¹ Dok awinyo dwan mo maloŋo oa ki i ot pa Lubaŋa ma waco bot lumalaika abiro ni, “Wucit wuony akemo pa Lubaŋa ma tye i atabo abiro ca-ni woko i lobo.” ² Lamalaika mukwoŋo ocito oonyo gin ma i i atabone woko i lobo. Ci two bur maraco ma toko kom dano atoka omako jo ma poyo pa lee ca tye i komgi ma giworo calle bene-ni. ³ Lamalaika me aryone oonyo gin ma ii atabone woko i nam, ci olokke odoko calo remo pa dano muto, ki gin makwo ducu ma onoŋo gitye i nam guto woko. ⁴ Lamalaika me adekke oonyo gin ma i i atabone i kulu ki i waŋ it-gu ducu ci gin ducu gulokke gudoko remo. ⁵ Cutcut awinyo lamalaika ma loyo pii ka wacci, “Kop ma iŋolo-ni iŋolo giri atir, in ŋat ma tye, yam bene ibedo tye con, in Ŋat Maleŋ. ⁶ Pien jo ma guoyo remo pa joni maleŋ, ki remo pa lutit lokki, in bene imiyo botgi remo me amatagi. Kakare, can meno oporo gin ma gutimo.” ⁷ Dok awinyo keno tyer ka daŋŋe ni, “Ada, Rwot Lubaŋa Won Twer Ducu, kop ducu ma iŋolo bedo ada dok atir!” ⁸ Lamalaika me aŋwenne oonyo gin ma i i atabone woko i kom ceŋ, dok bene giye ni owaŋ dano woko ki mac. ⁹ Lyeto mager twatwal owaŋo dano atika, mumiyo dano guyeto nyiŋ Lubaŋa ma tye ki twero i kom gemo magi, pe guŋut dok bene pe gumiyo deyo bote. ¹⁰ Lamalaika me abic oonyo gin ma i i atabone woko i kom komker pa lee ca, ci kerre doŋ ocako bedo i colpiny; arem madwoŋ omiyo dano gukayo lebgi ma pe wacce, ¹¹ guyeto Lubaŋa me polo pi arem ki bur ma otoko komgi woko, dok bene pe guŋut i kom gin ma gutimo. ¹² Lamalaika me abicelle oonyo gin ma i i atabone woko i kulu madit Euprate, ci piine otwo woko pi yubo yo pi wot pa luker ma gia ki yo tuŋ wokceŋ. ¹³ Lacen aneno cen maraco adek ma gubedo calo ogwal ma okatti ki i doŋ min kulu, ki i dog lee, ki i dog lanebi ma lagoba, ¹⁴ pien gubedo cen pa jok ma tiyo tic mogo me aura twatwal. Gin bene giwoto bot luker me wi lobo ducu ka cokogi woko kacel pi mony i nino madit pa Lubaŋa Won Twer Ducu. ¹⁵ (Nen, abebino macalo lakwo! Dano ma bedo ma waŋe twolo kun kiyo piny tye ki gum, ma kun noŋo gwoko boŋŋine, wek pe ewot munero, ma dano gineno kome ma pe eruko iye boŋo!) ¹⁶ Gucoko luker kacel i kabedo ma gilwoŋo i leb Ibru ni Armagedon. ¹⁷ Lamalaika me abirone doŋ oonyo gin ma tye i atabone i dye yamo, ci dwan mo madit oa ki i ot pa Lubaŋa, ki i wi komker kun wacci, “Doŋ otimme!” ¹⁸ Ci lutkot ocako wil awila, mor winnye matek, ki mwoc pa kot, ki oyeŋyeŋ madit oyeŋo piny, kit oyeŋyeŋ mo ma peya yam onen cakke ma dano gubedo i lobo; oyeŋyeŋ meno obedo dit adada. ¹⁹ I gaŋ madit-ti obarre opokke dul adek, gaŋi pa lurok ducu gumuk gupoto woko piny. Ci Lubaŋa opo pi Babilon ma en gaŋ madit, pi miye ni omat koŋo vino i kikopo me akemone mager. ²⁰ Mumiyo cula nam ducu guriŋo woko, ki godi ducu bene doŋ gurwenyo woko ma pe doŋ giromo noŋogi. ²¹ Pee mapek twatwal ocorre ki i polo opoto i kom dano, kun pek pa nyig pee acel acel onoŋo cok romo ratili miya acel; nio waŋ ma dano guyeto Lubaŋa pi gemo man me pee-ni, pien gemo meno onoŋo obedo rac ma okato kare.