¹ Lamalaika dok onyutta kulu me pii me kwo, ma mil amila lamakmak calo gweŋ ma mil, ma onoŋo mol kun a ki i komker pa Lubaŋa ki pa Latin romo, ² onoŋo mol lubo dye yo me gaŋ meno. Dok bene i dog kulu ryoryo onoŋo yat me kwo tye iye, ma tye ki nyige mapatpat ma romo apar wiye aryo, onoŋo bene nyak dwe ki dwe. Pot yat meno onoŋo obedo yat me caŋo two pa jo me rok ducu. ³ Gin ma giceno pe dok binen kunnu, ento komker pa Lubaŋa ki pa Latin romo aye bibedo iye, ki luticce gibiwore. ⁴ Gibineno waŋe, ki nyiŋe bene bibedo i tur nyimgi. ⁵ Dyewor doŋ pe bibedo tye matwal; pe dok gibimito mac ma caro piny, nyo ceŋ, pien Rwot Lubaŋa bibedo ceŋgi, ci gin gibibedo ka loc nakanaka. ⁶ Ka dok owacca ni, “Lok magi lok ma genne, dok me ada. Rwot ma en Lubaŋa ma loyo cwiny lutit lokke doŋ ocwalo lamalaikane me nyuto bot luticce gin ma bitimme i kare macokcok-ki. ⁷ Nen, doŋ acok bino.” Tye ki gum dano ma lubo lok ma gitito i buk man. ⁸ An aye Jon, ŋat ma yam owinyo lok man dok oneno gin magi ducu. I kare ma awinyo lok man dok ma anenogi, cutcut aryebbe woko piny ka tyen lamalaika ma onyutta gin magi ka amiye woro; ⁹ ento en owacca ni, “Pe myero itim kit meno! An latic wadiwu, arom ki utmegini ma gin lutit lok pa Lubaŋa, ki jo ma gilubo lok ma gicoyo i buk man. Wor Lubaŋa.” ¹⁰ Ka dok owacca ni, “Pe imwon lok magi ma gitito i buk-ki woko, pien kare doŋ cok. ¹¹ Wek lutim maraco koŋ gumedde ki timo gin marac jo ma cilo me bal obwoyogi gumedde ki bedo ki bal, ki jo ma kitgi atir myero gumedde ki timo gin ma tye atir, ki jo maleŋ bene myero pud gumedde ki bedo leŋ.” ¹² “Nen, doŋ acok bino, kun akelo motta me pwoc, me culo dano acel acel muporo tic ma en otiyo. ¹³ An Alupa ki Omega, mukwoŋo ki me agikki, acakki ki agikki.” ¹⁴ Jo ma lwoko ginarukagi wek gibed ki twero me camo nyig yat me kwo, ki me donyo i gaŋ ma noŋo giwok ki i dogcel, jo-nu aye tye ki gum. ¹⁵ I ŋe gaŋ woko tye iye jo ma timo tim calo gin gwogi, lutim tim jokjok, lutim abor, lunek dano, ki luwor cal jogi, ki jo ducu ma maro loko goba, kun gitiyo bene gin me gobagoba. ¹⁶ “An Yecu doŋ acwalo lamalaikana me tito lok me caden botwu pi lwak jo muye an ducu ma gitye i kabedo ducu. An a lwit yat dok bene lakwar Daudi, an latwok ma ryeny twatwal-li.” ¹⁷ Cwiny Maleŋ kacel ki nyako ger gitye ka wacci, “Bin!” ŋat ma owinyo lok man bene myero ogam ni, “Bin!” ŋat ma orwo neko myero obin, wek ŋat ma mito bene omat pii me kwo laboŋo wel. ¹⁸ Doŋ aciko jo ducu ma guwinyo lok ma gitito i buk man, ni, ka ce dano mo dok omedo lok mo iye, Lubaŋa bene bimedo gemo ma gitito pire i buk kany-nyi i kome. ¹⁹ Dok bene ka ce ŋat mo okwanyo lok mo woko ki i kom lok ma gitito i buk kany, Lubaŋa bene bikwanyo twerone me camo yat me kwo ki donyo i gaŋ maleŋ woko, ma gicoyo pigi i buk kany-nyi. ²⁰ ŋat ma miyo caden i kom lok magi bene owacci, “Adada, binona doŋ cok.” Amen. Rwot Yecu, bin! ²¹ Kica pa Rwot Yecu obed ki jo pa Lubaŋa ducu. Amen.