¹ Lacen dok aneno lamalaika mukene ka lor piny kun a ki i polo, ma onoŋo tye ki twero madit; deyone oryeny ocaro wi lobo ducu. ² Ci odaŋŋe ma dwane winnye matek twatwal ni, “Babilon madit doŋ opoto, opoto gire woko! Doŋ odoko kabedo pa jogi, odoko bene ka kanne pa cen maraco ducu, ki pa winyo maraco ma i dano kwero. ³ Rok ducu gumato koŋo vino me timme macol me tarwaŋ ca, luker ducu me wi lobo gutimo kwede abor, ki lucat-wil ma i wi lobo ducu doŋ gumedde gudoko lulonyo pi bedone me caro ki tim twarwaŋe-ni ma okato kare.” ⁴ Dok awinyo dwan mukene ma oa ki ipolo kun wacci, “Wun jona, wua woko ki bote, wek pe wuribbe kwede i balle, wek bene pe wunywak kwede gemo mogo ma poto i kome! ⁵ Pien balle doŋ odurre malo lipim, oo wa i polo, Lubaŋa doŋ opo i kom tim maraco ducu ma yam en otimo. ⁶ Wutim dako-nu ki kit tim ma yam en otimowu kwede, ma en otimo, wurub gin ma en mato obed mapek twatwal i kikopone kikome ma ya en orubo iye ginamata botwu-ni. ⁷ Dok wumi bote arem ki kumo ma rom ki kit ma en obedo ka wakke kwede, ki timme me caro caro. Pien en waco ki i cwinye ni, ‘An daker, abedo i wi kom, pe arom ki da-to, pe abibedo ki kumo wacel’, ⁸ pi meno gemone ducu bipoto i kome i nino acel, two odeke, kumo ki kec. Gibiwaŋe woko bene ki mac, pien Rwot Lubaŋa ma ŋolo kop i kome tekke dit.” ⁹ Doŋ luker me wi lobo ma yam gutimo abor kwede, ma gulubo timme me tarwaŋ, gibikok pire kun gidoŋo oduru ma noŋo ginene doŋ tye ka waŋ i mac kun yitone duny. ¹⁰ Gibicuŋ wa cen pi lworo kit can ma giune kwede, kun giwacci, “Ai do, ai do! Ineno can ba, in Babilon, gaŋ madit dok matek! Kop ma giŋolo i komi doŋ opoto i komi lawaŋacel.” ¹¹ Lucat-wil me lobo bene gitye ka koko kun gikumo pire, pien ŋat mo pe ma dok biwilo jami ma opoŋ i melgi, ¹² jabu, ryal, litino kidi me wel, tiko matar me wel, boŋo camanini maberre, boŋŋi ma obedo lamar lamar, boŋŋi aridi ki makwar, ki kit bao mapatpat ducu ma ŋwecgi kur, jami ducu ma gitiyo ki lak lyec-gu, jami ducu ma gitiyogi ki bao ma welgi malo twatwal, mola, nyonyo, ki got me gedo ma giliyo aliya maber twatwal, ¹³ cinamon ki gin mogo mukene ma ŋwecgi kur, odok eceta me awaŋa, murra, odok luban, koŋo vino, moo jeituni, moko mapwot ki ŋano, dyaŋi ki romi, aguragura, ki gadigadi lweny, opii, kadi wa kwo pa dano kikome. ¹⁴ “Nyig yat ma yam cwinyi paro twatwal-li doŋ gikwanyo woko ki boti, cam mogo mamit ma pe nen atata ki jami ma gipwoyo ki waŋ, doŋ gurwenyo woko ki boti, pe dok ibinoŋogi matwal!” ¹⁵ Lucat-wil ma yam gicato jami magi ducu, ma doŋ gudoko lulonyo pi gaŋ meno, gibicuŋ wa cen ka mabor pi lworo ki can ma giune kwede, kun gikok matek ma kumo kwede ni, ¹⁶ “Ai do, ai do, gaŋ madit-ti oneno can ba, en gaŋ ma yam onoŋo giruko woko ki boŋo camanini maberre, ki boŋŋi ma lamar lamar ki makwar, kun gidero woko ki jabu, kidi me wel, ki tiko matar me wel bene. ¹⁷ Lonyo madit kit man-ni giketo woko teŋteŋ lawaŋacel.” Ludito me mel, ki jo ma woto i nam, ludwo mel ki jo ducu ma gitiyo tic me cato wil i nam, gucuŋ wa cen ka mabor.'' ¹⁸ Ci gudaŋŋe matek ka gunene tye ka waŋ kun yito duny, kun giwacci, “Gaŋ mene ma onoŋo yam rom ki gaŋ man madit-ti?” ¹⁹ Ciguonyo putu i wigi, i kare ma gitye ka koko kun gikumo ma gidaŋŋe ki koko matek pire ni, “Ai do, ai do, ineno can ba, in gaŋ madit-ti, ka ma jo ducu ma yam gitye ki melgi i nam gudoko lulonyo pi lonyone madwoŋŋi! Giketo woko teŋteŋ i cawa acel keken. ²⁰ Wudaŋŋe ki wer me yomcwiny, wun lwak me polo, wun jo maleŋ, wun lukwena ki lutit lok pa Lubaŋa, pien Lubaŋa doŋ odwoko kop ma yam oŋolo i komwu-ni i kome!” ²¹ Lalaikmaa mo matek otugi kwanyo gweŋ mo madit ma rom ki kidi rego, ci obolo woko i nam, kun wacci, “Babilon ma en gaŋ madit-ti gibitimo ki tim bwami gicanyo woko matek i ŋom, pe doŋ gibinoŋo matwal! ²² Dwan lugo-naŋa ki jo ma goyo wer ducu, dwan lukut nyamulere ki lukut tum pe dok biwinnye boti matwal. Dano mo ma tiyo tic me diro pe dok binoŋŋe boti matwal. Mor pa kidi rego pe dok biwinnye boti matwal. ²³ Tara mo pe dok bilyel menyi, kadi ki dwan lanyom ki dwan nyako ger pe dok biwinnye boti matwal; pien lucat-willi onoŋo yam gin jo ma pigi dito atika i lobo yam bene ibwolo rok ducu ki tim jokjok ma ibedo ka timone. ²⁴ Remo pa lutit lok pa Lubaŋa ki pa jo maleŋa, remo pa jo ducu ma yam ginekogi i lobo, ginoŋo tye i Babilon.”