¹ Dʉóbain–sí kí kʉrro a jupúríba, maraŋ bá kʉrro janí ála yé dɨ́ɨ́ŋ báa–ii. Na dogólá keya dollê–sí in jǎ̱ɨ inná kɨ́ɨ́ŋ bârŋa, ² na yáaŋa toya–sí gal in jǎ̱ɨ inná kɨ́ɨ́ŋ íyaŋa, na dogólá ka̱nɨ dollê–sí kí sɨrrɨŋ asitóg in jǎ̱ɨ inná kɨ́ɨ́ŋ ka̱nɨ. ³ Na bɨrmɨ́ta–sí ba̱gɨ jáa na jányíŋi kila alá kí seéŋsee jányíŋi kǒeli. ⁴ Maraŋ abás bɨrmɨ̂t dogólá wala gal atineŋa kee, yeeŋ maindîŋ bá ǎ̱w nás kɨ́wɨ́al áláŋ dɨ́eŋ seejǎ̱ɨ–sí táárí–lé kaye na dɨ́eŋ toŋíŋkwaꞌŋ oro kawe ná kí in dorá áláŋ kɨ́eŋ wa̱lɨŋa na toya–sí kɨ́eŋ kʉrro kawía. Ɨdɨ̂ɨ́ŋ ná in yé–ii ǎl Wʉ́o–sí kilmá sɨmmó pii. ⁵ Ná bɨrmɨ̂t ǎl kí seéŋsee jányíŋi kóel na ǎl nyét dítǐn saí bá dééŋ já̱ɨ́go Wʉ́o–le jáwrítí, na kééŋ dawaŋa na jʉ̌ma–lés kí luul na tóó ʉɨ́tɨ. ⁶ Maraŋ bɨrmɨ̂t ná délliŋ dééŋ ta̱bʉ́ŋ in jáwríti áláŋ dééŋ suur–sí kilmá sɨmmó piá bá waitól–ii namaŋ iladɨo alá sállâ–ii. ⁷ Kwa–sí kin ǎ̱wsaŋas jwa, áláŋ illa kɨŋɨ nás lóom á ka̱ɨŋba . ⁸ Na abá dʉó kee nás kééŋ aala–sí tááríŋá ás piiba, na galla kila ǎl kééŋ aala dakkiŋa gé, yé bá seejǎ̱ɨ sí–ii ná irel naŋ mááŋ illa dʉó–le suŋá jɨttɨ–ii ǎl seejǎ̱ɨ ás keba. ⁹ Bɨrmɨ̂t–sí áláŋ kila bɨrmɨ̂taꞌŋ táara–lé kaye alá jányíŋi kǒeli na illa eeŋ ásáŋ kí ótʉ́ŋá kányíŋíal, bá in lóŋ kééŋ áyéŋá áláŋ weyyéŋá osondíigꞌíŋ dǔu á geba, na alá bá délliŋ jaré togꞌíŋ Yáaŋkwě kéŋá . ¹⁰ na kwas túllên kalaŋ kééŋ tááríŋá tulléŋáꞌŋ ere ǎl piá alá dogólá rʉnyo na kwa–sís tɨ́ɨré na Wʉ́oꞌŋ kwa–sí tarŋa lɨo na tansâŋakwǎ–sís nyiíŋi na uur tááríŋá tulléŋaꞌŋ órréŋá nyét–sí ínni. ¹¹ Na inná bɨrmɨ̂ta dokkéŋa–sí táara–lé a jaaba. Ɨdɨ̂ɨ́ŋ ná dɨ́eŋ sa̱a̱yɨŋ suŋŋâ illa bará níŋ júndí ná Jáásodʉŋo–lé karra kawŋíal námá koiŋíal ásáŋ kɨal. ¹² Indálaŋ námás sǔrŋa–sí jansa–lé kááríal, ɨdɨ̂ɨ́ŋ nás dɨ́eŋ jaasi waarkʉŋo–sí ka̱a̱rʉl. ¹³ Illaꞌŋ paál, yeeŋ jʉkkɨŋ–si kɨ́wɨ́e, ná toŋaꞌŋ táasa–lé kɨloŋe. Yeeŋ délliŋ jʉkkoŋa á geba, maraŋ dog kwaꞌŋ giba kawe nás sǔrŋá–si kí kwa kerŋaꞌŋ jaiŋꞌíŋ ʉ́tóŋá dóŋa suŋá kawe.Namá ʉ́tóŋá kila kámiŋa alá in á lóŋba áláŋ kámiŋa. ¹⁴ Na naa ká wǒel bɨrmɨ́ta dokkéŋa–sí ásáŋ kɨal ná dogólá kaare na kɨ́eŋ toŋaꞌŋ oro káwa ásáŋ gáarim dorá á bʉ́lóba ná belé jɨttɨ rɨsíŋó . ¹⁵ Illâíŋ ná bɨrmɨ́ta dokkéŋa dǐi námáŋ dǒra kʉrʉl ná Sitan–sí ka̱rɨ kʉ́lʉl' ¹⁶ Na abá yáa kee alá seejǎ̱ɨdʉŋo–ii nás aala kee alá bɨrmɨ́ta gé, illa yáa bá ǎ̱w nás kila bɨrmɨ́ta–sí nyíŋi áláŋ ma̱sɨ̂gkwǎ–sí kíeŋa–sí á itabba ásáŋ ma̱sɨ̂gkwǎ taga kila bɨrmɨ́ta–sí kányíŋíal alá jányíŋi kóeli. ¹⁷ Na ma̱sɨ̂gkwǎꞌŋ ta̱bʉŋa asá ma̱sɨ̂gkwwǎ–sí tullé ta̱bʉ́ŋ káwítía, áláŋ ǎ̱w ná ba̱gɨjáaꞌŋ ge na ǎ̱w nás dʉ́léŋá tullé keréŋéli. Na galla kila kwa alá táárí tokké sá̱w kawe áláŋ Belétullê–sí tawrá kawía nás ǎ̱wsas káwlítía. ¹⁸ Ɨdɨ̂ɨ́ŋ ná Wʉ́oꞌŋ Domboreŋa Toy in beléŋá, "Jɨ́ nuuŋ–sí ga̱mbʉt ʉtó as jaaba alá dɨɨroŋꞌíŋ írí ɨloŋ áláŋ kaaŋ lá̱ddɨ́," na Táárídʉŋo in lóŋ áláŋ kééŋ ddʉléŋá bǎ̱w." ¹⁹ Illa da̱lɨ́me as jɨɨba alá ma̱sɨ̂gkwǎꞌŋ ta̱bʉ–sí írí ka̱bɨ́tɨ́aba, bás délliŋ illa da̱lɨ́me–sí jɨɨn asá kʉ́ŋɨ́kwǎ kwa a̱w wala gal ɨɨs kee. ²⁰ Na kwa kila–sí ǎl kɨtɨ́eŋa kawe bá ǎ̱w ná kwa nyétꞌiŋ ta̱bʉ́ŋ gúrgúreŋ káwa, na in bá illâíŋ–ii áláŋ kwa kerŋa–sí ka̱lɨ tɨ̌ɨ. ²¹ Ká jɨ–sí Wʉ́o na Jáásodʉŋo Ísa na melega kila ǎl ka̱á̱ŋʉlꞌíŋ dair–lé gi núrgú anni áláŋ kin ǎ̱wsaŋa jǎ̱ɨ. Kwa nnyét–sí kí dóŋá tog jǎ̱ɨ na kerker ás jáaba. ²² Na kájíleŋ a jeeŋba áláŋ kɨ́ɨ́ŋ koŋa dʉóꞌŋ írí jaa ná Loŋpii–sí janí áláŋ ma̱sɨ̂gkwǎꞌŋ ta̱bʉ eeŋ, na kí kwaŋ kɨ́eŋ ka̱tɨ́eŋa sá̱dɨ́geŋ as beeŋba. Dɨ́ɨ́ŋ suur–sí ser jǎ̱ɨ' ²³ Koro délliŋ á ja̱bʉŋba, maraŋ koro itâ dǐŋa jaam áísáŋ ddɨo nʉŋꞌíŋ jáwni–lé nyiítía, illâíŋ náis jɨ–sí saa ɨreli. ²⁴ Kwa dǐŋaꞌŋ ka̱tɨ́eŋa téyyân lóŋítía ná yeeŋ–sí míŋ ássâ ja̱nɨ́onaa keréŋéli ná jansaꞌŋ tin ás táanaba. Maraŋ kwa kerŋaꞌŋ ka̱tɨ́eŋa bá lia lóŋítía . ²⁵ Na kí illa dorá tág tááríŋá tulléŋa dog bát táárásiŋ lóŋítía, namaŋ kila ǎl kɨt gé alá tullé á lóŋítíaba, á síŋ jʉ́ʉ́lɨ́aba.