¹ Ento laco mo ma nyiŋe Anania ki dakone Capira gucato jamigi, ² ci en okano dul lim mogo woko ma dakone bene ŋeyo, ka okelo dul acel, ci oketo ka tyen lukwena. ³ Ento Petero owacce ni, “Anania, piŋo Catan opoŋo cwinyi, omiyo itemo bwolo Cwiny Maleŋ kun ikano dul lim ma oa i loboni? ⁴ Ka nene pe icato, kono pe obedo meri giri? Dok ka doŋ icato, pe onoŋo tye giri i te twerri? Piŋo itamo lok macalo meno i cwinyi? Pe ibwolo dano ento ibwolo Lubaŋa giri.” ⁵ Ka Anania owinyo lok meno, ci opoto piny oto woko cut, ci lworo madit omako jo ducu ma guwinyo pire. ⁶ Litino awobe gua ci guboyo kome, ka gutere woko ka yike. ⁷ Lacen ka cawa okato kine ka adek, ci dakone obino odonyo, kun pe ŋeyo gin mutimme-ni. ⁸ Petero owacce ni, “Titta ka onoŋo wucato lobowu i wel ma rom meno.” ⁹ Ento Petero owacce ni, “Piŋo wun aryo ducu wuribbe ka bwolo Cwiny pa Rwot? Nen, tyen jo muyiko cwari ka tye i doggola, in bene gibiteri woko.” ¹⁰ Ci dako opoto piny ka tyene, oto woko cut, ka litino awobe gubino gudonyo i ot, ci gunoŋo en oto, ci gutere woko, guyike ka ŋet cware. ¹¹ Lworo madit omako lwak jo muye Yecu ducu, ki jo ducu ma guwinyo lokke. ¹² Lwak lanyut ki taŋo mapol otimme i kin dano ki i ciŋ lukwena. Onoŋo gin ducu gibedo kacel i te baraja pa Solomon. ¹³ Pe tye ŋat mo ma oette me ribbe kwedgi, ento onoŋo dano guketo deyo madit i komgi. ¹⁴ Lwak jo mapol ma guye gumedde bot Rwot, co wa ki mon, ¹⁵ mumiyo gikelo lutwo wa i yo, gipyelogi i wi kitanda ki i wi gibuto, wek ka Petero kato ka ŋetgi, ci tipone owok i kom jo mogo i kingi. ¹⁶ Lwak dano bene gua ki i gaŋ murumo Jerucalem, gucokke kun gikelo lutwo ki jo ma cen marac yelogi, ci gin ducu gucaŋ. ¹⁷ Ento ajwaka madit oa kacel ki jo ma gitye kwede, ma gin aye dul pa Lucadukayo, ma nyeko omakogi matek, ¹⁸ gumako lukwena guketogi i mabuc. ¹⁹ Ento i dyewor lamalaika pa Rwot oyabo dog ot mabuc, ci okelogi woko kun waco ni, ²⁰ “Wucit wucuŋ i ot pa Lubaŋa, wutit bot dano lok me Kwo man ducu.” ²¹ Ka guwinyo lok man, ci gudonyo i ot pa Lubaŋa okogweno gubedo ka pwonyo dano. Ka ajwaka madit obino ki jo ma onoŋo gitye kwede, ci gucoko Lukiko kacel ki ludoŋwo ducu pa jo Icrael, ka gucwalo kwena ka omogi ki i mabuc. ²² Ento ka ludito pa askari gucito, pe gunoŋogi i buc, ka gudwoko lok ni, ²³ “Wanoŋo ot kol giloro maber, kun lukur-piny bene gucuŋ i doggola, ento ka wayabo ci pe wanoŋo ŋat mo iye.” ²⁴ Ka ladit pa askari me ot pa Lubaŋa ki ajwaka madit guwinyo lok meno, ci tamgi ocuŋ woko, kun gipennye kekengi kit ma lokke bitum kwede. ²⁵ Ka ŋat mo obino otittigi ni, “Jo ma wuketogi i ot kol-li, gitye gucuŋ i ot pa Lubaŋa ka pwonyo dano.” ²⁶ Ci ladit ki askarine gucito gukelogi, ento pe ki tek mo, pien onoŋo gilworo ni lwak celogi ki got. ²⁷ Ka doŋ gukelogi, ci guketogi i nyim lukiko, ka ajwaka madit openyogi, ²⁸ kun waco ni, “Wan wacikowu matek ni pe wupwony lok mo i nyiŋ man ento koni wupoŋo i Jerucalem woko pi pwonywu-ni, dok wumoko tamwu me kelo remo pa dano man i komwa.” ²⁹ Ento Petero ki lukwena mukene gudok iye ni, “Myero wawiny Lubaŋa makato dano. ³⁰ Lubaŋa pa kwarowa ocero Yecu ma wun wuneko ku wuŋabe i kom yat. ³¹ Lubaŋa otiŋe malo i ŋete yo tuŋ acuc i kabedo me deyo pi bedo Laker ki Lalar, wek jo Icrael gunoŋ kare me ŋut ci en owek balgi. ³² Wan aye lucaden me lok meno, kacel ki Cwiny Maleŋ ma Lubaŋa omiyo bot jo ma giwinye.” ³³ Ka guwinyo lok man, ci gutugge ki akeca ma gimito nekogi. ³⁴ Ento Laparicayo mo ma i lukiko ma nyiŋe Gamaliel, lapwony-cik ma dano ducu giworo, oa malo ci ociko ni koŋ gicwalgi woko pi kare manok. ³⁵ Ka owaco bot jo mucokke ni, “Jo Icrael, ber wugwokke i gin ma wutimo i kom jo man. ³⁶ Pien yam con i kare ca Teyuda otuc ci omine kene ni en e dano madit, ki jo mogo ma giromo ka miya aŋwen guribbe kwede; ento gineke woko ki jo ma gilube ducu guket woko ata. ³⁷ Dok i ŋeye Juda ma Lagalilaya dok otuc io kare me kwano wel dano, ci otero jo mukene ma gilube; en bene oto, jo ma gilube bene guket woko ata. ³⁸ Iyo, i lok ma tye kombeddi atito botwu ni cwinywu oa woko i kom jo man, wuwek gubedi; pien ka ce yub man nyo tic man pa dano, ci bigik ata, ³⁹ ento ka pa Lubaŋa, ci pe wubiloyogi, wun bene wubinen macalo wulwenyo i kom Lubaŋa!” ⁴⁰ Ci gujolo tamme, ka gilwoŋo lukwena gudwogo, ci gugoyogi kun gicikogi ni pe gulok i nyiŋ Yecu, ka doŋ giwekogi gucito. ⁴¹ Gua woko ki i nyim Lukiko ma onoŋo cwinygi yom pien Lubaŋa otamo ni gimyero pi dit man me noŋo lewic pi nyiŋ Yecu. ⁴² Dok nino ducu pe guweko pwonyo dano ki tito lok me kwena maber ni Yecu en aye Kricito ma Lubaŋa oyero i ot pa Lubaŋa ki i paco pa dano.