¹ Kricito doŋ otyeko gonyowa woko ki i pii wek wabed jo me kuc ma walone kenwa. Wacuŋ doŋ matek; pe dok wuye rwako tyenwu i okol me opii. ² Wuwiny ba, an Paulo kombeddi awacciwu ni, ka gilirowu, ci kony pa Kricito doŋ pe botwu. ³ Anwoyo lokka doki bot dano acel acel ma giliro ni, en doŋ tye ki banya me lubo cik ducu. ⁴ Wun jo ma wumito ni gikwanwu ni kitwu atir pi lubo cik, wun doŋ wupokke woko kenwu ki bot Kricito; doŋ wunyiko woko cen, wubwoto kica pa Lubaŋa. ⁵ Watye ki gen madwoŋ pi Cwiny Maleŋ me noŋo kit ma atir ma gimiyo pi niye. ⁶ Pien i Kricito lirre nyo bedo ma pe giliro ducu konygi pe; niye keken aye konyo, ma ticce aye mar. ⁷ Onoŋo nene wucako riŋo ŋwec maber; aŋa mono ma dok ogeŋowu i lubo lok me ada? ⁸ Bito dano macalo man pe oa ki bot ŋat ma ceŋ olwoŋowuni. ⁹ Ka gitedo mugati, tobi matidi mo keken aye yenyo moko woko ducu. ¹⁰ Atye ki gen i Rwot ni, tamwu pe bipokke ki mera; ento ŋat mo-ni ma tye ka balo cwinywu woko-ni, kadi bed en aŋa, Lubaŋa biŋolle kop. ¹¹ Utmega, piŋo dok pud giuna, ka an kikoma aye atito ni lirre ber? Ka nene atito lok kumeno, kono pe tye gin mo i lok i kom yatariya ma obedo macalo ajut ma yoko dano. ¹² Kono jo ma tye ka balo cwinywu-ni gumedde anyim, gukolle woko kekengi gigi! ¹³ Utmega, yam gilwoŋowu me bedo ki kuc kun wulone kenwu; ento pe dok wulok kucwu odok me cobo mit ma ginywalowu kwede. Ma ka timo meno, myero dano acel acel omine me konyo luwote pi mar keken. ¹⁴ Pien cik ducu giribogi woko i lok acel keken ni, “Mar lawoti macalo imarre keni.” ¹⁵ Ento ka wubedo ka kane kekenwu ki lakwu, kun wutimo dano wadiwu calo guci, myero wugwokke wek pe wutum woko kekenwu. ¹⁶ Ento awacciwu ni, wuye Cwiny Maleŋ pa Lubaŋa aye otelwu, wek pe wucob miti me kit pa dano. ¹⁷ Pien miti me kit pa dano pyem ki miti pa Cwiny Maleŋ, dok miti pa Cwiny Maleŋ bene pyem ki miti me kit pa dano. Gin aryo-ni gimon, meno aye gin ma geŋowu tiyo gin ma wumito. ¹⁸ Ento ka Cwiny Maleŋ aye ma tye ka telowu, ci doŋ pe wubedo i te cik. ¹⁹ Tic me kit pa dano ma nen woko ka maleŋ gin en: tim kwele, caro, tarwaŋ, ²⁰ woro cal jogi, talo dano, mone, daa, nyeko, kiniga, laro dito, pyem, pokke, ²¹ nek, mero ki koŋo, cam me yomcwiny me miŋo marac, ki mogo mukene macalo meno. Pud dok ajukowu matek, kit macalo nene koŋ ajukowu, ni, jo ma timo gin macalo magi, ker pa Lubaŋa pe bibedo megi. ²² Ento nyig ma nyak pi Cwiny Maleŋ gin aye mar, yomcwiny, kuc, diyo cwiny, kica, ber, gen, ²³ mwolo, gwokke ken; cik mo pe ma kwero gin macalo magi. ²⁴ Dano ma gin jo pa Kricito Yecu doŋ gutyeko neko par ki miti me kit pa dano woko, ci guguro woko bene i kom yatariya. ²⁵ Ka wabedo kwo pi Cwiny Maleŋ, ci myero doŋ wawotu kun walubo en. ²⁶ Pe myero wabed ka wakke awaka, pe wabutte ki tek i kom luwotwa, dok pe myero wabed ki nyeko i kinwa kenwa.