¹ Pi meno, an ma abedo lamabuc pi Rwot alegowu ni wulub kit kwo ma myero, ma rwatte ki lwoŋo ma yam gilwoŋowu iye. ² Wuwor jo mukene, wubed mwol, dok wubed jo ma ciro gin ducu ma balo cwiny dano, kun ŋat acel acel diyo cwinye i kom lawote ki mar. ³ Wuket tek me gwoko ribbe ma Cwiny Maleŋ omiyowu wek wubed acel i twec me kuc. ⁴ Kom tye acel, Cwiny Maleŋ bene tye acel, kit macalo gen bene tye acel ma Lubana olwoŋowu iye. ⁵ Rwot tye acel, niye acel, batija acel, ⁶ Lubaŋa bene tye acel ma en aye Won dano ducu. En loyo jami ducu, tiyo i gin ducu, dok bene tye i gin ducu. ⁷ ŋat acel acel i kinwa olimo mot me kica, ma oporre ki mot ma Kricito omiye. ⁸ En mumiyo yam giwaco ni, “Ka ceŋ oito malo, otero opii mapol ma en oyako i lweny, ci omiyo mot bene bot dano.” ⁹ “Oito malo” te lokke aŋo? Te lokke ni olor piny bene i lobo ka matut. ¹⁰ ŋat mulor piny en acel-lu bene aye oito malo ka mabor i ŋe polo ducu, wek epoŋ jami ducu woko liweŋ. ¹¹ Mot ma en omiyo gin en: omiyo jo mogo me bedo lukwena, jo mukene me bedo lutit lok pa Lubaŋa, jo mukene gubed lutit lok me kwena maber, jo mukene lukwat ki lupwony. ¹² Ticgi obedo me yubo jo pa Lubaŋa i ticgi me konyo dano, dok me doŋo kom Kricito, ¹³ nio waŋ ma wan ducu wadoko acel i niyewa ki i ŋeyo Wod pa Lubaŋa, nio ka wadoko dano mucwiny, ma wadoŋo warom ki Kricito, ma en aye jami ducu opoŋ iye. ¹⁴ Pi meno pe dok myero wabedu calo litino ma giweko yamo me pwony mapatpat wirogi dwokogi tuŋŋi ki tuŋŋi; ryeko pa dano, ki lok ma giporo me goba, pe dok bimiyo wacabbe acaba. ¹⁵ Ma ka meno, myero walok lok ada ki mar, wek wamedde, wadoŋu malo i kit yo ducu nio bot Kricito, ma en aye lawiwa. ¹⁶ En aye wic, dul kom ducu guribbe woko i kome, dok gukubbe kacel i waŋ mwot ducu ma tye iye. Ka dul acel acel tye ka tiyo ticce kakare, miyo kom doŋo maber i mar. Kwo manyen i Kricito. ¹⁷ En mumiyo awaco lok man botwu kun acikowu i Rwot ni, pe myero pud dok wubed i kit ma Lurok gibedo kwede, i tamgi ma konnye pe. ¹⁸ Tamgi doŋ onyobbe woko, pe doŋ gitwero niaŋ gin mo, kwo ma Lubaŋa miyo nen gin ma welo ki tuŋ botgi, pi kwiya piny ma obino botgi pi cwinygi ma odoko nwaŋ. ¹⁹ Gin pe doŋ giparo gin mo, oweko doŋ gumine kengi i tim me tarwaŋ, dok bene giwor matek i timo lwak tim caro caro mapol. ²⁰ Ento lok kom Kricito yam pe gipwonyowu kit meno, ²¹ ka kono nene wuwinyo lok i kome ada, dok gipwonyowu, wun jo ma lubo en, ki lok ada ma tye i Yecu. ²² Kit kwowu macon ma yam wubedo kwede ca, kombeddi myero doŋ wuwek obedi; kit kwo maca doŋ oballe woko pi miti maraco ma obwolowu. ²³ Wuwek Lubaŋa doŋ oroc tam me cwinywu odok manyen, ²⁴ ka doŋ wuruk kit pa dano manyen ma giketo i cal pa Lubaŋa kikome i ada me kit ma atir ki maleŋ. ²⁵ Pi meno, wuwek goba obedi; dano acel acel myero olok lok ada bot dano lawote, pien wan watye macalo dul kom luwotwa. ²⁶ Ka kiniga omakowu, pe wupot i bal; ceŋ pe myero opoti ma noŋo pud wujul wutye ki kiniga i cwinywu, ²⁷ dok bene pe wumi kare ki Catan. ²⁸ Dano ma yam bedo ka kwalo jami pa jo mukene myero doŋ owek kwo obedi; myero en ocak tiyo tic maber ki ciŋe, wek onoŋ gin ma myero opok ki jo ma megi pe. ²⁹ Lok mo marac myero pe okatti ki i dogwu; wulok lok mabeco keken ma doŋo tam pa dano i yo ma mitte, wek jo ma winyo lokwu gunoŋ kony ki iye. ³⁰ Pe wumi Cwiny pa Lubaŋa okum, en Cwiny ma gimiyowu me bedo lanen ma gimwono woko doŋ i komwu pi kuro nino ma gibikokowu iye. ³¹ Wuwek doŋ keccwiny ducu, ki waŋ-ic ki kiniga, da i wi dano mukene, yet, kacel ki raccwiny ducu. ³² Wubed jo ma lukica ki cwiny maber; dano acel acel myero otim ber bot lawote. Wutim kica i kinwu kekenwu ki luwotwu i kom balwu, macalo Lubaŋa otimowu kica i Kricito.