¹ Lacen lamalaika acel i kom lumalaika abiro ma onoŋo gitye ki atabo abiro-ni obino bota owacca ni, “Bin wek anyutti kop ma doŋ giŋolo i kom dako ma lakwele marac, ma bedo i wi pii mapol-li. ² Luker me wi lobo ducu gutimo kwede abor, kadi wa jo ma bedo i lobo ma gumer ki koŋo vino me tim me aborre-ni.” ³ Cutcut lamalaika otiŋa otera i tim, kun onoŋo Cwiny Maleŋ oyuto tamma woko, ci aneno dako mo ma obedo i wi lee mo makwar, ma gicoyo nyiŋ mogo i kom lee-nu ma nyuto cac i kom Lubaŋa; coc meno oromo kome ducu, lee-nu onoŋo wiye tye abiro ki tuŋe tye apar. ⁴ Dako-nu oruko boŋo ma obedo lamar lamar ki makwar, ma odeyo kome ki jabu, ki kidi me wel, ki tiko matar me wel-gu, kun omako kikopo jabu i ciŋe ma opoŋ woko ki gin ma dano kwero, ki cilo me timme me abor-ri. ⁵ I tur nyime gicoyo iye nyiŋ mo ma te lokke obedo me muŋ, ni, “Babilon madit, megi mon ducu ma gin malaya, ki jo ducu ma gitimo tim me kwer.” ⁶ Aneno dako-nu omer woko ki remo pa jo pa Lubaŋa, dok bene ki remo pa lucaden pa Yecu ma ginekogi. Ka doŋ anene ci abedo ki ur madit twatwal. ⁷ Ento lamalaika owacca ni, “Piŋo iuro? Abititti lok me muŋ pa dako-nu, ki pa lee ma dako obedo i wiye, ma wiye tye abiro ki tuŋe tye apar-ri. ⁸ Lee ma ineno-ni onoŋo yam tye, ento kombeddi doŋ pe, bilor piny i bur ma tere pe gik, doŋ cito rwenyo woko matwal. Doŋ jo ma bedo i lobo ma yam pe gicoyo nyiŋgi i buk me kwo cakke i acakki piny gibiuro mada me neno lee-nu, pien yam con tye, kombeddi doŋ pe, ento bidwogo. ⁹ Lok man mito tam ki ryeko. Wiye abiro-gu obedo godi matino abiro ma dako ca obedo iye. ¹⁰ Gin bene gubedo luker abiro ma jo abic i komgi doŋ gupoto woko, acel tye, ento acel mukene peya obino. Ka obino, myero koŋ ori pi kare mo manok keken. ¹¹ Ento lee ma yam tye ca, ma kombeddi doŋ pe-ni, en kabaka me aboro, ento en ŋat acel i kin jo abiro ca, dok bicito woko ci rwenyo matwal. ¹² Doŋ tuŋ lee apar ma ineno ca gin aye luker apar ma peya gulimo twero me loc, ento myero gulim twero me loc macalo luker pi cawa acel, kacel ki lee ca bene. ¹³ Jo magi onoŋo yam tamgi tye acel, ci gumiyo twerogi ki ditogi woko bot lee ca. ¹⁴ Jo-nu biero mony i kom Latin romo, ento Latin romo bitayogi woko, pien Rwot pa rwodi, ki Kabaka ma loyo luker ducu, dok jo ma tye bote aye jo ma gilwoŋogi, ma giyerogi ma gin jo ma genne.” ¹⁵ Dok owacca ni, “Pi madwoŋ ma i kulu ma ineno ca, ka ma dako ma lakwele obedo iye-ni, magi aye gin dano ma i wi lobo, ki lwak rok ducu ki leb-gu ducu. ¹⁶ Doŋ tuŋ lee apar ma ineno ca, gin kacel ki lee gibikwero dako-nu ma lakwele-ni woko; gibitenye ata kun giweke doŋ munero, gibicamo riŋo kome ci giwaŋo woko ki mac. ¹⁷ Pien Lubaŋa aye ma oketo mit man i cwinygi, wek gucob tamme kun gibedo ki cwiny acel, ka wek doŋ gumi twerogi bot lee ca, nio waŋ ma lok ma Lubaŋa owaco ocobbe kakare. ¹⁸ Dako ma ineno ca en aye gaŋ madit ma tye ka loyo luker ducu me wi lobo.”