¹ “Bot lamalaika pa lwak muye an ma gitye i Cardic co kit man ni, “ ‘Man lok pa ŋat ma tye ki cwiny pa Lubaŋa abiro, ki lakalatwe abiro. “‘Aŋeyo ticci ducu; itye ki nyiŋ me bedo kwo, ento doŋ ito woko. ² Co woko ci ijiŋ gin ma pud odoŋ boti-ni obed tek, ma doŋ cok to-ni; pien anoŋo pe icobo ticci mo kakare i nyim Lubaŋana. ³ Doŋ ipo i kom gin ma ilimo ki ma iwinyo; gwok gin meno ento iŋuti. Ka ce pe ico, ci abibino boti macalo lakwo, ma in pe iŋeyo cawa ma abibino kwede i komi. ⁴ Kadi bed kumeno, pud itye ki jo mogo manoknok i Cardic ma peya gunywano boŋŋigi ki cilo. Gibiwoto kacel kweda ma noŋo guruko boŋŋi matar, pien gin aye gimyero. ⁵ ŋat ma oloyo gibiruko kit meno ki boŋŋi mater, dok bene pe abijwayo nyiŋe woko ki i buk me kwo. Abituco nyiŋe i nyim Wora, ki i nyim lumalaikane. ⁶ ŋat ma ite tye myero owiny lok ma Cwiny Maleŋ oloko bot lwak ducu ma guye an.''' ⁷ “Bot lamalaika pa lwak muye an ma gitye i Piladelpia co kit man ni, ⁸ “‘Man lok pa ŋat maleŋ ki me ada, ma en aye tye ki layab pa Daudi, en ŋat ma ka oyabo ci ŋat mo pe dok loro, ka oloro, ci ŋat mo bene pe dok yabo. ‘Aŋeyo ticci ducu. Nen, doŋ atyeko cibo doggola ma oyabbe woko i nyimi, ma ŋat mo pe twero lorone. Aŋeyo ni tekoni nok, ento kadi bed kumeno, doŋ imako lokka, dok bene pe ikwero nyiŋa. ⁹ Nen, abimiyo lwak me dul pa Catan, jo ma yam gubedo ka cayi ma giwaco ni gin Lujudaya, kun i adane gin pe Lujudaya, ento giloko lok goba, nen, abimiyo gibino giryebbe piny i te tyeni, wek guniaŋ ada ni an amari. ¹⁰ Pien imako lokka me diyo cwiny i ciro can, an bene abigwoki maber i kare me omo cwiny, ma tye ka bino i kom wi lobo ducu, me temo jo ma bedo i wi lobo-ni. ¹¹ Abebino oyotoyot. Mak gin ma itye kwede-ni matek likiŋ, wek ŋat mo pe oma lalukanani woko. ¹² ŋat ma oloyo, abimiyo doko wir i ot pa Lubaŋana, pe bia kato woko ki iye. Abicoyo nyiŋ Lubaŋana, ki nyiŋ gaŋ pa Lubaŋana i kome, Jerucalem manyen ma bia ki i polo bot Lubaŋana bibino piny, dok bene ki nyiŋa kikome manyenne. ¹³ ŋat ma ite tye myero owiny lok ma Cwiny Maleŋ oloko bot lwak ducu ma guye an.’ ¹⁴ “Bot lamalaika pa lwak muye an ma gitye i Laodikia co kit man ni, “‘Man lok ma oa ki bot Amen, ma en aye caden ma genne ki me ada, gin ducu ma Lubaŋa oketo yam ocakke ki i kome. ¹⁵ “‘Aŋeyo ticci ducu. Pe iŋic, dok bene pe ilyet. Onoŋo twero bedo ber ka nene ibedo ŋic nyo lyet! ¹⁶ Doŋ kit macalo onoŋo ibedo mormor, pe ibedo ŋic dok bene pe ibedo lyet, abiŋuli woko ki i doga. ¹⁷ Pien in doŋ iwacci, “An alony, doŋ atye ki gin ducu ma miyo abedo ki kwo maber, gin mo pe ma doki amito.” Ento kun pe iŋeyo ni in aye ŋat ma piny doŋ oloyo atika, ma imiyo kica mako dano i komi twatwal, in lacan, waŋi oto woko, dok bene ibedo munero. ¹⁸ Pi meno amiyo ryeko boti me wilo jabu maleŋ ma giliyo woko maber ki mac ki bota, wek omi idok lalonyo. Wil bene boŋŋi matar ki bota me arukani wek ium ki lewic me bedoni munero wek pe doŋ onen, ki yat mo bene me wiro waŋi, wek inen piny. ¹⁹ Agoyo jo ma an amarogi, apwonyogi dok atirogi; pi meno ket tek iŋut woko. ²⁰ Nen, acuŋ i doggola kun adwoŋo. Ka ce ŋat mo owinyo dwana ci oyabo doggola, abidonyo bote ka acamo cam kacel kwede ki en bene camo kacel kweda. ²¹ ŋat ma oloyo, abimiye twero me bedo kacel kweda i wi komkerra, kit macalo an bene doŋ aloyo ci abedo kacel ki Wora i wi komkerre-ni. ²² ŋat ma ite tye myero owiny lok ma Cwiny Maleŋ oloko bot lwak ducu ma guye an.’ ”