjáakwǎ namaŋ dʉó bi dʉó alá kóel áláŋ pɨéŋá na ʉ́tóŋá sa̱rgɨŋa pii, illa deemꞌíŋ paál ka̱ɨŋ. ¹⁶ Ká Ísa, dúíŋ meleg ádeŋ áa áísáŋ bɨŋa ma̱sɨ́gkwǎꞌŋ ʉ́tóŋá kinꞌiŋꞌíŋ, jɨ́be. Ká Dǎ̱ʉdꞌíŋ dɨɨre–lé aŋ naŋ–sí dééŋ Atine aŋ naŋ Úrí Súurꞌíŋ teyyâ aŋ," ¹⁷ Kʉo Teyyáŋa na bɨrsɨl in kámiŋa, "Jêl." Na ǎ̱w illa dʉó asá kelaam na in kwǎ, "Jêl." Ná ǎ̱w illa dʉó alá buur–ii ná êl. Na ǎ̱w illa dʉó asá jaiŋꞌíŋ koro kóel nás hǒo bǎw. ¹⁸ Ká dʉó bi dʉó–sís sá̱wgeŋ aw asá in dombore–lé domoŋkwǎꞌŋ domoŋa–sí kelaam: Abás dʉó díg in dombore–lé a̱rɨ nyií, Wʉ́o bá síŋ illa dʉó–sí kila jʉ́ʉ́rá nyií asá in domboreꞌŋ dɨó káwlíe. ¹⁹ Na abá dʉó díg in dombore–lé domoŋkwǎꞌŋ domoŋa–sí paaso, Wʉ́o báŋ illa dʉó nisil ɨt bǎw asá dʉó jaiŋꞌíŋ kurú na deem teyyâ–lé kee, kila asá in domboreꞌŋ dɨó káwlíe. ²⁰ Yé asá kin ʉ́tóŋá–sí jɨ́bɨ́tɨ in beléŋ, " Kí seéŋsee, ká naa dakki ʉ́ndʉl" ,Ee yáa, Loŋpii Ísa jéla!. ²¹ Ǎ̱w ná Loŋoii Ísaꞌŋ tʉllɨŋ kí Wʉ́oꞌŋ kwa nyéttiŋ–ii Eeyáa.