¹ Lacen ka man otum, dok aneno doggola mo i polo ma onoŋo tye twolo. Doŋ dwan mukwoŋo ma onoŋo awinyo obedo ka lok kweda calo koko tum-mi, owacci, “It ibin malo kany, ci abinyutti gin ma bitimme lacen i ŋe man.” ² Cutcut Cwiny Maleŋ oyuto tamma woko, ci aneno komker ma gicibo i polo, ma dano mo onoŋo obedo i wiye. ³ ŋat ma onoŋo obedo i wi komker ca onoŋo ryeny calo got me wel matarre ki makwarre, ki danyu ma nen calo emeradi orumo komker woko dyere. ⁴ Ka dok komker mukene pyeraryo wiye aŋwen orumo komkerre woko dyere, ki ludoŋo pyeraryo wiye aŋwen bene gubedo i wi komker magi, ma guruko boŋŋi matar, kun gurwako bene lalukana me jabu me deyo i wigi. ⁵ Onoŋo tye gin mo ma wil awila calo lutkot ki i kom komker-ri, ki dwan mapol winnye iye, ki gin ma mwoc amwoca calo mwoc pa kot. I nyim komker onoŋo tye iye dog mac raa abiro ma tye ka lyel, ma gin aye cwiny pa Lubaŋa abiro. ⁶ Ka dok aneno i nyim komker meno onoŋo tye iye gin ma nen calo nam me kiyo maleŋ calo gweŋ ma mil amila. Dok lee makwo aŋwen gurumo komker woko dyere i ŋete tuŋŋi ki tuŋŋi, waŋgi pol ma mogo tye tuŋ i nyimgi ki mogo tye yo tuŋ i ŋegi. ⁷ Lee makwo mukwoŋo onoŋo nen calo labwor, ki me aryone onoŋo nen calo twon, lee makwo me adekke waŋe nen calo waŋ dano, ki lee makwo me aŋwenne onoŋo nen calo ocur ma tye ka tuk. ⁸ Doŋ lee makwo aŋwen-ni onoŋo lee acel acel bwome tye abicel, ma waŋgi noŋo pol ata, muromo komgi woko ducu ki yo tuŋ woko wa ki yo tuŋ i iye bene. Dyeceŋ ki dyewor pe giweko wer ni, “Rwot Lubaŋa Matwero-ducu leŋ, leg dok leŋ, en ŋat ma yam tye con, koni tye, dok bibino!” ⁹ I kare ducu ka lee makwo-gu gimiyo deyo ki woro ki pwoc bot ŋat ma obedo i wi komker ca, ma bedo kwo nakanaka,, ¹⁰ ci ludoŋo pyeraryo wiye aŋwen-ni giryebbe piny i nyim en ŋat ma obedo i wi komker ca, ci guworo en ŋat ma bedo kwo nakanaka-ni; dok gubolo lalukanagi i nyim komker kun giwero ni, ¹¹ “Rwotwa ki Lubaŋawa, in imyero me noŋo deyo ki woro ki teko, pien in aye ma yam iketo jami ducu, dok bene pi mitti omiyo gubedo tye, meno aye gin mumiyo yam giketogi.”