¹ Lacen i ŋe man awinyo woo madwoŋ macalo dwan lwak dano mapol ata ma gktye i polo ma giwacci, “Aleluya! Laro dano ki deyo ki teko tye bot Lubaŋawa, ² pien kop ma en ŋolo ducu tye ada dok atir. En doŋ oŋolo kop woko i kom dako ma malaya-ni, ma yam obalo lobo woko ki timme me abor-ri, dok bene oculo kwor me remo pa luticce i kome.” ³ Gin dok gudaŋŋe tyen me aryone kun giwacci, “Aleluya! Yito me waŋo gaŋ-ŋi duny mucido cito malo lituu nakanaka.” ⁴ Ci ludoŋo pyeraŋwen-ni kacel ki lee makwo aŋwen-ni guryebbe woko piny guworo Lubaŋa ma obedo i wi komkerri, kun giwacci, “Amen. Aleluya!” ⁵ Dwan mo dok oa ki i wi komker ma wacci, “Wupak Lubaŋa, wun luticce ducu, wun jo ma wulwore, jo matino wa ki jo madito.” ⁶ Ka dok awinyo dwan mo ma winnye calo lwak madit ma giwo, calo mor pa pii ma corre, dok calo mor kot ma mwoc matek. Guwacci,“Aleluya! Pien Rwot Lubaŋawa Won Twer Ducu, tye ka loc. ⁷ Wabedu ki yomcwiny, kun wadwore, dok bene wami deyo bote, pien kare me nyom pa Latin romo doŋ oo, nyako gerre bene doŋ oyubbe woko; ⁸ gimiyo boŋo camanini maberre ma ryeny dok maleŋ en aye ni en oruki.” Pien boŋo camanini maberre-nu obedo gin ducu ma tye atir ma jo maleŋ gitimo. ⁹ Ci lamalaika owacca ni, “Co lok man ni, Jo ma gilwoŋogi i karama pa Latin romo tye ki gum.” Dok owacca ni, “Lok magi lok pa Lubaŋa.” ¹⁰ Cutcut aryebbe woko piny ka tyene ka wore, ento en owacca ni, “Pe myero itim kit meno! An latic wadiwu, dok arom ki utmegini ma gumako lok me caden ma Yecu omiyo botgi-ni. Wor Lubaŋa.” Pien lok me caden ma Yecu omiyo aye cwiny ma miyo lutit lok gitito lok pa Lubaŋa.'' ¹¹ Lacen aneno polo oyobbe, cut atugi neno aguragura matar! Ŋat ma obedo i wiye gilwoŋo ni ŋat ma Genne dok me Ada, gin ma en timo ducu tye atir i ŋolo kop kadi wa i lweny bene. ¹² Waŋe ryeny calo mac, dok onoŋo oruko lalukana mapol me loc i wiye; onoŋo bene tye ki nyiŋ mo ma gigoro ma ŋat mo pe ŋeyo, kono en keken gire aye ŋeyo. ¹³ Oruko boŋo ma onoŋo giluto i remo, dok nyiŋ ma onoŋo gilwoŋe kwede en aye Lok pa Lubaŋa. ¹⁴ Lwak mony mapol me polo ma guruko boŋo camanini maberre, matar dok maleŋ, gulubo kore ma giriŋo ki aguragura matar. ¹⁵ Pala lucan mabit okatti ki i dogge, ma en bineko ki lurok woko ducu, ka doŋ bibedo ka loyogi ki odoo nyonyo; en binyono bur me biyo koŋo vino me akemo pa Lubaŋa mager ma en Won Twer Ducu-ni. ¹⁶ Onoŋo gicoyo nyiŋ i kom jorre ki i eme ma kwanne ni, Kabaka ma loyo luker ducu ki Rwot pa rwodi. ¹⁷ Ka dok aneno lamalaika mo ocuŋ i ceŋ. En olwoŋo kwa winyo ducu mapatpat ma gituk i dye yamo ki dwan maloŋo ni, “Wubin, wugurre kacel ka camo cam me otyeno ma Lubaŋa oyubo, ¹⁸ ka camo riŋo kom luker, ki riŋo kom ludito wi mony, ki riŋo kom jo ma yam gin oteka, riŋo aguragura ki riŋo kom jo ma ŋweco kwedgi, ki riŋo dano ducu, jo ma gilone kengi kacel ki opii, jo matino ki madito ducu.” ¹⁹ Lacen aneno lee ca ki luker me lobo guywayo monygi me lweny i kom ŋat ma obedo i wi aguragura kacel ki monnye. ²⁰ Ento gimako lee ca woko, kacel ki lanebi ma lagoba, ma yam obedo ka tiyo tic mogo me aura i nyime, ma obwolo dano ma onoŋo doŋ giketo poyo pa lee ca i komgi, ki ma yam onoŋo giworo calle-ni. Gin aryo-nu ducu, lee ki lanebi ma lagoba, gibologi woko makwo i nam me mac, ma tye ka lyel ki gweŋ calfa ma mac oliyo. ²¹ Jo mudoŋŋe ducu ginekogi woko ki pala lucwan pa ŋat ma obedo i wi aguragura matar-ri, ki pala lucan ma okatti ki i doge; winyo ducu guyeŋ woko ki riŋo kom dano ma gucamo.