¹ Lacen aneno Latin romo oyabo kabedo acel ka ma onoŋo gimwono ki i kin kabedo abiro-ni, ci awinyo lee acel ki i kin lee makwo aŋwen ca oloko ki dwan macalo mor kot ni, “Bin!” ² Ka dok aneno aguragura matar, ki ŋat ma ŋweco kwede onoŋo omako atum. Gimiye lalukana, ci en ocito woko kun loyo lweny, dok bene ni wek ebed ka loyo lweny. ³ Ka doŋ oyabo ka ma gimwono me aryone, ci awinyo lee makwo me aryone ka loko ni, “Bin!” ⁴ Cutcut aguragura mukene makwar adada oa ki woko obino odonyo; ŋat ma ŋweco kwede gimiye twer me kwanyo kuc womo ki i wi lobo, wek dano gubed ka nekke kekengi, dok bene gimiye pala lucwan madit me lweny. ⁵ Ka oyabo ka ma gimwono me adekke, ci awinyo lee makwo me adek ka loko ni, “Bin!” Cutcut atugi neno aguragura macol; onoŋo ŋat ma riŋo kwede omako mijan i ciŋe. ⁶ Lacen dok awinyo dwan ma oa ki i kin lee makwo aŋwen-ni kun loko ni, “Ŋano agwata acel welle ciliŋ abic, cayiri agwata adek welle ciliŋ abic ento moo ki koŋo vino pe ibalgi!” ⁷ I kare ma dok oyabo ka ma gimwono me aŋwenne, ci awinyo lee makwo me aŋwenne ka loko ni, “Bin!” ⁸ Ka dok aneno aguragura ma obedo kibworo, ŋat ma ŋweco kwede onoŋo nyiŋe To, kun Lyel onoŋo lubo kore. Omiyogi twero i kom dul lobo acel me aŋwen me neko dano ki pala lucwan, ki kec, ki two gemo, ki lee tim mager. ⁹ I kare ma oyabo ka ma gimwono me abicce, aneno tipo pa jo ma ginekogi pi lok pa Lubaŋa ki pi bedo caden me lok meno; aneno tipogi tye i te keno tyer. ¹⁰ Gukok ki dwan maloŋo ni, “Ai Rwot Madit, Rwot maleŋ ki me ada, abitero kare ma rom mene ma noŋo peya iŋolo kop, dok ma noŋo peya iculo kwor me remowa i kom jo ma bedo i lobo?” ¹¹ Ci gimiyo jor matar bot ŋat acel acel, ka gicikogi ni pud koŋ doŋ guywe pi kare mo manoknok, nio waŋ ma wel lutic wadigi ki utmego ma gibinekogi calo gin ocobbe kakare. ¹² I kare ma en oyabo ka ma gimwono me abicelle, aneno, ci nen, oyeŋyeŋ oyeŋo lobo matek twatwal, omiyo ceŋ ocido woko macol lucuc calo boŋo cola, ki dwe odoko kwar calo remo. ¹³ Lakalatwe me polo guo woko piny lirutrut calo nyig yat oduro me cwir ma poto ki i jaŋe ka yamo ma okodo matek oyeŋo. ¹⁴ Ci polo bene orwenyo woko liweŋ calo karatac ma gidolo, kadi ki got ki cula nam gikobogi woko ducu ki ka-kargi. ¹⁵ Ka doŋ luker me lobo, ki jo ma pigi dito, ki ludito me mony ducu, lulonyo ki wegi twero ki jo ducu ma i wi lobo, opii ki jo ma gilone kengi, gukanne woko i boro ki i kin got mubar ma i godi ducu, ¹⁶ kun giwaco bot godi madoŋo ki godi matino ni, “Wupot i komwa ci wuumwa woko ki i waŋ ŋat ma obedo i wi komker, ki i akemo pa Latin romo; ¹⁷ pien nino madit me akemogi doŋ oo, ci aŋa ma bitwero cuŋ iye?”