¹ Ka dok aneno lamalaika mo oa ki i polo kun lor bino piny; onoŋo omako layab me bur ma tere pe gik, ki nyor mapek adada. ² Ci omako min kulu madit ca, ma obedo twol macon-ni, ma en aye Ladot dok Catan bene, ka otweye woko pi mwaka alip acel, ³ ci obole woko i bur ma tere pe gik, oloro dog bur woko, omwono woko bene kun oketo lanen i wiye wek pe dok omedde ki bwolo rok ducu, nio waŋ ma mwaka alip acel doŋ okato. I ŋe meno myero gigonye woko pi kare mo manoknok. ⁴ Lacen dok aneno kamker mapol, jo ma gubedo i wigi obedo jo ma onoŋo gimiyo botgi twero me ŋolo kop. Aneno bene tipo pa jo ma yam giŋolo ŋutgi woko pi miyo cadengi i kom Yecu ki pi lok pa Lubaŋa, gin jo ma yam pe guworo lee ca, nyo calle, dok bene ma yam pe guketo poyone i tur nyimgi nyo i ciŋgi. Gin doki gubedo kwo, gubedo ka loc kacel ki Kricito pi mwaka alip acel. ⁵ Jo muto mukene-gu ducu pe dok gubedo kwo, nio waŋ ma mwaka alip acel doŋ okato. Man aye cer mukwoŋo. ⁶ Tye ki gum ŋat ma bibedo i cer man mukwoŋo-ni, dok bene en dano maleŋ pa Lubaŋa kikome. Jo macalo meno, to me aryo pe tye ki twero mo i komgi, ento gin doŋ gibibedo ajwagi pa Lubaŋa ki pa Yecu, dok bene gibibedo ka loc kacel kwede pi mwaka alip acel. ⁷ Ka inen mwak alip acel doŋ otum, ci gibigonyo Catan woko ki i mabucce. ⁸ Ci en bikatti woko cito ka bwolo rok ducu ma tye i but piny, ma en aye Gog ki Magog, bicokogi bene pi lweny, jo ma welgi pe kwanne ma girom ki kweyo me dog nam. ⁹ Gumol gucito guket woko i wi lobo ka malac ci gurumo gony pa jo pa Lubaŋa ki gaŋ ma en maro-ni, ento mac oa ki i polo ci owaŋogi woko liweŋ. ¹⁰ Catan ma yam obwologi-ni bene gibolo woko i nam me mac ki gweŋ calfa ma mac oliyo, ka ma lee ki lanebi ma lagoba bene gitye iye ca; gibibedo ki arem nakanaka dyeceŋ ki dyewor. ¹¹ Dok aneno komker mo madit matar, ki ŋat ma obedo i wiye. Lobo ki polo gua ki i nyime guriŋo woko, ento pe dok ginoŋo kabedo mo pigi. ¹² Ci aneno jo muto, jo madito ki jo matino, kun gucuŋ i nyim komker, onoŋo bene tye kenyo buk mogo ma giyabo igi woko. Giyabo bene buk mo mukene ma en aye buk me kwo. Giŋolo kop i kom jo muto kun gilubo gin ma yam gin gutiyo, kit macalo onoŋo gicoyo i buk magi. ¹³ Nam bene odwoko jo ma yam guto i iye-ni woko cen, To ki Lyel bene gumiyo jo muto ma yam tye botgi; ci giŋolo kop pa dano acel acel kun gilubo gin ma yam gin gutiyo. ¹⁴ Gibolo To ki Lyel woko i nam mac. Nam me mac aye meno to me aryo. ¹⁵ Gam mo ma yam pe ginoŋo nyiŋe gicoyo i buk me kwo, gibolo woko i nam me mac.