¹ “Bot lamalaika pa lwak muye an ma gitye i Epeco co kit man ni, ‘Man lok pa ŋat ma omako lakalatwe abiro i ciŋe tuŋ lacuc, ma tye ka wirre i dye okar-mac abiro. ² “Aŋeyo ticci ducu, kit ma icanne kwede ki kit ma idiyo kwede cwinyi. Aŋeyo bene kit macalo pe itwero ciro kwede tim pa jo maraco, ento itemo jo ma gilwoŋŋe kengi ni gin lukwena, kun gin gigi pe lukwena, mumiyo bene doŋ inoŋo ni gin lukwena ma lugoba. ³ Aŋeyo itye ka diyo cwinyi, kun iciro can pi nyiŋa, dok bene pud pe iol giri. ⁴ Ento atye ki lok man i komi, pien doŋ iweko mar ma onoŋo yam itye kwede mukwoŋo ca-ni woko. ⁵ Koŋ ipo kit macalo onoŋo ipoto kwede i kabedo mamalo ma yam io iye-ni, ka doŋ iŋut, ci icak tiyo gin ma onoŋo ibedo ka tiyone i kare mukwoŋo ca. Ka pe iŋut, abibino boti ci akwanyo okar-macci woko ki i kabedone. ⁶ Gin maber ma onen boti en aye ni, idag tic pa jo Nikolaiti ma an bene adagi-ni. ⁷ ŋat ma ite tye myero owiny lok ma Cwiny Maleŋ oloko bot lwak ducu ma guye an. Abimiyo ŋat ma oloyo camo yat me kwo ma tye i poto pa Lubaŋa.’ ⁸ “Bot lamalaika pa lwak muye an ma gitye i Cumurna co kit man ni, “‘Man lok pa ŋat mubedo mukwoŋo ki me agikkine, ŋat ma yam oto ka dok ocer woko odoko kwo-ni. ⁹ “Aŋeyo kit ayelayela ducu ma itye ka cirone, ki can lim bene ma itye kwede (ento in ilony). Aŋeyo bene yet pa jo ma giwaco ni gin Lujudaya, kun i adane gin pe Lujudaya, ento gin gubedo lwak me dul pa Catan. ¹⁰ Pe ilwor can ma bipoto i komi. Nen, Catan bikwanyo jo mogo ki i kinwu bologi woko i mabuc wek etemwu. Gibibedo ka yelowu pi nino apar. Bed dano ma lagen nio wa i to, ci doŋ abimiyi tok me deyo me kwo. ¹¹ ŋat ma ite tye myero owiny lok ma Cwiny Maleŋ oloko bot lwak ducu ma guye an. Ŋat ma oloyo, to me aryo doŋ pe biketo arem i kome.’ ¹² “Bot lamalaika pa lwak muye an ma gitye i Pergamo co kit man ni, “Man lok pa ŋat ma tye ki pala lucwan mabit ryoryo. ¹³ '‘Aŋeyo ka ma ibedo iye, ka ma kom pa Catan tye iye. In giri imako nyiŋa woko matek likiŋ, pe ikwero niyeni i koma, kadi ki i kare pa Antipac ma obedo cadenna me ada, dano ma lagen ma yam gineko i kinwu, ka ma Catan bedo iye. ¹⁴ Ento atye ki lok mogo manoknok i komi, pien itye ki jo mogo kunnu ma gumako pwony pa Balaam, ma yam opwonyo Balak me keto ariya i nyim jo Icrael wek gupot i bal, kun obitogi ni gucam riŋo ma gityero bot jogi, ki me timo tim tarwaŋ. ¹⁵ Kit meno, in bene itye ki jo mogo ma gumako pwony pa jo Nikolaiti. ¹⁶ Ka ce pe iŋut, ci abibino boti oyotoyot, ka doŋ alwenyo kwedgi ki pala lucwan me doga. ¹⁷ ŋat ma ite tye myero owiny lok ma Cwiny Maleŋ oloko bot lwak ducu ma guye an. ŋat ma oloyo abimiye manna moyo ma onoŋo gikano woko, abimiyo got matar bene bote, ki nyiŋ manyen ma gicoyo i kom got meno ma ŋat mo pe ŋeyo, kono en ŋat ma gamo ni keken aye ŋeyo.’ ¹⁸ “Bot lamalaika pa lwak muye an ma gitye i Tuatira co kit man ni, “Man lok pa Wod pa Lubaŋa ma waŋe calo leb mac ma lyel, ki tyene ducu calo mola ma girudo maleŋ adada. ¹⁹ “Aŋeyo ticci ducu, mar ma itye kwede, niyeni ki ticci me konyo dano, ki kit ma idiyo kwede cwinyi. Aŋeyo ni ticci ma kombeddi itye ka tiyone kato me kare mukwoŋo ca. ²⁰ Ento atye ki lok man i komi, pud iweko dako ca, Jejebel, ma lwoŋŋe kene ni en lanebi-ni, kun tye ka pwonyo luticca miyo giŋak woko i yo me tim tarwaŋ, ki camo riŋo mogo ma noŋo doŋ gityero woko bot jogi. ²¹ Onoŋo amiyo bote kare me ŋut, ento en okwero ŋut i tim tarwaŋe-ni. ²² Nen, abibolo dako-nu i wi kitanda ma noŋo two marac, pacogge bene abibologi woko i can madit atika, ka pe guŋut, gukwero lubo tim tarwaŋ pa dako-nu. ²³ Abineko litinone woko bene, wek lwak ma guye an i kabedo ducu guŋe ni an aŋiyo cwiny dano wa ki tamgi, dok abimiyo bot dano acel acel i kinwu gin ma lubo kit tic ma en otiyo. ²⁴ “Ento bot wun jo mukene ma wutye i Tuatira, ma pe wulubo kit pwony man, dok bene pe wupwonyo gin mo ma gilwoŋo ni ‘muŋ matut pa Catan’, doŋ atito botwu ni, pe doki abimiedo yec mo mukene botwu. ²⁵ Ento wumak gin ma wutye kwede-ni aye matek likiŋ, waŋ ma an adwogo. ²⁶ ŋat ma loyo, dok ma obedo ka tiyo ticca nio i agikki, abimiye twero me loyo lurok. ²⁷ En biloyogi ki odoo nyonyo, calo ŋat ma goyo agulu ŋidogi woko matitino, kit macalo an bene alimo twero ki bot Wora; ²⁸ an abimiye latwok bene. ²⁹ ŋat ma ite tye myero owiny lok ma Cwiny Malaŋ oloko bot lwak ducu ma guye an.’