¹ Yáaye jabaŋadʉŋo dorá jáwŋel: Ayé weyye na oos–lé alá Ka̱ɨsar Toborosꞌíŋ kʉrɨŋ–lé kééŋá, na Pantas Pilaat Yʉ̂dɨya'ŋ a̱kʉ́roŋa'ŋ ta̱bʉ kééŋá, na Hirôd álá Galíílꞌíŋ ta̱bʉ kééŋá na dééŋ bára Pilip alá A̱tʉ́rɨya na Tarakunusꞌíŋ ta̱bʉ kééŋá, na Lisinas alá Abilíne'ŋ ta̱bʉ kééŋá, ² Ila tin–lé alá Annas na Ká̱ɨpa pá̱gɨŋa appʉ̂ŋa ka̱ɨ́ŋ Wʉ́o'ŋ belé namá Za̱ka̱rɨ́ya'ŋ kwě Yáaye–lé paago, ila tin–lé ǎl Yáaye jutá kééŋá. ³ Yé namá ba̱rʉŋa nyét–sí soor kóíŋí ǎl Ʉ́rdʉnꞌíŋ túgáŋá–le ka̱ɨ́ŋ, yé namás kwa–sí tʉ́ʉ́beŋ jeeŋꞌíŋ jaaba'ŋ risíŋ ásáŋ ka̱ttɨ̂eŋa ká̱á̱sʉl. ⁴ Inná abá Azâya'ŋ ʉʉŋa'ŋ dombore–lé rimmeŋ eŋa, ǎl domoŋdʉŋo kééŋá ná in beléŋ, "Dʉó díígꞌíŋ arka ná miǐn jutá ʉrʉ́ ladi ná in beléŋ, 'Loŋpii sís dorá baáŋo Yee–sís perdelas wá̱rɨg bawí. ⁵ Baayn bi baany ǎ̱w ná ʉ́rrɨ́ŋɨ́, na pʉ́gó bi pʉ́gó na ŋorrá–sí a̱w ná bʉtte kawíya, na koraŋa korroŋa–sí ǎ̱w ná wá̱rɨg kawíyal, na koraŋa kossêŋa–sí ǎ̱w ná bírnyá káwal, ⁶ Na kʉldɨŋa nyét ǎ̱w ná Wʉ́o'ŋ jopó–síka̱gɨ́lal." ⁷ Yáaye kila kwa'ŋ dáldá ǎl kʉ́ndʉlɨŋɨ ásáŋ kí koro ka̱bɨŋɨ, namás in kwǎ bɨ́ kin abdargaŋa'ŋ atineŋa ki–ii náis in kwǎ, "Álaáŋ Wʉ́o'ŋ kilmá'ŋ tʉkkɨn–sí baan ǎl ʉ́ndʉl? ⁸ Ʉ́dóŋá kila bâ asá in púlŋítíya ǎlbɨ́ kɨ́eŋ ka̱ttɨ́eŋa–lé tʉ́ʉ́beŋ beŋa, na as buuŋba ásáŋ suur–sí in buwa, kɨ́ birâim sís kaiŋ âl dáíŋ bâ–ii, íla namá iláiŋ–ii nás ká bɨŋa–sí ámiŋ Wʉ́o abá kôil ásáŋ kin kɨ́tóŋá–le birâim–sí dogólá rááŋ ásáŋ bá rááŋ. ⁹ Naa ba̱w námáŋ aasili áláŋ kurúŋá–sí kɨɨ̌ŋá–le beet. Na kurú bi kurú ná kwě tullé á kirelba báŋ kande ná kamíŋíal ná útu ka̱bɨ́yal." ¹⁰ Kwa'ŋ dáldá namá in ɨŋo, na naa kaa níŋ kâ gél?" ¹¹ Yáaye namá in jáwí, "dʉó abás jebeŋa a̱w kee bá ǎ̱w ná kí ila dʉó kaŋgare asá pélét á keba, namaŋ ila dʉó asá na̱mɨ́e kee bá ǎ̱w ná in nálaŋ piyá." ¹² Ɨ́de dog dɨgɨnɨ́e kwǎ kéle ásáŋ ka̱bɨŋɨ, namá Yáaye–sí in kɨ́ɨ́ŋʉl, "Gʉʉdpáálí na naa kaa níŋ kâ gél?" ¹³ Namá in jáwí, "Dɨgɨnɨ́en kila–lé soŋá abaráŋba ǎl in lóóŋ áláŋ baráŋ." ¹⁴ Namá dog ka̱lda̱ga̱ díŋa jɨ́ŋɨŋoŋa kéle, Na naa kaa níŋ kâ gél? Yáaye namá in jáwí, "Kwa–lé sôŋgoŋa kí durú abráŋba, na kwa–sí ja̱nɨŋa kí zʉʉr írí abiŋíba. ǎ̱w nái kɨ́eŋ sôŋgoŋa kila tɨɨlɨ aíla kanníya." ¹⁵ Kwa namá ka̱ɨ́ŋ ná kááníŋí, na kɨ́eŋ kilmaŋa–lé in kawrítíeŋ–ii mat áláŋ yé–ii Jááso dʉŋo. ¹⁶ Yáaye namá in kwǎ, "ká bɨŋa–síkí koro gîs a̱bʉŋ, marraŋ dʉó kee ná dúilé soŋŋâ ka̱kkɨ́ré–ii ná ʉ́ndʉl. Ila dʉó ǎl ʉ́dʉl ká nii á awelba ásáŋ kééŋ perêtta'ŋ boota taga ʉló. Yé bɨŋa–sí kí kʉo tiyyâŋa gí síŋ lɨó ni ná ǎl utú dáwrá–sí tiyyá pii. ¹⁷ Kééŋ kaya dééŋ si dóŋa ka̱ɨŋ asá dééŋ dɨ́ɨ́róŋ kééŋ gomoŋa pááró ná sʉrre'ŋ dɨó jíŋí marraŋ yɨo–sí námá kí ila utú sʉʉ asá á wa̱ɨtelba. ¹⁸ Na yáaye kwa–sí kí beléŋá soŋŋâ kʉrro íní naŋ si belé tullê'ŋ gʉʉdpulŋí. ¹⁹ Marraŋ ǎl Yáaye Hɨrôd A̱kʉ́ro'ŋ ta̱bʉ–síúpúrí, ǎl Hiróda–sí jáwí âl dééŋ bára'ŋ yáa'ŋ kwě kééŋá, namaŋ kil ʉ́dóŋ nyét alá yé piyá ²⁰ Hɨrôdꞌíŋ ʉ́dóŋá soŋŋá ɨŋɨ kí inîŋ alá Yáaye–sí tɨ́o ná túmná já̱bɨ́ ²¹ Îsa'ŋ jaaba na dééŋ dɨrɨ́e: Asábá kwa nyéttiŋ–sí ka̱a̱bɨŋɨ, liya namás Îsa sís ka̱a̱bɨŋɨ, na ila tin–lé alá yé kééŋá ná jʉ́mela namá jaawil pa̱a̱lɨ́ŋɨ́. ²² Ná kʉo tiyyâŋa dééŋ írí in bʉʉŋʉl inná orrá, namá jaawíl ʉrʉ́ díg êl ná in belé'ŋ, "Jɨ́ dúíŋ–si kwě dee jaŋ, ǎila Ká wéel Ka–sí dɨ́ɨ́ŋ írí kilmá gi saa soŋŋá sɨmmó–ii." ²³ Naa Îsa'ŋ ayéŋá namá weyyéŋá ɨɨs ka̱ɨ́ŋ, ǎl si dééŋ Wʉ́o'ŋ táárí tuuŋa. Na ila kwě namá yé kééŋá ǎl kwa kɨ́eŋ ta̱bʉŋa–lé in kawrítíeŋi–ii, ása Ɨ́sɨb Hali'ŋ kwě–ii, ²⁴ Na Hili Mattatꞌíŋ kwě, na Mattat Lebe'ŋ kwě, Lebe Melke'ŋ kwě, na Melke Janne'ŋ kwě, na Jenne Ɨ́sɨbꞌíŋ kwě. ²⁵ Na Ɨ́sɨb Mattayaasꞌíŋ kwě, na Mattayaas Amosꞌíŋ kwě, na Amos Noomꞌíŋ kwě, na Noom Esel'íŋ kwě, na Esel Nagayꞌíŋ kwě, ²⁶ Na Nagay Maasꞌíŋ kwě, na Maas Mattayaasꞌíŋ kwě, Na Mattayaas Saminꞌíŋ kwě, na Samin Josegꞌíŋ kwě, na Joseg Juda'ŋ kwě. ²⁷ Na Juda Jananꞌíŋ kwě, na Janan Resa'ŋ kwě, na Resa Zurbaabilꞌíŋ kwě, na Zurbaabil Seltelꞌíŋ kwě, na Seltel Nerɨ'ŋ kwě, Nerɨ ²⁸ Milki'ŋ kwě, na Melki Adde'ŋ kwě, Adde kusami'ŋ kwě, Elmadamꞌꞌiŋ kwě, Elmadam Erꞌíŋ kwě, ²⁹ Na Er Jashuwa'ŋ kwě, na Jashuwa Elezarꞌíŋ kwě, na Elezer Jaramꞌíŋ kwě, na Jaram Mattáꞌiŋ kwě, na Matt lepeŋ kwě. ³⁰ Na Lepe Sɨmonꞌíŋ kwě, na Sɨmon Juda'ŋ kwě, na Juda Ɨ́sɨbɨ'ŋ kwě, na Ɨ́sɨb Jonamꞌíŋ kwě, na Jonam Elikimꞌíŋ kwě, ³¹ Na Elikim Mele'ŋ kwě, na Mele Manna'ŋ kwě, na Manna Mattasa'ŋ kwě, na Mattasa Nanusanꞌíŋ kwě, na Nanusan Da̱ʉ̂dꞌíŋ kwě, ³² na Da̱ʉ̂d Jesse'ŋ kwě, na Jesse Obedꞌíŋ kwě, na Obed Baazꞌíŋ kwě, na Bawaz Salamonꞌíŋ kwě, na Salamon Nosanꞌíŋ kwě. ³³ Na Nosan Amminadabꞌiŋ kwě, na Amminadab, Na Aminadab Adaminꞌiŋ kwě, Adamin Arni 'ŋ kwě, na Arni Hizoronꞌíŋ kwě, na Hizoron Perezꞌíŋ kwě, na Perez Juda'ŋ kwě, ³⁴ Na Juda Ya̱gʉ̂bꞌíŋ kwě, na Ya̱gʉ̂b Isâ'ŋ kwě, na Isâ Birâimꞌíŋ kwě, na Birâim Teera'ŋ kwě, na Teera Nahûrꞌíŋ kwě, ³⁵ Na Nahûr Sidogꞌíŋ kwě, ³⁶ 36Na Seela kainanꞌíŋ kwǎ, na kainan Arapasadꞌíŋ kwě, Arapasad Seemꞌíŋ kwě, na Seem Nû'ŋ kwě, na Nû Lemagꞌíŋ kwě, ³⁷ Na Lemag Matasalꞌíŋ kwě, na Matasal Enogꞌíŋ kwě, na Enog Jeredꞌíŋ kwě, na Jered Malalꞌiŋ kwě, na Malal Kinanꞌíŋ kwě, ³⁸ Na Kinan Enosꞌíŋ kwě, na Enos Seesꞌíŋ kwě, na Sees Adamꞌíŋ kwě, na Adam Wʉ́o'ŋ kwě.