¹ Awaco kit man ni, laleyo ka pud latin bedo rom ki opii, kadi bed en won jami ducu. ² En koŋ bedo i te loc pa jo ma gwoke ki jo ma gwoko jamine, nio ka kare ma wonne ociko oromo. ³ Wan bene watye kit meno; i kare ma wan pud litino, yam wabedo opii pa jogi ma gitye ka loc i wi lobo-ni. ⁴ Ento ka kare kikome ma giciko-ni doŋ oromo, ci Lubaŋa ocwalo Wode ma dako onywalo, kun ginywalo i te cik, ⁵ wek okok jo ma yam tye i te loc me cik, ka wek wan bene gilokwa wadok litino me paco. ⁶ Kit macalo wun doŋ litino me paco, en aye mumiyo Lubaŋa ocwalo Cwiny Wode i iwa, ma kok ni, “Abba! Wora!” ⁷ Kit meno, pi tic pa Lubaŋa omiyo in doŋ pe opii, ento latin me paco; ka doŋ in latin paco, man nyuto ni in doŋ lale jami. ⁸ I kare macon ma onoŋo peya wuŋeyo Lubaŋa, wubedo opii pa gin mogo atata ma i adane pe gin lubaŋa wacel. ⁹ Ento kombeddi doŋ wuŋeyo Lubaŋa, nyo koŋ awacci, Lubaŋa doŋ ŋeyowu; ci dok wutwero dok cen niŋniŋ bot jogi macon ma gigoro, ma piny bene oloyogi woko-ni? Piŋo dok wumito bedo opiigi pi tyen me aryo? ¹⁰ Wuketo cwinywu me gwoko nino, ki dwe,. ki kare mapatpat, ki mwaka-gu! ¹¹ Abedo ki lworo matek, pien ticca ma ayelle kwede botwu, kara aneko iye koma nono. ¹² Utmega, alegowu ni wubed calo an, pien an bene doŋ adoko calo wun. Wun giwu yam pe wutimo gin mo marac i koma. ¹³ Wuŋeyo ni, pi lit koma omiyo atittiwu lok me kwena maber pi tyen mukwoŋo. ¹⁴ Yam pe wuŋala dok pe wucaya, kadi lit koma okelo botwu aoma cwiny, ento wujola maber calo wujolo lamalaika pa Lubaŋa, dok calo wujolo Kricito Yecu kikome. ¹⁵ Gin aŋo dok muŋolle i yomcwiny ma onoŋo wubedo kwede-ni? An cadenwu ma aloko ni, ka ce nene twerre, kono wukolo waŋwu woko ci wumiyogi bota. ¹⁶ An alokke adoko lamerokwu pi tito botwu lok me ada? ¹⁷ Jo mukene ca gibwolo waŋwu nono, tamgi rac. Gimito cego wiwu woko, wek wucak dworogi. ¹⁸ Dworre pi gin maber, ber kare ducu, pe ka an atye botwu keken. ¹⁹ Litinona, pud dok atye ka ciro arem kwedwu macalo dako ciro arem i kare me nywal, nio ka kit pa Kricito ocwene i iwu. ²⁰ Onoŋo amito ni kono abino abedo kwedwu kombeddi, ka wek aniaŋ kit gin ma myero alok botwu ki kunnu, pien tamma i komwu doŋ ocuŋ woko ata. ²¹ Wun jo ma wumito ni cik olowu, wun pe wuwinyo cik? Koŋ doŋ wutitta mono. ²² A Pien yam gicoyo ni, Abraim onoŋo tye ki awobe aryo, acel obedo wod pa aŋeca, ki acel obedo wod pa dakone kikome. ²³ Ento wod pa aŋecani yam ginywalo i kit me kom, ki latin pa dako kikome-ni ginywalo pi cikke ma yam Lubaŋa ociko. ²⁴ Man ma awaco-ni obedo carolok: Mon aryo magi nyuto gicikke aryo bene. ŋat acel oa ki i wi got Cinai, litino ma en onywalo gubedo opii; dako meno en aye Agar. ²⁵ Kombeddi Agar nyuto got Cinai, ma tye i Arabia; rom ki Jerucalem me kare-ni, pien en tye i opii kacel ki litinone. ²⁶ Ento Jerucalem ma tye i polo lone kene, en aye obedo minwa. ²⁷ Pien yam gicoyo ni, “Bed ki yomcwiny, in dako ma lalur ma yam pe inywalo latin mo-ni, mwoc ki wer kun idaŋŋe matek, in dako ma pud peya yam arem ogoyi! Pien litino pa dako ma gitenyo pol, kato litino pa dako ma bedo gin ki cware kacel.” ²⁸ Utmega, wan wacal ki Icaka, wan litino me cikke pa Lubaŋa. ²⁹ Ento macalo i kare ca onoŋo latin ma ginywalo i kit me kom obedo ka uno latin ma ginywalo pi Cwiny pa Lubaŋa, i kare-ni bene tye kit meno. ³⁰ Ento ginacoya kono wacci ŋo? Wacci, “Ryem aŋeca-ni woko gin ki wode, pien wod pa aŋeca pe bileyo jami kacel gin ki wod pa dako kikome.” ³¹ Kit meno, utmega, wan pe litino pa aŋeca, ento wan litino pa dako kikome.