¹ Wun jo Galatia kara wumiŋ kuman! Aŋa murogowu, wun jo ma ceŋ ginyuto botwu atyer kit ma giguro kwede Yecu i kom yatariya macalo wuneno ki waŋwu? ² Koŋ apenywu ki peny man keken: wun mono yam wulimo Cwiny Maleŋ pi lubo cik, kono nyo pi ye lok me kwena maber ma wuwinyo gitito botwu-ni? ³ Wun kara wubedo miŋ kuman! Wucako lubo kit me Cwiny, ci kombeddi doŋ wumito wugik ki tekkomwu? ⁴ Gin jami mapol madoŋo macalo meno otimme botwu nono? I adane onoŋo otimme ki tyen lok! ⁵ En Lubaŋa ma omiyowu Cwiny Maleŋ-ŋi, dok otiyo bene taŋo mapol i kinwu, en tiyo man pien ni wulubo cik, kono nyo pi ye lok ma wuwinyo ma gitito botwu? ⁶ Kit ma meno bene yam gicoyo lok i kom Abraim ni, “En oye Lubaŋa, omiyo gikwane ni en dano ma kite atir.” ⁷ Myero wuŋe ni jo ma tye ki niye, gin aye likwayo pa Abraim kikome. ⁸ Luco ginacoya yam con onoŋo doŋ guŋeyo woko ni, Lubaŋa bikwano Lurok ni gin jo ma kitgi atir pi niye. Lubaŋa yam otito lok me kwena maber con bot Abraim kun wacce ni, “Rok ducu bilimo gum piri.” ⁹ Pi meno, jo ma tye ki niye gibinoŋo gum kacel ki Abraim mubedo ki niye. ¹⁰ Jo ducu ma gujeŋŋe i kom tic me lubo cik doŋ gicenogi woko; pien yam gicoyo ni, “Cen opot i kom jo ducu ma pe gilubo gin ducu ma gicoyo i buk me cik, kun gicobo bene ticce kakare.” ¹¹ Kombeddi lok doŋ oŋene woko ni, pe gikwano dano mo ni kite atir i nyim Lubaŋa pi tiyo gin ma cik mito; pien gicoyo ni, “ŋat ma kite atir pi niye bibedo kwo.” ¹² Ento cik pe ocuŋ i kom niye, pien gicoyo ni, “ŋat ma tiyo kun lubo gin ma cik mito bikwo pire.” ¹³ Kricito aye ma nene okokowa ki i cen ma opoto i komwa pien pe walubo cik; en obino ci olokke odoko dano ma giceno ma ka-kawa. Pien yam gicoyo ni, “Cen opoto i kom dano ma giŋabo malo i wi yat.” ¹⁴ Lok man otimme wek gum ma Lubaŋa ceŋ omiyo ki Abraim Lurok bene gunoŋ pi Yecu Kricito, ka wek wan bene walim Cwiny Maleŋ ma yam giciko pire-ni pi niye. ¹⁵ Utmega, koŋ anyut labol me lok i kom dano. Ka jo aryo gucikke i gin mo-ni, ma gumoko gicikkegi, ŋat mo pe dok twero lokone, dok bene pe twero medo gin mo i gicikke meno. ¹⁶ Lubaŋa yam ocikke gin ki Abraim ki bot lakware bene. Ento yam ginacoya pe owacci, “Ki bot likwayu,” ma nyuto ni gipol, ento owacci, “Ki bot lakwaru,” ma nyuto dano acel keken, ma en aye Kricito. ¹⁷ Gin ma myero aloki tye kit man ni, cik ma doŋ obino lacen i ŋe mwaka miya aŋwen ki pyeradek pe doŋ romo turo gicikke ma con Lubaŋa otyeko mokone woko-ni, dok bene pe bimiyo gin ma ociko lal nono. ¹⁸ Ka ce leyo jami ma gimiyo ki Abraim obedo pi cik, meno noŋo pe lubo kit cikke mo. Ento Lubaŋa yam omiyo bot Abraim i gicikke macalo mot. ¹⁹ Cik dok mitte piŋo? Cik yam gimedo ni wek turo cik onen woko ka maleŋ, nio waŋ ma lakwaro Abraim ma giketo cikke pire-ni obino. Lumalaika aye ma ceŋ gukelo cik, ci gumiyo i ciŋ ŋat ma larib dano kacel. ²⁰ Ento larib dano pe mitte pi ŋat acel keken, ento Lubaŋa aye tye acel. Gin mumiyo giketo cik ²¹ Cik doŋ tye ka pyem ki gicikke pa Lubaŋa? Pe kit meno gire, pien ka nene gimiyo cik ma twero miyo kwo, kono kwano dano ni kite atir obedo pi lubo cik. ²² Ento coc ma yam gicoyo otweyo dano ducu macalo lumabuc i te twero me bal, wek cikke ma nene giciko pi ye Yecu Kricito gimi bot jo muye en. ²³ I kare ma niye peya obino, cik aye munoŋo gwokowa, kun otweyowa woko macalo mabuc, nio waŋ ma ginyuttiwa niye. ²⁴ Kit meno cik aye obedo lagwokwa ma myero olowa nio ka Kricito obino, ka doŋ gicako kwanowa ni kitwa atir pi niye. ²⁵ Kit ma doŋ niye tye-ni, pe dok wabedo i te twero pa lagwokwa; ²⁶ pien wun ducu doŋ wudoko litino pa Lubaŋa pi niye Yecu Kricito. ²⁷ Wun jo ducu ma doŋ gityeko batijawu i nyiŋ Kricito, doŋ wuruko Kricito macalo wuruko boŋowu. ²⁸ Apokapoka mo doŋ pe i kin Lajudaya ki dano me Grik, i kin opii ki ŋat ma lone kene, kadi i kin laco ki dako, pien wun ducu doŋ wurom i Kricito Yecu. ²⁹ Ka wun doŋ wulwak pa Kricito, ci doŋ wun likwayo pa Abraim; dok pi cikke pa Lubaŋa, wun lule gin ma yam en ociko bot Abraim.