¹ Kʉo Teyyáŋa térriŋ in beléŋá soga ka̱rɨkwǎ–le kwa dǐi áláŋ seejǎ̱ɨ–lé ka̱rɨŋa kellol, námá kɨ́eŋ sǔrŋá–sí kabe ná Kʉo jɨttɨŋa–sí alá kwa–sí júúleŋ pɨe na ányádɨɨŋaꞌŋ gʉʉd–sí kannía . ² Gʉʉda kininiŋ kí júúlejáaꞌŋ pɨ́ekwǎꞌŋ dorá ʉ́ndʉla . Dɨ́eŋ kilmáꞌŋ tɨyyɨŋ in wia inná alá kí dáwrá tokkê kʉ́yé . ³ Yeeŋ kwa–sís kaareli ás'ŋ yáaŋa kannía naŋ dog kwa–sí nʉŋ dǐi–lé keseli alá Wʉ́o tééré áláŋ kila kwa alá see kééli na asá ʉʉ́ŋsee kalŋa kí assójáa kaame . ⁴ Ilâíŋ ná a̱rɨ bi a̱rɨ–sí ná Wʉ́o tééré bá tullé–ii náŋ a̱rɨ á keba áláŋ kaareli abás kwa kí assójáa kɨtɨ́rɨ́ŋtɨ́a, ⁵ Ɨdɨ̂ɨŋ ná yé kí Wʉ́oꞌŋ belé na assójáaꞌŋ jʉ̌ʉm teyyá eŋa. ⁶ Abás jɨ́ bârŋa–sí kin ótá jiímel, jɨ́ báŋ Jáásodʉŋo Ísaꞌŋ táárídʉŋo tullê jaŋ, inná ǎl kí seejǎ̱ɨꞌŋ belé na kí gʉʉd tullê jʉrnyɨ́ŋ, illa ǎl jɨ́ ka̱rɨ jʉ́lo . ⁷ Ná áldíŋá jʉ́rʉsa na aldíŋá hǒoŋa–lé ka̱rɨŋa jelló, bá mááŋ ǎ̱w ná dɨ́ɨ́ŋ suur–sí ta̱gɨŋ–lé jɨgé. ⁸ Illâíŋ ná suurꞌíŋ jʉ́skʉ́ŋó nisil–sí ittî kee, maraŋ ta̱gɨŋ ótá nyét–lés nisil kee. Yé kí nisila gís jesel in jaiŋ–lé na illa jaiŋ ǎl ʉ́ndʉl. ⁹ In belé ǎl ká ássândiŋ waa seekʉŋo–ii naŋ nyéttiŋ jɨɨnꞌíŋ–ii . ¹⁰ Kí see inꞌíŋ ʉʉꞌŋ–ii ná Kɨ́ tokké sá̱w táárí kaw na kaŋ ná tokké sá̱w kúnyiŋ, illǎíŋ ná ká dáíŋ já̱ɨ́go nyét Wʉ́o sállâ–lé kaá ǎl kwa nyétꞌŋ jopódʉŋo–ii na galla kila kwaꞌŋ ǎl ye–sí see kééli. ¹¹ Seejǎ̱ɨkwǎ–sí kin ǎ̱wsaŋas jáwli aísa jɨɨ rimmeŋ áa, na núrgú janni áláŋ indála kawe . ¹² A jundíba áísáŋ kwa nʉ́ŋɨ keépeli, ilâíŋ âl Jɨ́ kwě ittî jaŋ, maraŋ seejǎ̱ɨkwǎ–sís kí dɨ́ɨ́ŋ belé na amal na joiŋí na seejǎ̱ɨ na sɨrrɨŋ mitíl jeeŋ. ¹³ Namaŋ níŋ ká á̱ɨ́ŋa dɨ́ɨ́ŋ tin na kʉrro Wʉ́oꞌŋ domboreŋa Toyyaꞌŋ a̱rdɨŋ–si janí, ná Wʉ́oꞌŋ belé–sís kwa–sí dééŋ arrá jeréŋél, na kwa–sís gʉʉd jáwliti . ¹⁴ Kʉoꞌŋ dol–sí nʉ́ŋɨ́ as jǎaba illa alá dɨ́ɨ́–le kee aíla jɨɨ kaníe tin–lé alá domoŋkwǎ kɨ́rsɨ́ŋʉl na ma̱sɨ̂gkwǎꞌŋ ta̱bʉŋ kɨ́eŋ koŋa dɨ́ɨ́ŋ írí kayé. ¹⁵ Kin ʉ́tóŋá–sís táárí táráásiŋ jáa, dɨ́ɨ́ŋ suur nyét kin ʉ́tóŋá–sí janí, illâíŋ áláŋ dʉó bi dʉó dɨ́ɨ́ŋ jʉtʉ́móŋó já̱gɨ́l. ¹⁶ Dɨ́ɨ́ŋ jaiŋꞌíŋ dorá–lé na dɨ́ɨ́ŋ gʉʉd–lé báal jaa. Bá â̱w ná kin ʉ́tóŋá–sí jaw, illâíŋ ná abá kin ʉ́tóŋá–sí jaw, jɨ́ bá síŋ dɨ́ɨ́ŋ suur–sí jopó na kila kwa ǎl dɨ́ɨ́ŋ belé kelkaame.