¹ Lacen i ŋe mwaka apar wiye aŋwen dok acito i Jerucalem aye kacel ki Barnaba, dok bene atero Tito me wot kacel kweda. ² Gin mumiyo acito kunnu, pien Lubaŋa onoŋo onyutta ni myero aciti. Ka ao kunnu, ci aketo lok me kwena maber ma abedo ka titone bot Lurok-ki i nyimgi, i muŋ bot jo ma ŋene, wek ticca ma atiyo, nyo ma doŋ atyeko tiyone con, pe obed me nono. ³ Ento Tito ma onywako wot kweda, kadi bed onoŋo en Lagrik, pe gibedo ka diye ni myero gilire. ⁴ Kadi bed onoŋo tye jo mogo ma gikelogi i kinwa ma pe gin utmego kikome, magi gin jo ma gubino ka roto kit kuc ma watye kwede i Kricito Yecu, ka wek gilokwa wadok opii. ⁵ Ento kare mo obedo pe ma waye ni gulowa, wek wagwok lok ada me kwena maber piwu. ⁶ Ki tuŋ bota pe onoŋo aparo pi jo ma giŋene ni gin ludito, pien Lubaŋa gire pe leŋŋe tuŋ bot ŋat mo pi kit ma en tye kwede. Gin jo ma ŋenenu pe gumedda gin mo. ⁷ Ento guniaŋ ni Lubaŋa doŋ omiya tic me tito lok me kwena maber bot Lurok, ma rom ki kit macalo yam gimiyo ki Petero tic me tito lok me kwena maber bot Lujudaya; ⁸ pien ŋat mutiyo kacel ki Petero tic me tito lok me kwena maber bot Lujudaya, obedo ka tic i koma bene bot Lurok. ⁹ Yakobo ki Kepa ki Jon ma yam giŋeyogi ni gubedo lutel, ka doŋ guniaŋ pi kica ma Lubaŋa omiya ci gugamo an ki Barnaba macalo lutic wadigi, kun gipoko tic ni wan myero wacit bot Lurok ki gin gubecito bot Lujudaya. ¹⁰ Gin gulegowa lok acel keken ni myero wapo pi lucan, ma man aye onoŋo gin ma aketo cwinya ni myero atim. ¹¹ I kare ma Kepa obino i Antiokia ajuke woko atyer ka maleŋ pien onoŋo otimo gin ma pe ber. ¹² Pien i kare ma jo mogo ma gua ki bot Yakobo peya gubino, onoŋo Kepa nywako cam kacel ki Lurok; ento ka gubino ci Kepa ojer onyiko woko cen, opokke woko ki botgi pi lworo dul pa jo ma mito ni jo muye Kricito myero koŋ gilirgi. ¹³ Lujudaya mukene gucako lubo kit pa Kepa me goba, kadi ki Barnaba bene ocako ŋak woko kun lubo kitgi ma pe nyuto cwiny me ada. ¹⁴ Ento i kare ma aneno ni guweko ada me lok me kwena maber woko ma onoŋo tamgi tye ka wot atata, ci awaco bot Petero i nyimgi ducu ni, “Ka in ma Lujudaya-ni ilubo kit pa Lurok, ma pe ibedo calo Lajudaya, ci itwero diyo Lurok niŋniŋ me lubo kit pa Lujudaya?” ¹⁵ Wan kikomwa wan Lujudaya nia wa i anywalli, pe wan Lurok, jo ma lubalo-gu. ¹⁶ Ento waŋeyo ni dano pe gikwano ni kite atir pien tiyo gin ma cik mito, kono pi ye Yecu Kricito keken. Kadi wa wan Lujudaya bene watyeko ye Yecu Kricito wek gikwanwa ni kitwa tir pi ye Kricito, ento pe pi tiyo gin ma cik mito; pien pe gibikwano dano mo ni kite atir pien tiyo gin ma cik mito. ¹⁷ Ento kombeddi, ma watye ka yelle wamito gikwanwa ni kitwa atir pi Kricito, ka wan kikomwa dok ginoŋo ni wan lubalo, ci Kricito mono obedo lakwena me tic pi bal? Adadaneni pe kumeno! ¹⁸ Ka dok agero gedo ma yam amuko areto woko piny-nyi odoco, ci an kara labal marac. ¹⁹ Pien pi temo tiyo gin ma cik mito omiyo yam ato pi cik, wek abed kwo tuŋ bot Lubaŋa. ²⁰ Yam gigura i kom yatariya kacel ki Kricito; pe dok an ma akwo-ni, ento Kricito aye ma bedo kwo i iya. Kwo ma kombeddi atye kwede i komani, abedo kwo pi ye Wod pa Lubaŋa, ma ceŋ omara ka omine gire pire kene pira. ²¹ An gira pe abolo kica pa Lubaŋa; pien ka gikwano dano ni kitgi atir pi cik, ci Kricito yam oto nono laboŋo tyen lok mo.