¹ Ka pud gitye ka lok ki dano, ci ajwagi ki ladit askari me ot pa Lubaŋa ki Lucadukayo gubino botgi, ² ma gujul woko, pien onoŋo gipwonyo lwak kun gitito pi cer pa Yecu ki i kin jo muto atyer. ³ Ka gumakogi ci guketogi i mabuc nio wa odiko, pien onoŋo piny doŋ oyuto woko. ⁴ Ento lwak jo mapol i kin jo ma guwinyo lokgi guye, wel dano omedde oo alip abic. ⁵ Ka piny oru, ci luloc ki ludoŋo ki lupwony-cik gucokke i Jerucalem, ⁶ kacel ki Anac, ajwaka madit, ki Kayapa ki Jon ki Alegijanda, ki lwak ducu ma gitye i doggola pa ajwagi madito. ⁷ Ka giketogi i dyere, gupenyogi ni, “Wun wutiyo man pi kit tek aŋo, nyo pi nyiŋ aŋa?” ⁸ Ka Petero opoŋ ki cwiny Maleŋ, ci owaco botgi ni, “Wun lulo lwak ki ludoŋo, ⁹ ka tin gipenyowa lok mudok i kom gin maber ma otimme i kom laput, ki kit ma dano man ocaŋ kwede, ¹⁰ wek oŋene botwu ducu ki bot lwak jo Icrael ducu ni, pi nyiŋ Yecu Lanajaret, ma wun wuguro i kom yatariya, ma Lubaŋa ocero woko ki i kin jo muto-ni aye laco man ocuŋ i nyimwu ma kome yot. ¹¹ Man aye got ma wun lugedo wukwero woko ento ma odoko got madit me twok ot. ¹² Pe tye larre mo i ŋat mukene, pien pe tye nyiŋ mo mukene i wi lobo man ma gimiyo ki wan dano ma myero walarre iye.” ¹³ Ka doŋ guneno tekcwiny pa Petero ki Jon, ma guniaŋ bene ni gin jo mogo ata ma pe gupwonnye, ci guuro; ka doŋ guniaŋ ni gin yam gubedo kacel ki Yecu. ¹⁴ Ento ka guneno laco ma gicaŋo-ni ocuŋ ka ŋetgi, lok mo ma myero guwac doŋ obedo pe. ¹⁵ Ka gucikogi ni koŋ gukat woko ki i Lukiko, ci guyubo lok kekengi, ¹⁶ kun giwaco ni, “Jo man wabitimogi niŋniŋ? Pien gutyeko tiyo lanyut ma kome nen bot dano ducu ma gibedo i Jerucalem, wan bene pe watwero kwerone. ¹⁷ Ento pi kit me juko wek pe oket orom kin dano, ber wajukugi ni pe gimedde ki tito bot ŋat mo pi nyiŋ man.” ¹⁸ Ci gulwoŋogi gucikogi ni pe gutit kadi pwonyo lok mo i nyiŋ Yecu kadi matidi mo. ¹⁹ Ento Petero ki Jon gugamo ni, “Wun wuŋol ka ce nen ber i waŋ Lubaŋa me winyowu makato winyo Lubaŋa; ²⁰ pien wan pe watwero weko tito pi gin ma yam waneno ki ma wawinyo.” ²¹ Ka doŋ guburogi matek, ci guwekogi gucito; pe gunoŋo yo me keto can i komgi pi lwak dano, pien gin ducu gubedo ka pako Lubaŋa pi gin mutimme-ni. ²² Dano ma lanyut me twer me caŋo dano otimme i kome-ni onoŋo doŋ dit ma mwakane kato ka pyeraŋwen woko. ²³ Ka gigonyogi ci gucito bot luremgi ka gutito botgi gin ma ajwagi madito pa Lubaŋa ki ludoŋo guwaco botgi. ²⁴ Ka guwinyo, ci gutiŋo dwangi malo kacel bot Lubaŋa kun giwaco ni, “Ai Rwot Lubaŋa, in ma con iketo polo ki lobo ki jami ducu ma tye i igi, ²⁵ con iloko i dog kwarowa Daudi ma laticci i tek pa Cwiny Maleŋ ma owaco ni, ‘Piŋo Lurok gitye ka wo kacel, dok piŋo rok mapol gipiro lok ma konnye pe? ²⁶ Luker me lobo gurye i tyeŋ, ki luloc bene gucokke gugurre kacel i kom Rwot ki i kom ŋat ma en oyero ka doŋ owiro.’ ²⁷ “Adada gucokke gugurre kacel i gaŋ man i kom laticci maleŋ twal Yecu, en ma in iwiro ki moo, gin Kerode ki Pontio Pilato, kacel ki Lurok ki jo Icrael ducu, ²⁸ pi tiyo ducu ma yam iyubo pi tweroni ki mitti ni myero otimme. ²⁹ Iyo, Rwot, doŋ inen bura megi, ci imi wan luticci watit lokki ki tekcwiny laboŋo lworo mo, ³⁰ kun in iryeyo ciŋi me caŋo dano, wek lanyut ki taŋo mapol otimme i nyiŋ laticci Yecu maleŋ twal.” ³¹ Ka gutyeko lega, ci kabedo ma gugurre iye-ni oyeŋŋe, gin ducu gupoŋ ki Cwiny Maleŋ, ci gutito lok pa Lubaŋa ki tekcwiny laboŋo lworo. ³² Lwak jo muye ducu gubedo ki cwiny acel ki tam acel, kun pe tye ŋat mo ma waco ni lim ma etye kwede-ni mere kene, ento gunywako jami ducu kacel. ³³ Lukwena gubolo lok i kom cer pa Yecu ki tek, ci gum madit opoto i komgi ducu. ³⁴ Pe tye ŋat mo i kingi ma gin mo orem bote, pien jo ma gitye ki pottigi nyo odigi gucatogi woko, ka gukelo lim mua iye, ³⁵ guketo ka tyen lukwena, ka gupoko kit ma mitte bot ŋat acel acel. ³⁶ Kit meno Yucepu ma nyiŋe me aryone lukwena gucako ni Barnaba (ma te lokke ni ŋat ma jiŋo cwiny dano), Lalevi ma ginywalo i Caiprac, ³⁷ ocato potone ma en tye kwede, ci okelo limme oketo ka tyen lukwena.