¹ Na kwa kila ǎl koya gé, ǎ̱w nás in kalŋa kɨ́eŋ sagala âl ba̱gɨjáa nyétꞌíŋ ge, áláŋ dʉó á keba ná Wʉ́oꞌŋ konaꞌŋ na dáíŋ gʉʉdꞌíŋ írí kí jɨttɨŋ rísiŋ . ² Kwa kɨt asá sagala kila ka̱ɨŋ ǎl Jáásodʉŋoꞌŋ ka̱rɨjʉ́lokwǎ ge kɨ́eŋ sagala–sí ba̱gɨ ittí a kaweba illâíŋ ná yeeŋ bǎrŋa gé. Mááŋ bá in lóŋ ásáŋ yeeŋ–sí táárí tullé káwa,ɨdɨ̂ɨ́ŋ ná kwa kɨt asá dɨ́eŋ táárí illa–lé bora kaame bá dog seejǎ̱ɨkwǎ ge, naŋ kondóŋá ge . Kwa–sí kin ǎ̱wsaŋaꞌŋ gʉʉd–si jáwlíti na dɨ́e kʉrro suŋŋâ janni. ³ Abá dʉó kee nás seejǎ̱ɨŋa korroŋa páálíti, na yé dáíŋ Loŋpii Ísa Jáásodʉŋoꞌŋ seejǎ̱ɨŋa tulléŋa na gʉʉdꞌíŋ jáwli asá kí ta̱gɨŋ áámíŋá–sí ás tɨɨnelba, ⁴ yé bá dʉó illa–ii asá dʉŋʉrɨŋ suúr suŋá eŋa ná a̱rɨ togꞌíŋ arrá á rééŋélba. Dééŋ kilmá bá rúbbâ–ii ná kóel áláŋ najʉrʉjɨŋ na guldaŋa pii. Na in namá yé–ii nás kilmáꞌŋ pʉkkɨŋ na kórŋá na ŋanyiŋa na gǐlaŋa jɨttɨŋa ʉ́ndʉl, ⁵ na guldaŋa alá á kɨɨréliba alá kila kwa–lé ʉ́ndʉla na asá ta̱bʉŋa jɨttɨŋa ka̱ɨŋ na ʉʉ́ŋsee–sí kɨe. yeeŋ kɨ́eŋ ta̱bʉŋa–lé in kawrítía ta̱gɨŋ âl dorá tullê–ii ásáŋ kíe nisil joomíti. ⁶ Kí see ta̱gɨŋ asá kí giina la̱ddɨŋʉl nisil appâ–ii. ⁷ Ɨdɨ̂ɨ́ŋ ná kɨ́ da̱ldɨŋ–lé a̱rɨ tog dog ás kélaba, walá taga déé–le a̱rɨ tóg dog áŋ kabúŋba . ⁸ Naa abás na̱mɨ́e na jʉrɨŋa kaiŋ, kɨ́ kila ótá–sí ásáŋ bá kí giina kɨbɨ́tɨ. ⁹ Maraŋ kwa ǎl kǒel áláŋ kawája kɨŋɨ bá jʉ́go–lé na zárgán káwítía na ŋa̱a̱nyɨŋa jɨttɨŋ na ʉllɨŋ suŋŋâ–lé káwítía kila asá kwa–sí pááneŋjeeŋ na jáásíŋo asitóg–le dúítía. ¹⁰ Illâíŋ ná soŋgoŋaꞌŋ joiŋi táásíŋá jɨttɨŋaꞌŋ órreŋá nyétꞌíŋ dɨɨ́ŋ–ii kwa dǐi ka̱ɨŋ na sôŋgoŋaꞌŋ suŋá kallíŋá, ná seejǎ̱ɨ–lé karra kawŋíe ná sǔrŋa–sí kilmaŋa kí pendeŋa suŋŋâ ká̱wyé.' ¹¹ Maraŋ yédʉé, jɨ́ ǎl Wʉ́oꞌŋ jaŋ, kila ʉ́tóŋá nyét–le ka̱rɨŋa jelló, ná kin dǐŋa–sí ka̱rɨ jʉ́lo, wa̱rɨgɨŋ na ta̱gɨŋ na seejǎ̱ɨ na joiŋi na jɨrmó na bʉgʉlɨŋ. ¹² Seejǎ̱ɨꞌŋ deer tullêkwaŋ jééro. jaiŋ lʉʉt–sí pʉ́ttôn jǎ̱ɨ. jɨɨ ka̱á̱ŋʉl gí ásáŋ jaiŋ lʉʉt illa tin–lé alá kʉ́ŋɨ́kwǎ suŋŋâꞌŋ ta̱bʉ́ŋ dɨ́ɨ́ŋ seejǎ̱ɨ tawrá jawí. ¹³ Na ká jɨɨ gi wásseŋ aw Wʉ́oꞌŋ dair–lé ǎl ótá nyét–sí jaiŋ ínni, na Jáásodʉŋo Ísaꞌŋ dair–lé ǎl Pontas Pilatꞌíŋ ta̱bʉ́ŋ dééŋ seejǎ̱ɨ tawrá jáwi, ¹⁴ áláŋ in dáálí–si ba̱gɨ jáa ná síŋ korroŋ wala gal jáwyía á jiaba namaŋ níŋ illa soog páágó ǎl dáíŋ Loŋpii Ísa Jáásodʉŋo lóŋíti . ¹⁵ Na dééŋ jalŋiŋo–sí ásáŋ illa tin tág–le Wʉ́o éla. Na yé mʉjjé jáaꞌŋ–ii na kuri bá délliŋ yé–ii naŋ ábakuri–ii naŋ sagalaꞌŋ Loŋpii–ii. ¹⁶ Dʉó bá délliŋ yé–ii ná á wa̱ɨtelba na yé lóóteyyâ–lé kee illa alá dʉó tóg dog taga dééŋ dakki á síŋ jɨ́gɨ́ŋɨ́ba. Dʉldɨ á keba ná tóóríg yee já̱gɨ́la wala gal áláŋ taga já̱gɨl. Na ǎ̱w ba̱gɨ na kʉrro lʉʉta ná kééŋ ge Ee yáa. ¹⁷ Kila kwa–sí wásseŋ jáa ǎl in da̱ldɨŋ–lé kwaája gé áláŋ kandaga kundía na áláŋ dɨ́eŋ já̱ɨ́go ka̱wajɨŋ–lé á kawrítíaba, illa asá péllét jaluŋ á keba, maraŋ ásáŋ Wʉ́o–lé koŋa kuúgeli ǎl a̱rɨ bi a̱rɨ–sí suŋŋâ ínni áíláŋ kilmaŋa sɨmmó ɨŋɨ. ¹⁸ Na dog wásseŋ jáa ná ʉ́yóŋá tulléŋa suŋŋǎ káwa ná kítááríŋá tulléŋa kawája kɨŋɨ, na áláŋ janíkwǎ ge na kí kilmá kǒeli áláŋ kí kwaŋ ótáŋá keŋgereli. ¹⁹ Naa kí in dorá yeeŋ ásáŋ kɨ́eŋ sǔrŋa–sí máala gʉ́bʉ́l kaye, áláŋ soga ta̱bʉkwǎꞌŋ ebede ka̱kkɨ́re–ii .Na liáŋ áláŋ illa jaiŋ–sí pʉ́ttôn kěyal alá seekʉŋo–ii ²⁰ Hái Timos illa a̱rɨ–sís jáano aíla dóŋa kayé. Beléŋá jʉ́rʉ́sa na ʉllɨŋꞌíŋ gorreŋaꞌŋ oró juró,kila ǎl kwa kí dorá korroŋ gʉʉd ka̱rɨ́a. ²¹ Kwa dǐi namás illa gʉʉd–sí kɨɨne, indálaŋ namá seejǎ̱ɨ–lé kʉrʉl ná kʉ́ŋe.Â̱w tʉllɨŋ ná kíeŋ baŋ Ee yáa.