¹ Onoŋo bene aneno buk adola tye i ciŋ ŋat ma obedo i wi komker-ri tuŋ lacuc, ma gicoyo woko ducu ryoryo, tuŋ iye wa ki tuŋ ŋeye bene, dok gimwono ki ginanena abiro. ² Dok aneno lamalaika mo matek twatwal ma onoŋo tye ka tito lok ki dwan maloŋo ni, “Aŋa ma myero me yabo buk adola-ni, ki me yabo ka ma gimwono kwede woko?” ³ Pe tye ŋat mo i wi polo, kadi i wi lobo, kadi piny i te lobo ma twero yabo buk adola-ni kadi wa neno iye bene. ⁴ Ci akok matek pien pe ginoŋo ŋat mo ma myero me yabo buk adola nyo kadi me neno iye. ⁵ Cutcut ŋat acel i kin ludoŋo owacca ni, “Pe ikoki. Nen, Labwor ma i kaka me Juda, Lwit yat pa Daudi, en aye doŋ oloyo, pi meno en twero yabo buk adola ki yabo ginanenane abiro ma gimwono kwede-ni woko.” ⁶ Lacen dok aneno Latin romo ma ocuŋ i kin komker ki lee makwo aŋwen ki i kin ludoŋo, nen calo doŋ gineko woko. Onoŋo tuŋe tye abiro, ki waŋe bene tye abiro, ma gin cwiny pa Lubaŋa abiro, ma en ocwalo i wi lobo ducu. ⁷ Ci en ocito okwanyo buk adola woko ki i ciŋ ŋat ma onoŋo obedo i wi komker ma onoŋo omako tuŋ lacuc-ci. ⁸ I kare ma doŋ en okwanyo buk adola-ni woko, ci lee makwo aŋwen-ni ki ludoŋo pyeraryo wiye aŋwen-ni guryebbe piny i nyim Latin romo, kun ŋat acel acel i kingi omako naŋa, ki atabo jabu ma gupoŋ ki odok eceta, ma en aye lega pa jo pa Lubaŋa. ⁹ Ci gubedo ka wero wer manyen ma waco ni, “In imyero me kwanyo buk adolani, ki me yabo ginanena ma gimwono kwede, pien yam gineki woko, dok pi remoni ikoko dano pi Lubaŋa, ma gua i kaka mapol mapatpat, ki i leb ki rok mapatpat ducu, ¹⁰ ilokogi gudoko lwak pa Lubaŋa ma en loyo, ma gin aye doŋ ajwagi ma gitiyo bote, gin bene gibiloyo lobo.” ¹¹ Ka dok aneno, ci awinyo dwan lumalaika ma welgi pe kwanne, alip ki alip, ma gurumo komker woko, ki lee makwo ki ludoŋo, ¹² kun giloko ki dwan maloŋo ni, “Latin romo ma gineko-ni en aye ma myero me noŋo twero, lonyo, ryeko ki teko, woro ki deyo kacel ki pwoc!” ¹³ Ka dok awinyo ginaketa ducu ma tye i polo, ki i wi lobo, ki piny i te lobo, ki ma gitye i nam-gu ki gin ducu ma tye iye, ma giloko ni, “Pwoc ki woro ki deyo ki twero obed nakanaka bot ŋat ma obedo i wi komker, ki bot Latin romo!” ¹⁴ Ci lee makwo aŋwen-ni gugamo ni, “Amen!” cutcut ludoŋo guryebbe piny guworo Lubaŋa ki Latin romo.