¹ Lacen dok aneno polo manyen ki lobo manyen, pien polo mukwoŋo ki lobo mukwoŋo onoŋo doŋ gurwenyo woko, kadi wa nam bene onoŋo doŋ pe. ² Ci aneno gaŋ maleŋ, Jerucalem manyen, kun oa ki i polo bot Lubaŋa bino piny, ma giyubo woko macalo nyako ger ma gideyo pi cware. ³ Ci awinyo dwan mo maloŋo ma oa ki i komker kun wacci, “Nen, kabedo pa Lubaŋa doŋ tye bot dano. En bibedo kacel kwedgi, ci gin gibibedo jone. Lubaŋa kikome aye bibedo kwedgi, kun bene bedo Lubaŋagi. ⁴ En bijwayo pig waŋgi woko ducu. To bene doŋ bibedo pe, kadi kumo nyo koko, nyo arem, pien gin macon doŋ ducu gurwenyo woko matwal.” ⁵ Ci ŋat ma obedo i wi komker owacci, “Nen, aketo jami ducu doko nyen.” Ka dok bene owacci, “Co lok man, pien lok magi lok ma genne dok me ada.” ⁶ Ci owacca ni, “Doŋ otimme! An Alupa ki Omega, an acakki ki agikki. ŋat ma orwo neko, abimiyo mato pii me waŋ it me kwo laboŋo wel mo. ⁷ Meno aye mot ma ŋat ma oloyo binoŋo, ki an abibedo Lubaŋane, en bene bibedo latinna. ⁸ Ento jo ma lwor, ma pe gin lugen, lutim tim mogo me kwer, lunek dano, lutim abor, lutim tim jokjok, luwor cal jogi, ki jo ducu ma gin lugoba, gibinoŋo mot ma gipoko botgi i nam ma tye ka lyel mac ki gweŋ calfa; meno aye to me aryo.” ⁹ Ci malaika acel ki i kin lumalaika abiro ma onoŋo gitye ki atabo abiro ma gemo abiro me agikki tye i igi ca, obino oloko bota kun wacci, “Bin, anyutti Nyako ger, dako pa Latin romo.” ¹⁰ Cutcut otiŋa, otera woko wa i wi got mo madit mabor twatwal, kun onoŋo Cwiny Maleŋ doŋ oyuto tamma woko, ka onyutta Jerucalem, gaŋ maleŋ, ma oa ki i polo bot Lubaŋa bino piny. ¹¹ Jerucalem ma onoŋo tye ki deyo pa Lubaŋa. Onoŋo ryeny calo kidi me wel madit makato ducu, ma pe nen atata, calo jacipa, dok leŋ calo gweŋ ma mil amila. ¹² Celle onoŋo dit ocudo malo likuŋ, doge onoŋo tye apar wiye aryo. Lumalaika apar wiye aryo onoŋo gitye i dogcel ducu, dok bene i dogcel onoŋo gicoyo iye nyiŋ kaka apar wiye aryo pa jo Icrael. ¹³ Dogcel adek onoŋo tye yo tuŋ wokceŋ, yo tuŋ acam dogcel adek, yo tuŋ acuc dogcel adek, ki yo tuŋ potoceŋ bene dogcel adek. ¹⁴ Cel me gaŋ bene onoŋo tye ki te gutine apar wiye aryo, ci i komgi onoŋo tye iye nyiŋ lukwena apar wiye aryo pa Latin romo. ¹⁵ ŋat ma oloko kweda-ni onoŋo tye ki odoo lagada jabu me pimo gaŋ ki dogcel ki cel kikome. ¹⁶ Gaŋ meno onoŋo yam twoke tye aŋwen ma giromrom, borre rom ki lacce, ci opimo cel ki odoone, oromo mairo alip acel ki miya abic; borre ki lacce ki borre ma odok malo ducu gubedo rom. ¹⁷ En bene dok opimo cel, ci oromo futi miya aryo ki apar wiye abicel ka gipimo ki bad dano, kit macalo lamalaika opimo kwede. ¹⁸ Cel onoŋo gigero ki jacipa, ki gaŋ mere gigero ki jabu keken, ma noŋo nen maleŋ calo kiyo. ¹⁹ Te guti ducu me gaŋ onoŋo gideyo woko ki litino kidi me wel mapatpat. Mukwoŋo obedo kidi ma gilwoŋo ni jacipa, me aryo capir, me adek agat, me aŋwen emeradi, ²⁰ me abic onik, me abicel karnelian, me abiro kuricolit, me aboro berul, me aboŋwen topaj, me apar kuricoparac, me apar wiye acel jacint, me apar wiye aryo ameticito. ²¹ Gin me loro dogcel apar wiye aryo-ni onoŋo obedo tiko matar me wel apar wiye aryo, gin me loro dogcel acel acel gitiyo ki kit tiko-nu acel keken; yo ducu ma i gaŋ gipeto ki jabu keken, ma nen leŋ calo kiyo. ²² Pe aneno ot mo me woro Lubaŋa i gaŋ meno, pien ot me woro Lubaŋa ki kunnu en aye Rwot Lubaŋa Won Twer Ducu kikome, ki Latin romo. ²³ Ceŋ nyo dwe pe bimitte i gaŋ meno me ryeny iye, pien deyo pa Lubaŋa aye leŋo ma tye kunnu, ki tarane en aye Latin romo. ²⁴ Leŋo ma tye iye bimiyo rok ducu giwoto maber; ki luker ducu ma i wi lobo gibikelo deyogi iye. ²⁵ Pe gibiloro dogcelle i dyeceŋ, ki dyewor bene bibedo pe kunnu. ²⁶ Gibitero iye deyo ki lonyo pa rok ducu. ²⁷ Ento gin mo ma kome keni pe bidonyo iye, kadi ki ŋat mo ma timo gin me kwer, nyo gin me goba, ento kono jo ma nyiŋgi doŋ gicoyo woko i buk me kwo-ni keken.