¹ Wulub kit pa Lubaŋa, pien wun litinone ma en maro. ² Wubed kun wulubo yo me mar, macalo Kricito ceŋ omarowa, ci omine kene piwa wek ebed macalo gitum ma ŋwece kur ma gityero bot Lubaŋa. ³ Doŋ pi meno tim kwele ki tim caro caro ducu, ki woro me lim pe myero gilwoŋ nyiŋgi i kinwu; meno aye gin ma myero bot jo pa Lubaŋa. ⁴ Gin me lewic ki lok miŋmiŋ, nyo kadi ki loko lok oree ma konnye pe, myero bene pe owinnye botwu. Ma ka timo jami magi, wumi pwoc bot Lubaŋa. ⁵ Wuniaŋ maber ni, pe tye ŋat mo i kin lutim tim abor nyo tim caro, nyo jo ma wor i kom jami, ma binoŋo dul mo ma bedo mere i ker pa Kricito ki pa Lubaŋa. ⁶ Pe wuye ŋat mo obwolwu ki lok mogo ma tere pe, pien kiniga pa Lubaŋa bino i kom jo ma pe winyo lokke pi kit timgi nu. ⁷ Pi meno, pe wuribbe kwedgi. ⁸ Yam wubedo colpiny, ento kombeddi doŋ wudoko dyeceŋ i Rwot; kitwu myero doŋ obed kit pa jo me ceŋ. ⁹ Pien nyig ma onyak pi ceŋ nen woko i gin ducu ma tye maber, dok atir, ki me ada. ¹⁰ Wutem pwonyo gin ma yomo cwiny Rwot. ¹¹ Pe wuribbe i tic mo ducu me piny macol ma pe konyo, ento wunyut kit tic meno woko ka maleŋ. ¹² Pien bedo me lewic me loko i kom gin ma gitiyo i muŋ aloka keken. ¹³ Gin mo-ni ma leŋo onyuto nen woko ka maleŋ; pien gin ma nen ka maleŋ noŋo tye i ceŋ. ¹⁴ Man aye gin mumiyo giwaco ni, “Co woko, in ma inino, cer woko ki i kin jo muto, ci Kricito bimenyi.” ¹⁵ Wugwokke maber i kwo ma wubedo kwede; pe wubed macalo jo ma kwiya piny, ento calo jo maryek. ¹⁶ Kare ma tye myero iti kwede i yo maber, pien nino me kare-ni opoŋ ki gin marac. ¹⁷ Pi meno, pe wubed miŋ, ento wutem niaŋ gin ma Rwot mito wuti. ¹⁸ Dok pe myero wumer ki koŋo, pien mero kelo kit me caro. Ma ka mero, wuwek Cwiny Maleŋ opoŋ cwinywu, ¹⁹ kun wuloko i kinwu kekenwu lok me jabuli, ki wer, ki wer me cwiny, kun wuwero dok wukuto wer me pako Rwot ki cwinywu ducu. ²⁰ Wupwo Lubaŋa Won i kare ducu pi jami ducu i nyiŋ Rwotwa Yecu Kricito. Co ki mongi ²¹ Wumine kenwu i te loc pa jo mukene, ŋat man bot lawote, pi woro Kricito. ²² Wun mon wumine kenwu i te loc pa cogwu, macalo wumine kenwu bot Rwot. ²³ Pien laco obedo lawi dakone, macalo Kricito en aye lawi lwak muye en, en bene lalargi; gin lwak meno aye kome. ²⁴ Macalo lwak muye Kricito gibedo i te locce, kit meno mon bene myero gubed i te loc pa coggi i kit yo ducu. ²⁵ Wun co bene wumar monwu i kit macalo Kricito omaro kwede lwak muye en, ci omiyo kwone pigi, ²⁶ wek elonygi gubed leŋ, ma doŋ otyeko lwokogi ki pii ki lok, ²⁷ wek ekel lwak muye en i nyime kene macalo nyako mamwonya twatwal, kun pe tye ka mo ma ojuŋŋe i kome, nyo kadi ki poyo mo bene pe, wek obed leŋ laboŋo ka mo murocce. ²⁸ Kit meno, co bene gumar mongi macalo gimaro komgi kengi. Ŋat ma maro dakone, maro kome kene. ²⁹ Pe tye ŋat mo ma dag kome kekene, ento pito ki cam dok gwoko maber macalo Kricito bene tiyo ki lwak jo muye en, ³⁰ pien wan wa dul kome. ³¹ Yam gicoyo ni, “Pi lok man dano biweko wonne ki minne, ci giribbe woko gin ki dakone, gin aryo doŋ gidoko kom acel.” ³² Man muŋ madit twatwal. An ki tuŋ bota agonyo tyen lokke ni Kricito ki lwak muye en. ³³ Pi meno, laco acel acel i kinwu myero omar dakone macalo maro kome kene, ki dako bene myero onen ni eworo cware.