¹ Wʉ́o na Jáásodʉŋo Ísaꞌŋ dair–lé Ísa ǎl dúíti áláŋ sálláŋa na waitíló–sí jánsá jaa, na kí dééŋ jalŋola na kʉrɨŋ, ká kí kurrâ gî ɨgɨ́tɨ , ² áláŋ asil já̱w áláŋ tin dom–ii wala dom á–iiba, dorá korroŋ na seejǎ̱ɨŋa korroŋa–sí jupúrí na jaáŋos. Maraŋ kwa–sí kʉrro janí iladɨo asá yeeŋa–sí kí jɨrmó suŋŋâ gʉʉd jáwlíti. ³ Tin níŋ êl alá kwa seejǎ̱ɨ tullê–sí kel á kaameba. Maraŋ mááŋ námá kɨ́eŋ ŋa̱a̱nyɨŋa jɨttɨŋa–sí ka̱rɨ kʉ́lal námás dɨ́eŋ táas–lé gʉʉdpáálíŋá kélal .Na kin gʉʉdpáálíŋá báŋ a̱rɨ ɨt aáŋal alá kɨ́eŋ kɨ́ló nyɨɨŋólá kóeli áláŋ kelammía . ⁴ Yeeŋ kɨ́eŋ kɨ́ló ʉʉ́ŋsee–lé níŋ karraa kawía námá aldíŋá jʉ́rʉsa–sí ka̱rɨ kʉ́lal. ⁵ Maraŋ jɨ́ ǎw tina nyét–lé ná dɨ́ɨ́ŋ suurꞌíŋ oro jaw na miine jɨrmó na jáwlidʉŋoꞌŋ táárí jáa na kɨ́ɨ́ŋ tááríŋá nyét–si jáge alá Wʉ́oꞌŋ táárídʉŋo jaŋ. ⁶ Illâíŋ ná dúíŋ jaiŋ–sí in kinynye inná jabaꞌŋ gôbbo, na dúíŋ wǎyꞌíŋ tin dakkis piá áláŋ êl . ⁷ Ká deer tullêkwaŋ ééró na ká addíꞌŋ addi á̱kkɨ́a na seejǎ̱ɨ–sí pʉ́ttôndiŋ eyá. ⁸ Na míŋ íne ta̱bʉ́ŋ ka–sí wa̱rɨgɨŋꞌíŋ sáas gís gʉ́bʉ́l kayé. Ká illa soog, Loŋpii ǎl Jansadʉŋo wǎ̱rɨg–ii kaa gíŋ yee dʉléŋá íní, na délliŋ ka–sí á–iiba, maraŋ namaŋ kila kwa nyét–sí ǎl kǒela áláŋ yee ka̱gɨ́la ná lóŋóla. ⁹ Kɨ́ɨ́ŋ tulléŋaꞌŋ tullê jáa áláŋ dúi–lé waar waar jéla. ¹⁰ Dimas ɨdɨ̂ɨ́ŋ ná yé in da̱ldɨŋꞌíŋ ótáŋá saa suŋá kóel namaŋ gí kaa báás piá ná Tisilónika nyaŋá. Keresen Galasa nyaŋá na Táítas ná Dalmata nyaŋá . ¹¹ Bá délliŋ Lʉg–ii ná kíe kaŋ. Ǎ̱y Maag–sí joiŋí nás jéla, ɨdɨ̂ɨ́ŋ ná dúíŋ wʉ́óŋtáárí–le dúí–le jányíŋi–ii ¹² Ká Tukas–sí Ipisa áddeŋ áa. ¹³ Ná abá jʉ́ndʉl bás illa dilliꞌŋ garambʉ̂bʉ. asá ká Karpos undí ǎl Tɨrʉs kee na kúíŋ domboreŋa jolólé na galla kila murula. ¹⁴ Illa mɨɨr A̱lɨzandar kaa gîs ʉ́tóŋá jɨttɨŋa saa suŋá piá . Loŋpii a̱rɨ ɨtꞌíŋ níŋ dáŋgá bǎw ǎl yé piá . ¹⁵ Jɨ́ dog dɨ́ɨ́ŋ sábbá ǎ̱w ná dééŋ ʉʉ–lé báal jaa, ɨdɨ̂ɨ́ŋ yé káíŋ domoŋa–sí saa suŋá kí zɨndɨ́e konsa keera. ¹⁶ Dúíŋ suurꞌíŋ jaari waarkʉŋo–lé dʉó tog dog á élaba áísáŋ nyiíŋí, maraŋ dʉó bi dʉó bái da̱ldɨ́le júndí. KALâŋ KIN Ka̱tɨ́eŋa–lé yeeŋa–sí írí ka̱bɨ́a̱lba. ¹⁷ Maraŋ Loŋpii dúíŋ–si sábba keera namái kʉrro íní áláŋ kí dúíŋ dúíŋ dorá domoŋ nyégérég tawrá jáwíŋí na áláŋ jáara nyét kelkámmía . Na Ká mʉʉrʉ́ꞌŋ–si úúŋ opoŋo. ¹⁸ Loŋpii kaa gí síŋ gɨ́ɨ́rejeeŋa jɨttɨŋa nyét–le jopó náis dééŋ jaawilꞌíŋ kʉrɨŋ–lé túllêndiŋ jee .Ǎ̱w na galaŋa Loŋpiiꞌŋ ge namaŋ níŋ ka̱ɨŋ báŋ ka̱ɨŋ. Ee yáa. ¹⁹ Peresila na Akuila namaŋ Onesparsꞌíŋ toŋíŋkwa–sís dúíŋ dóŋá jaagó. ²⁰ Irastas Korinis ooŋo na Toropimas–sí Miletas undí ná wajân kéŋá . ²¹ Kɨ́ɨ́ŋ tulléŋaꞌŋ tullê jáa áláŋ íne diliꞌŋ sogaꞌŋ waar jaagó. Ebulus gî jɨɨ dóŋá ínni namaŋ Pʉdɨnɨsiŋ kí Linos na Kaladía namaŋ Jáásodʉŋoꞌŋ ka̱rɨjʉ́lókwǎ nyét gî bát dóŋá kannía . ²² Kalâŋ Loŋpii kí kɨ́ɨ́ŋ kʉoŋ–ii. Na tʉllɨŋ ná kíeŋ kwa nyét baŋ Een yáa.