¹ Pi lok man, alego Lubaŋa piwu, an Paulo ma abedo lamabuc pi Kricito piwu wun Lurok. ² Abedo ki tam ni wun doŋ wutyeko winyo kit ma Lubaŋa omiyo abedo lakan-lim me kicane ki tuŋ botwu. ³ dok bene kit ma onyutta kwede muŋŋe, omiyo aŋeyo, macalo doŋ atyeko coyo pire macekcekki. ⁴ Ka wukwano ci wutwero neno maber kit ma aniaŋ kwede i muŋ ma otiko Kricito. ⁵ I kare mukato yam Lubaŋa pe onyuto muŋ man bot dano adana-ni, ento kombeddi doŋ onyuto bot lukwenane maleŋ ki lutit lokke, pi Cwiny Maleŋ. ⁶ Muŋ meno tye kit man ni, pi lok me kwena maber omiyo Lurok doŋ gudoko lule lonyo pa Lubaŋa kacel ki Lujudaya; gudoko dul kom acel kwedgi, gin bene gunoŋo gin mo ducu kacel kwedgi ma yam Lubaŋa ociko pire i Kricito Yecu. ⁷ An giketa abedo latic me lok me kwena maber pi mot me kica pa Lubaŋa, ma omiya pi tic me twerone. ⁸ Kadi bed atidi twatwal ki i kin jo pa Lubaŋa ducu, ento en omiya mot man me kica me tito lok me kwena maber bot Lurok i kom lonyo madwoŋ pa Kricito ma tere pe tatte, ⁹ dok me miyo kit ma en ocobo kwede yub mere me muŋ onen woko ka maleŋ bot jo ducu. Onoŋo Lubaŋa mucweyo jami ducu-ni okano muŋ man pi kare ducu mukato aŋec. ¹⁰ wek kombeddi oti ki lwak jo muye Yecu me miyo luloc ki wegi twero ducu ma tye i polo guŋe ryeko pa Lubaŋa ma kite patpat. ¹¹ Man lubo tam pa Lubaŋa ma onoŋo yam tye con, ma en ocobo i kom Yecu Kricito Rwotwa. ¹² pire omiyo wan jo ma waye Yecu walimo tekcwiny, pien oyabo botwa yo me o i nyim Lubaŋa ki gen. ¹³ En mumiyo alegowu ni, pe myero cwinywu odok nyap pi can ma gitye ka una kwede piwu; can man aye kelo botwu deyo. ¹⁴ Lok man aye mumiyo arumo coŋa i nyim Lubaŋa Won, ¹⁵ en ka ma nyiŋ man me won ocuŋ iye i doggola pa jo me odi ducu ma tye i polo ki ma tye i lobo. ¹⁶ Alego ni pi lonyone me deyo myero omi Cwiny mere opoŋwu ki teko ki kero madwoŋ i iwu. ¹⁷ Kricito bene obed i iwu pi niyewu. Dok bene alego ni Lubaŋa omi wucuŋ matek i mar macalo yat ma lwite odonyo matut i ŋom, ¹⁸ wek wubed ki teko, ki cwiny me niaŋ, kacel ki jo pa Lubaŋa ducu, kit ma mar pa Kricito lac kwede, kit mabor kwede, ki kit ma odoŋo kwede malo, dok kit ma tut kwede, ¹⁹ wek wuŋe mar pa Kricito ma kato ŋec ducu, wek wupoŋ ki gin mo ducu ma opoŋ i i Lubaŋa. ²⁰ Deyo obed bot Lubaŋa ma twero tiyo tic madwoŋ twatwal ma kato gin ma watwero lego pire nyo keto i tamwa, pi tekone ma tye ka tic i komwa. ²¹ Deyo obed bote nakanaka i Kricito Yecu ki i lwak jo ducu muye en, i kare pa yalwak ducu. Amen.