¹ Jɨ́ ǎ̱w nás in jɨw, soga ka̱rɨkwǎ–le áláŋ tina táráŋa élal nás tanasâŋ píssiŋ ka̱ɨŋ . ² Kwa báŋ délliŋ kɨ́eŋ sǔrŋa kǒeli naŋ níŋ sôŋgoŋaꞌŋ joiŋíkwǎ kɨŋɨ naŋ síŋ doŋgóré kɨndeli naŋ níŋ kandagána gé naŋ níŋ ŋannyiŋkwǎ kɨŋɨ naŋ níŋ wa̱lɨŋa–lé ba̱gɨ kɨ̌a naŋ níŋ ɨdʉgíjʉrʉnya kɨŋɨ naŋ síŋ seejǎ̱ɨ á ka̱ɨŋba , ³ naŋ síŋ joiŋí á ka̱ɨŋba naŋ níŋ suur–sí áápeŋ á kaweba náŋ níŋ suur kéndéli. Naŋ síŋ suuríŋorojáa á ka̱ɨŋba . naŋ níŋ a̱a̱sɨŋa gé naŋ níŋ a̱rɨ alá tullé–ii á kǒeliba. ⁴ naŋ níŋ ka̱rɨbootókwǎ gé naŋ níŋ kwa tʉ́ʉseŋa ka̱ɨŋ naŋ níŋ kɨ́eŋ sǔrŋa–Sí saa suŋá írí kawrítía naŋ níŋ kilmaꞌŋ sɨmmɨŋ–sí Wʉ́o–lé suŋá kǒela. ⁵ namás paalꞌíŋ ere ta̱gɨŋa kalŋítía maraŋ námá ta̱gɨŋꞌíŋ kʉrro–sí kaareli Kwa kinniŋ–lé éŋgéreŋ jeeŋ. ⁶ Dɨ́eŋ dɨó dǐi kwaꞌŋ toŋa selem selemiŋ kannía ná yáaŋa kilmaŋa nyokkéŋa–sí ta̱bʉŋa kaame kila alá kí kɨtɨ́eŋa kattábíŋá naŋ–si ŋa̱a̱nyɨŋa jɨttɨŋaꞌŋ orréŋá nyét a̱rgɨ́tɨ́a . ⁷ na kinniŋ yáaŋa kérrég gʉʉd kawe maraŋ péllét kotóíŋá áláŋ ʉʉ́ŋseeꞌŋ arrá keréŋéli. ⁸ Inná asá bá Janesiŋ kí Jamberes Mûsa–sí konsá kááré, na kin kwa dog–sí ʉʉ́ŋsee–sí konsa kééréli. Na yeeŋ kila kwa gé ǎl kotóíŋá ásáŋ ʉ́tóŋá tullé kárrítía na dɨ́eŋ seejǎ̱ɨ tóíŋ ásáŋ kí jarri arrá ɨŋɨ. ⁹ Maraŋ dog ta̱bʉ́ŋ ninnálaŋ áŋ kɨa̱ŋba ilâíŋ nás dɨ́eŋ ʉllɨŋ–sí dʉó bi dʉó loŋ inná asá bá kila kwa a̱w Janes na Jamberes–sí eŋa. ¹⁰ Maraŋ jɨ́ dúíŋ gʉʉd na dúíŋ jaiŋꞌíŋ dorá na dúíŋ aji jaiŋ–lé na dúíŋ seejǎ̱ na úíŋ mááleŋjeeŋ na dúíŋ joiŋí na dúíŋ jɨrmó . ¹¹ Na kúíŋ táltꞌileŋjeeŋ na kúíŋ mííneŋa kila aísa kaa intaki na Ikinum na Listara ɨŋɨ–sí kí seéŋja̱ɨŋ ka̱rɨjʉ́ló. ká kin táltíleŋjeeŋa–sí a̱rmo na Loŋpii gí dɨ́e–lé nyét rááŋa . ¹² Na kí belêŋsee kwa nyét ǎl kǒeli áláŋ Jáásodʉŋo Ísa–lé ta̱gɨŋꞌíŋ jaiŋ ka̱ɨŋ, báŋ tátíleŋ kɨŋɨ. ¹³ Maraŋ kwa náŋ yeeŋ–sí júúleŋ káwa. ¹⁴ Maraŋ ǎ̱w ná kí ʉʉ́ŋsee jaiŋ illa asá jɨ́wɨ́ na pʉ́ttôndiŋ see jéyá, ilâíŋ nás jɨ́ jaluŋ kila ʉ́tóŋá–sí kii lé–ii nás jɨ́wɨ. ¹⁵ Míŋ asá ittí ja̱ɨ́ŋá Rim Teyyáŋaꞌŋ arrá jeréŋéliŋi aíla taga rɨɨŋ ínnía illa aísa kí seejǎ̱ɨꞌŋ dorá jopóŋó–le dúíti seejǎ̱ɨ illa alá Jáásodʉŋo Ísa–lé kee. ¹⁶ Wʉ́oꞌŋ Domboreŋa Toya nyét–sí Wʉ́o upura áláŋ gʉʉdꞌíŋ jáwli na ka̱lɨ́ŋjaní na Jaáŋo na wa̱rɨgɨŋꞌíŋ júlŋiꞌŋ nisila gé, ¹⁷ áláŋ Wʉ́oꞌŋ dʉó mat asitóg pááríŋó na dóldóleŋ eeŋ áláŋ táárí bi táárí tullê–sí piá.