¹ I nino mo Petero ki Jon guito malo i ot pa Lubaŋa i cawa me lega, cawa aboŋwen ² Onoŋo tye dano mo laput nia i kare ma ginywale ma gitiŋo ci giketo i doggola ot pa Lubaŋa ma gilwoŋo Maber, pi lego kony bot jo ma gidonyo i ot. ³ Ka oneno Petero ki Jon gimito donyo i ot pa Lubaŋa, ci openyogi ni gumiye kony. ⁴ Petero kacel ki Jon guciko waŋgi i kome, ci Petero owacci, “Nen komwa.” ⁵ Ci oketo cwinye ka nenogi, kun geno ni gibimiye gin mo. ⁶ Ento Petero owacci, “Pe atye ki lim mo, ento amii gin ma atye kwede; i nyiŋ Yecu Kricito Lanajaret, woti.” ⁷ Ka omako bade lacuc ci otiŋe kwede malo; ci tyene ki odilo tyene omoko woko matek cut. ⁸ Oa, otirre ocuŋ, owoto odonyo kwedgi i ot pa Lubaŋa, ma woto kun pye, dok pako Lubaŋa. ⁹ Lwak jo mapol ducu gunene ka woto kun pako kwede Lubaŋa, ¹⁰ ci guniaŋ ni en dano ma yam lego kony i doggola Maber-ri. Guuro matek ma doggi otwo woko pi gin ma otimme i kome-ni. ¹¹ Ka pud omoko i kom Petero ki Jon, ci lwak dano ducu guriŋo gucokke botgi i te baraja ma gilwoŋo ni pa Solomon. ¹² Ka Petero onenogi, ci owaco bot lwak ni, “Wun jo Icrael wuuro lok man piŋo? Piŋo wuciko waŋwu i komwa macalo wan aye ma watimo lok man ki tekwa, nyo ni pien wan jo ma lworo Lubaŋa omiyo dano-ni owoto? ¹³ Lubaŋa pa Abraim, ki pa Icaka ki pa Yakobo, Lubaŋa pa kwarowa, yam oketo deyo i kom laticce Yecu ma wun wumiyo i ciŋ Pilato kun wukwere woko i kare ma Pilato oyubbe me gonyo en. ¹⁴ Ento wun wukwero en ŋat Maleŋ ki ma Kite Atir-ri, kun wulego ni omi botwu lanek. ¹⁵ Ci wuneko Won Kwo. Ento Lubaŋa ocere woko ki i kin jo muto, wan lucaden i kom lok man. ¹⁶ Pi nyiŋe, ki pi ye nyiŋe, en aye omiyo kom laco man odoko tek macalo wuneno dok wuŋeyo; pi ye Yecu omiyo laco man olimo yotkom i nyimwu ducu. ¹⁷ “Iyo, utmega, aŋeyo ni yam wutimo man ma onoŋo wukwiya, macalo luditowu bene. ¹⁸ Ento macalo yam Lubaŋa oloko i dog lunebine ducu ni Kricito mere myero onen can, ci doŋ omiyo ocobbe kakare kumeno. ¹⁹ Iyo, wuŋut, wudwog cen, wek balwu gijwa woko, wek nino me yweyo ma a ki bot Rwot obin botwu, ²⁰ wek en ocwal Kricito ma oyero piwu, en Yecu. ²¹ Ma myero gijole i polo nio ka kare oromo me dwoko jami ducu kakare, ma yam Lubaŋa oloko pire i dog lunebine maleŋ nia wa con. ²² Moses yam owacci, ‘Rwot Lubaŋa bicwalo lanebi mo piwu ma bia ki i kin utmegiwu macalo ocwalo an. Wubiwinyo en i lok ducu ma bititowu. ²³ Dok ka obinen dano mo ma pe biwinyo lanebi meno, waŋe birwenyo woko ki i kin lutugi.’ ²⁴ Ki lwak lunebi ducu ma yam guloko, cakke wa i kom Camuel ki jo ma gulubo kore, gutito bene pi kare man. ²⁵ Wun likwayo pa lunebi, ki lule gicikke ma yam Lubaŋa omiyo bot kwarowu, kun waco bot Abraim ni, ‘Rok ducu gibilimo gumgi ki i kom likwayi.’ ²⁶ Ka doŋ Lubaŋa otyeko keto laticce, okwoŋo cwale botwu pi kelliwu gum ma miyo ŋat acel acel lokke weko timo bal.”