¹ Lamalaika me abicce okuto tumme, ci aneno lakalatwe oa ki i polo opoto woko i ŋom, kun onoŋo gimiye layab me dog bur matut ma tere pe gik. ² En oyabo dog bur, ci yito oduny ki i doge calo yito ma oa ki i ruk mac madit adada ma tye i keno, ceŋ ki yamo gucido woko ki yito ma oa ki i bur. ³ Lwak bonyo oa ki i yito meno omukke obino i lobo oumo woko lipuk; onoŋo yam gimiyo botgi kit twero ma rom ki twero ma oton me lobo-ni tye kwede. ⁴ Gicikogi ni pe gubal lum me lobo, kadi gin ma twi atwiya, nyo yat mo, ento guket can i kom jo ma pe ki lanyut pa Lubaŋa i tur nyimgi. ⁵ Pe giye ni gunek jo meno aneka, ento giyegi ni guungi auna pi dwe abic. Arem ma giwinyo pi un ma giunogi kwede onoŋo rom ki arem ma dano ma oton okayo bedo kwede. ⁶ I kare meno dano biyenyo to, ento pe gibinoŋo; gibimito ni gito woko, ento to bilwi woko ki botgi. ⁷ Lwak bonyo mumukke obino i lobo-ni onoŋo ginen calo lwak aguragura ma giyubogi woko pi lweny; onoŋo bene tye gin mogo i wigi ma nen calo lalukana jabu; waŋgi obedo calo waŋ dano, ⁸ yer wigi obedo calo yer wi mon, lakgi obedo calo lak labwor. ⁹ Korgi obedo calo nyonyo ma askari gigeŋo ki korgi, ma noŋo bwomgi ŋur winnye calo mor pa lwak gadigadi lweny ma lwak aguragura aye giywayo, kun gicito gilaro lweny. ¹⁰ Yibgi onoŋo tye obedo calo lwak oton, kwirgi bene tye me kayo dano, ki twerogi me uno dano pi dwe abic onoŋo bene yam tye i yibgi. ¹¹ Laditgi ma onŋo loyogi macalo kabaka obedo lamalaika me bur matut ma tere pe gik. Nyiŋe i leb Ibru onoŋo gilwoŋo ni Abaddon; i leb Grik gilwoŋo ni Apollyon. ¹² Can muikwoŋo doŋ okato. Nen, can aryo mukene pud odoŋ ma myero obin. ¹³ Lamalaika me abicelle okuto tumme, ci awinyo dwan mo ma a ki i twok keno tyer aŋwen me jabu ma tye i nyim Lubaŋa. ¹⁴ Owaco bot lamalaika me abicel ma tye ki tum-mi ni, “Gony lumalaika aŋwen ma gitweyogi i dog kulu madit me Euprate-ni woko.” ¹⁵ Cutcut gigonyo lumalaika aŋwen ca, kun onoŋo doŋ giyubogi pi kare meno kikome, pi cawa meno, i nino meno, i dwe-nu me mwaka meno, wek gunek dul acel me adek pa dano ducu. ¹⁶ Wel askari me mony ma onoŋo giŋweco ki aguragura onoŋo romo milion miya aryo; onoŋo awinyo ka giwaco welgi. ¹⁷ Man aye kit ma lwak aguragura ki jo ma giŋweco kwedgi gunen kwede bota i ginanyuta: jo ma giŋweco kwedgi onoŋo yam guruko nyonyo me geŋo korgi ma raŋigi kwar calo lodi mac, dok obedo bulu calo kidi capir, ki dok raŋine obedo calo raŋi lwit opok, macalo gweŋ calfa. Aguragura onoŋo wigi calo wi labwor, kun mac ki yito ki alur me kidi calfa ma waŋ katti ki i doggi. ¹⁸ Gemo magi adek-ki, mac, ki yito ki alur me kidi calfa ma okatti ki i doggi oneko jo ma romo dul acel me adek pa dano ducu. ¹⁹ Pien twero pa lwak aguragura meno tye i doggi ki i yibgi. Yibgi obedo calo twol mapol ma tye ki wigi, en yibgi-nu aye giketo kwede arem i kom dano. ²⁰ Jo mukene ma two gemo magi pe onekogi yam pe guŋut pi gin ma onoŋo gin kikomgi gutiyo ki ciŋgi, pe guweko woro jogi, ki cal jogi ma gutiyo ki jabu, ki ryal ki mola, ki kidi me wel-gu, ki yadi, ma gin cal jogi ma pe gitwero neno gin mo, dok pe gitwero winyo lok mo, kadi ki wot bene pe gitwero wot. ²¹ Jo meno yam bene pe guŋut pi nek ma guneko ki dano, nyo pi timgi me jokjok, kadi pi timo tim tarwaŋ, nyo pi kwalo kwo.