¹ Lacen gimiya lagada me pimo piny, ma obedo calo odoo, ci giwacca ni, “A icit ipim ot pa Lubaŋa, keno tyer, ki jo ma giworo Lubaŋa i ode. ² Ento pe ipim dyekal me ot pa Lubaŋa ma tye woko, wek meno obedi pien doŋ gityeko miyone woko bot jo ma pe giŋeyo Lubaŋa, gibibedo ka nyono gaŋ maleŋ woko pi dwe pyeraŋwen wiye aryo. ³ Abimiyo twero bot lucadenna aryo-ni me tito lok pi nino alip acel ki miya aryo ki pyerabicel, ma noŋo guruko boŋo cola.” ⁴ Lucaden aryo-ni gin aye yadi jeituni ki okar mac tara ma cuŋ i nyim Rwot me lobo. ⁵ Ka ce onoŋo ŋat mo mito timogi rac, ci mac bicorre i doggi waŋo lukworgi woko liweŋ; doŋ ka ŋat mo mito timogi rac, meno aye kit ma gibineke kwede. ⁶ Gitye ki twero me loro polo woko wek kot pe ocwer i kare ma noŋo gitye ka tito lok pa Lubaŋa. Gitye-bene ki twero me loko pii wek odok remo, dok me keto can i kom lobo i yo ducu, tyen mapol kit macalo cwinygi mito. ⁷ Ka doŋ gutyeko miyo cadengi, ci lee maca ma okatti ki i bur ma tere pe gik-ki biero lweny i komgi, dok bene nekogi woko. ⁸ Ci komgi muto biradde i dye yo me gaŋ madit, ma i carolok gilwoŋo nyiŋe ni Codom, ki dok ni Ejipt, en bene ka ma yam giguro iye Rwotgi i kom yatariya. ⁹ Dano ma gua ki i kin lwak me wi lobo ki i kaka mapatpat ki leb-gu ki i rok mapatpat gibineno komgi muto pi nino adek ki nucu, kun pe giye ni giyikgi i lyel. ¹⁰ Jo ma bedo i lobo biŋatte i komgi, gibibedo ki yomcwiny kun gicwalo mot i kingi kekengi, pien lutit lok aryo-nu onoŋo yam guuno dano ma bedo i lobo matek. ¹¹ Ento i ŋe nino adek ki nucu, yweyo me kwo oa ki bot Lubaŋa ci odonyo i komgi, ka doŋ gucako a malo, gucuŋo ki tyengi, mumiyo lworo madit twatwal omako jo ducu ma onenogi. ¹² Cutcut guwinyo dwan maloŋo ma oa i polo kun waco ni, “Wuit wubin malo kany!” Ci guito i polo i pol, ma lukworgi bene gineno. ¹³ I cawa meno cutcut oyeŋyeŋ madit twatwal oyeŋo piny,. ci dul acel me apar me gaŋ meno omukke opoto woko piny. Oyeŋyeŋ meno oneko jo alip abiro, jo mudoŋ lworo omakogi matek, ci gumiyo deyo bot Lubaŋa me polo. ¹⁴ Can me aryo doŋ okato; nen, can me adek doŋ cok bino. ¹⁵ Lacen lamalaika me abirone okuto tumme, ci dwan mogo maloŋo owinnye i polo ma wacci, “Ker me lobo doŋ odoko ker pa Rwotwa ki Kricitone, en doŋ bibedo ka loc matwal.” ¹⁶ Cutcut ludoŋo pyeraryo wiye aŋwen ma gibedo i wi komkergi i nyim Lubaŋa guryebbe piny guworo Lubaŋa, ¹⁷ kun giwacci, “Wamiyo pwocwa boti, in Rwot Lubaŋa Matwero-ducu, in ma itye dok ma yam ibedo tye wa con, pien doŋ imako tekoni madit ci icako loc. ¹⁸ Lurok yam gubedo ki akemo, ci akemoni obino, ki kare me ŋolo kop pa jo muto, kare me miyo mot me pwoc bot luticci ma lutit lokki, ki joni maleŋ, bot jo ducu ma gilworo nyiŋi, jo matino ki jo madoŋo, ki kare me neno jo ma tye ka balo lobo woko.” ¹⁹ Ka doŋ giyabo ot pa Lubaŋa ma tye i polo, ci canduk me gicikke onen woko i ot pa Lubaŋa. Kot ocako cwer kun mor, mwoc amwoca ma lutkot wil awila, ki dwan owinnye maloŋo me mor pa piny, oyeŋyeŋ ocako yeŋo piny, ki pee bene ocorre madwoŋ twatwal.