¹ Dok aneno lamalaika mukene matek twatwal oa ki i polo kun lor bino piny. Orukke woko ki pol, ma onoŋo danyu tye i wiye, waŋe onoŋo obedo calo ceŋ, ki tyene onoŋo obedo calo wir mac. ² Onoŋo buk adola matidi tye i ciŋe ma iye oyabbe woko. Oketo tyene tuŋ lacuc i nam ki tyene lacam oketo i wi lobo. ³ Odaŋŋe ki dwan maloŋo calo labwor ma moro dwane; ka odaŋŋe, ci mor pa kot omwoc amwoca ma romo tyen abiro kulu. ⁴ Ka kot doŋ omor omwoc tyen abiro, ci ayubbe ka coc, cutcut acako winyo dwan ma a ki i polo kun wacci, “Mwon lok ma mor kot abiro-ni guwaco woko, pe ico acoya.” ⁵ Ci lamalaika ma onoŋo aneno ocuŋ i nam ki i lobo-ni otiŋo ciŋe lacuc malo i polo, ⁶ ka okwoŋo kwoŋ ki nyiŋ ŋat ma bedo nakanaka, ma oketo polo ki jami ducu ma tye iye, ki lobo ki jami ducu ma tye iye, kacel ki nam ki jami ducu ma tye iye kun wacci, “Agalagala mo doŋ pe, ⁷ ento ka kare oromo ma lamalaika me abiro bikuto tumme, Lubaŋa bicobo tamme ma tye i muŋ kit macalo yam otito bot luticce lunebi.” ⁸ Doki awinyo ka dwan ma onoŋo oa ki i polo-ni tye ka lok kweda tyen me aryo kun wacci, “Cit ikwany buk adola ma oyabbe ma tye i ciŋ lamalaika ma ocuŋ i wi nam ki i lobo-ni.” ⁹ Ci acito bot lamalaika meno, atitte ni omiya buk adola matidi-nu; ci en ogamo owacca ni, “Gam icam woko. Bibedo kec i ii, ento bibedo lim i dogi calo moo kic.” ¹⁰ Cutcut agamo buk adola matidi ca woko ki i ciŋ lamalaika ci acamo woko. Obedo lim i doga calo moo kic, ento i kare ma doŋ atyeko camone, obedo makec i iya. ¹¹ Ka doŋ giwacca ni, “In myero doki itit lok pa Lubaŋa, i kom lwak dano mapatpat ki rok ki leb ki luker ducu.”