¹ Naa jɨ́ dúíŋ kwě, ǎw nái kʉrro kí illa tʉllɨŋꞌiŋ dorá ééríŋólal alá Jáásodʉŋo Ísa–lé kee. ² Kila gʉʉda alá jɨ́ dúí–le Kʉ́ŋɨ́kwě suŋŋâꞌŋ ta̱bʉ́ŋ keljámi, kila kwa amana–sí dóŋa jaa alá kwa kɨt gé ásáŋ yeeŋ dog taga kwa kerŋa–sí káwlía. ³ Dúí–les miine–lé jaldíŋó inná Jáásodʉŋo Ísaꞌŋ ka̱lda̱g tullê. ⁴ Dʉó ǎl táárí in pii inná ka̱ldɨg, kérrégꞌíŋ jaiŋꞌíŋ ʉ́tóŋá–lé ás nɨɨ́ŋba, maraŋ ʉʉ ɨt pii áláŋ dééŋ ôrnaŋ illa–sí kilmá sɨmmó piá asá yee ka̱lda̱ŋɨ–lé keere. ⁵ Innála dog abás dʉó díg tarrîg in pii inná jʉ́skʉ́ŋodʉŋ, yé kóosjêldʉŋoꞌŋ sáas ás bóítiba, namaŋ síŋ kí kila koraŋa tarrîg piá asá kwa kawe. ⁶ Ra̱ydʉŋo ǎl gaddâm–ii yé bá ǎ̱w ná kééŋ taáŋá kwaꞌŋ waar rééŋél . ⁷ Kin ʉ́tóŋá–sí ta̱bʉ́ŋ túllêŋdiŋ jaa aísa ámiŋ, ilâíŋ ná Loŋpii bá gí síŋ jɨɨ kin ʉ́tóŋá nyétꞌíŋ arrájarâŋ paalí. ⁸ Ǎ̱w náis in lóŋítía Ísa Jáásodʉŋo–sí ása waitólá–lé sállá káwe, na yé Dǎ̱ʉdꞌíŋ atineŋa–lé kéŋá.In bá yé–ii asá ká dúíŋ Belétullêꞌŋ dɨó gʉʉd áwli. ⁹ Belétullêꞌŋ ʉʉ́ŋ–ii ná ká mííneŋ allíŋ namaŋ gís lóó ɨt–lé péégél nái kí nyirríŋá kɨrgeli inná ja̱nɨ́on. Maraŋ Wʉ́oꞌŋ belé á rɨgɨŋelba . ¹⁰ Na naa ká kila kwaꞌŋ ʉʉ́ŋ ǎl Wʉ́o jááŋó ʉ́tóŋá nyét ɨrmel ásáŋ mat yeeŋ dog jópóŋó koomíe ila ǎl Jáásodʉŋo Ísa–lé kee nás galaŋa lʉʉt ʉ́ndʉl. ¹¹ In belé seekʉŋo–ii " Abá kɨ́ kí Jáásodʉŋo arrá kúsá , kɨ́ dog báŋ kíeŋ arrá kaiŋ. ¹² Na abá kɨrmel, kɨ́ dog báŋ kíeŋ arrá toŋkuri kǎ̱ɨ. Na abá kɨ́ yee kaaríŋí yé dog bá gíŋ kɨŋa úríŋí. ¹³ Annaŋ dog kí seejǎ̱ɨkwǎ ká̱ɨ́ŋ, ilâíŋ ná yé dééŋ suur taga áŋ úríŋíba. ¹⁴ Kaw–sí nái kin ʉ́tóŋáꞌŋ nʉgʉsʉg jaw aísa ká waa. Na Wʉ́oꞌŋ ta̱bʉ́ŋ–si sáwgeŋ jaw áláŋ beléŋaꞌŋ ʉʉ́ŋ guldaŋa–lé á ka̱rɨ́aba ila ʉʉ nisil ás keba, nas bás kila kwa–sí jáásíŋo ʉ́ndʉl asá kelkaame . ¹⁵ Kɨ́ɨ́ŋ tulléŋaꞌŋ tullê jáa áláŋ dɨ́ɨ́ŋ suur asá ʉʉ́ŋseeꞌŋ belé–sí kwa–sí dééŋ arrá tárásiŋ réégél. ¹⁶ Beléŋá jʉ́rʉsa na ʉllɨŋꞌíŋ gorreŋaꞌŋ oró juró. Ɨdɨ̂ɨ́ŋ ná kwa ǎl dɨ́e–le ka̱rɨ́tɨ́a báŋ daar Wʉ́o–lé karra kawŋía. ¹⁷ Kɨ́eŋ gorreŋa báŋ in nyáálíŋíal inná dáípuyyâ. Na kila kwaꞌŋ dɨó Himinusiŋ kí Peietas gé . ¹⁸ ǎl ʉʉ́ŋsee–sí soor kaníe . Yeeŋ namá in kámíŋa sállájeeŋ âl êl nás beto, innála namá kwa dǐiꞌŋ seejǎ̱ɨ jɨttɨ kawe. ¹⁹ Maraŋ Wʉ́oꞌŋ sɨyyɨŋ kérrég bá in ka̱kkɨ́ré kɨɨrél inná dórgíꞌŋ dɨ́tó, ná dée–lé rim kí jégérgéro kérgérgérol, " Loŋpii kila kwa–sí loŋ–si ǎl kééŋ ge" na Dʉ́o bi dʉó nás Loŋpiiꞌŋ kona–sí tɨɨnel báŋ korroŋaꞌŋ jáa–lé túga píŋí. ²⁰ Toŋ appâ–lé maúna ǎl ka̱ɨŋ délliŋ siir na poddaꞌŋ á geba, maraŋ kurúŋá na daaluꞌŋ dog ka̱ɨŋ . dǐi namá ba̱gɨꞌŋ ájíŋaꞌŋ gé na dǐi gal na ajíŋá hǒoŋaꞌŋ ge. ²¹ Na naa abá dʉó díg dééŋ suur–sí tááríŋa hǒoŋa–lé teyyá pii, yé báŋ mǎun ɨt eeŋ ásáŋ kíe ba̱gɨ́ꞌŋ ájíŋa káwa, na ǎl teyyá kawe ná dééŋ Sagal–lé tullé–ii na asá ájíŋá tulléŋáꞌŋ órréŋá nyétꞌíŋ jáa–lé ásíleŋ káwe. ²² Júréŋáꞌŋ surmaŋa jɨttɨŋa–lé día jʉɨ, namá wa̱rɨgɨŋ na seejǎ̱ɨna joiŋí na dóŋá–síjʉrrʉ̂ŋ, kí kila kwaŋ arrá alá kɨ́eŋ kilmaŋa sera Loŋpii–sí ba̱gɨ kawe na kʉ̌melis. ²³ Ʉllɨŋꞌíŋ na ɨllɨŋꞌíŋ guldaŋaꞌŋ oró juró, ɨdɨ̂ɨ́ŋ nás jɨ́ jaluŋ yeeŋ ása guldaŋa ja̱gɨ́tɨ́a. ²⁴ Na Loŋpiiꞌŋ koy in á lóŋba áláŋ guldân–ii, maraŋ bá ǎ̱w nás dʉó bi dʉó–le áwáy kee naŋ síŋ taga kwa gʉʉd páálíti naŋ níŋ jɨrmódʉŋo suŋŋâ–ii . ²⁵ Na ǎ̱w ná dʉó bʉgʉl–ii iladɨo asá kwa kɨt–sí kɨ́eŋ korroŋa jáwŋel asá ʉʉ́ŋsee–sí konsa kééréli, mat níŋ Wʉ́o paraga íní ná tʉ́ʉ́beŋ kɨŋɨ nás ʉʉ́ŋsee kɨwe, ²⁶ Lia námá kɨ́eŋ ja̱ɨma w[rɨga–lé ká̱ɨ́ŋal ná Ányádɨɨŋáta̱bʉꞌŋ zárgán kurol. Ányádɨɨŋáŋta̱bʉ ǎl yeeŋ–sí tɨ̌o ná júndí ná dééŋ áare–sí kawe.