¹ Dok aneno ginanyuta mo mukene madit i polo, ma obedo bene me aura mada, gin lumalaika abiro ma gitye ki gemo abiro. Magi gin aye doŋ gemo me agikkine, pien gin aye gimiyo akemo pa Lubaŋa cobbe kakare. ² Ka dok aneno gin mo ma nen calo nam me kiyo maleŋ ma orubbe ki mac; doŋ jo ma onoŋo gutayo lee ca ki calle, ki namba me nyiŋe, onoŋo gucuŋ i dog nam me kiyo, kun gumako naŋa pa Lubaŋa i ciŋgi. ³ Onoŋo gitye ka wero wer pa Moses, ma obedo latic pa Lubaŋa, ki wer pa Latin romo kun giwacci, “Ticci ducu ma itiyo bedo me aura, dok gidito, ai Rwot Lubaŋa Won Twer Ducu! Kitti ducu tye atir dok me ada, in Kabaka ma iloyo rok ducu! ⁴ Aŋa mono ma pe bilworo, ai Rwot? Aŋa kono ma pe bipako nyiŋi? Pien in keni aye ileŋ. Rok ducu gibino gibio wa i nyimi, gin ducu gibiwori, pien doŋ onen woko ka maleŋ ni ticci ducu tye atir.” ⁵ Lacen aneno ot pa Lubaŋa, ma en kema lok me caden ma tye i polo; onoŋo oyabbe woko, ⁶ ci lumalaika abiro gua ki i ot pa Lubaŋa gukatti woko ki gemo abiro. Onoŋo guruko boŋo camanini maleŋ adada, ma gutweyo korgi woko ki del jabu. ⁷ Ci lee acel ki i kin lee makwo aŋwen-ni omiyo atabo jabu bot lumalaika abiro; onoŋo atabo magi gupoŋ woko ki kiniga pa Lubaŋa ma bedo kwo nakanaka. ⁸ Yito ma oa ki i deyo pa Lubaŋa ki tekone omwono ot pa Lubaŋa woko limuk, ma ŋat mo onoŋo pe twero donyo iye, nio waŋ ma gemo abiro ma lumalaika abiro gukelo ca doŋ otum woko liweŋ.