¹ Wun litino, wuwiny lunyodowu i Rwot, pien meno aye ber. ² Yam gicoyo ni, “Wor woru ki meni.” Man aye cik mukwoŋo ma giciko pi gin mo maber ma bia ki iye, ni, ³ “wek ibed ma nyimi leŋ dok iri i lobo pi kare malac.” ⁴ Dok wun wego, pe wuket kolo i kom litinowu ma miyo kiniga makogi, ento wupitgi gudoŋ maber kun wupwonyogi dok wunyebogi ki kit mabeco ma Rwot pwoyo. Lutic ki luditogi. ⁵ Wun lutic, wuwiny luditowu me lobo man ki cwinywu acel, macalo wuwinyo Kricito, kun wulworogi ki myelkom. ⁶ Ticwu myero pe obed tic ma yeŋo waŋ keken me yomo cwiny dano, ento myero wuti gin ma Lubaŋa mito ki cwinywu ducu, macalo wun lutic pa Kricito. ⁷ Wuti ticwu ki cwiny maber, macalo wutiyo bot Rwot, ento pe wutiyo bot dano ni gunen wek gupwowu, ⁸ kun wuŋeyo ni, gin mo ducu ma dano mo otiyo maber, Rwot bicule pire ma rom aroma ki ticce ma en otiyo, kadi en latic nyo dano ma lone kene. ⁹ Dok wun wegi lutic, wuti bene ki luticwu i yo acel-lu; wuwek burogi obedi, kun wupo ni ladit ma loyogi wa ki wun bene tye i polo, en tero jo ducu maromrom. ¹⁰ Me agikkine, wubed tek i Rwot ki twero me tekone. ¹¹ Wuruk jami lweny ducu ma Lubaŋa miyo, wek wucuŋ kun wugeŋŋe kekenwu i roro pa Catan. ¹² Pien wan pe walwenyo i kom dano ma tye ki kom ki remo, ento walwenyo ki luloc ki wegi twero ma woko, ki i kom gin ducu ma loyo wi lobo ducu i kare man me colpiny, dok ki dul mony mogo maraco me cwiny ma tye i polo. ¹³ Pi meno myero wukwany jami lweny ducu ma Lubaŋa miyo, wek obikonywu me cuŋo matek i nino marac, pud wubicuŋ ma noŋo doŋ wuyelle i kit yo ducu. ¹⁴ Pi meno, myero wucuŋ ma wutweyo pyerwu woko ki ada, wuruk bene kit ma atir wek obed nyonyo me geŋo korwu, ¹⁵ kun wuyubbe me tito lok me kwena maber me kuc ma bedo macalo war ma wuruko i tyenwu. ¹⁶ Makato ducu, niye aye myero obed kwotwu ma bimiyo wutwero neko mac ki i kom atero ma Larac bayo. ¹⁷ Wumak larre aye obed tok nyonyo me wiwu, ki lok pa Lubaŋa ma en aye pala lucwan pa Cwiny Maleŋ. ¹⁸ Wuleg kare ducu i Cwiny ki lega me bako dog. Wubed ma wuyubbe i lega kare ducu kun wuciro peko, kun wulego pi jo pa Lubaŋa ducu. ¹⁹ Wuleg bene pira wek Lubaŋa oyab doga, omiya gin ma myero aloki, wek atuc muŋ me lok me kwena maber ki tekcwiny. ²⁰ An lakwenane ma rom ki ŋat mo-ni ma cuŋ pi lobone, ento gitweya woko ki nyor. Lubaŋa omiya atit ki tekcwiny, kit ma myero alok kwede. ²¹ Tukiko, ominwa ma gimaro dok en latic pa Rwot me agena, bitittiwu lok ma dok i koma ki i kom ticca. ²² Acwalo en botwu pi lok man kikome, wek en omi wuŋe kit ma wan watye kwede, dok ocuk cwinywu. ²³ Kuc ki mar ki niye ma a bot Lubaŋa Won ki Rwotwa Yecu Kricito obed bot utmegiwa. ²⁴ Kica pa Lubaŋa obed bot jo ducu ma maro Rwotwa Yecu Kricito ki mar ma pe to.