¹ I kare ma Festo obino i lobo ma gimiye ni en olo, i ŋe nino adek, oa i Cecaria, ocito i Jerucalem. ² Ajwagi madito pa Lubaŋa ki ludito me lobo Judaya gutitte pi lok i kom Paulo, ci gubako doggi bote, ³ ni otim ber oye cwale i Jerucalem, kun onoŋo guyubo ni dano gibikiye ci gineke woko i waŋa yo. ⁴ Ento Festo ogamo ni gitye ka gwoko Paulo i Cecaria, en bene emito cito kunnu i kare macok-ki. ⁵ Ci owacci, “Pi meno, jo ma i kinwu ma gitye ki twero myero gucit kweda. Ka onoŋo tye roc mo i kom laco meno, wek gudote bota.” ⁶ Obedo i Jerucalem pi nino aboro nyo apar, ka odok i Cecaria. Orwone obedo i kom me ŋolo kop, ci ociko ni gikel Paulo. ⁷ Ka doŋ obino, Lujudaya ma gua i Jerucalem gucuŋ ma gurume dyere, gudote ki lwak adot mapol mapek ma pe gitwero moko kite. ⁸ Paulo opido ni, “Peya abalo lok mo i kom cik pa Lujudaya kadi ot pa Lubaŋa, kadi wa bot laloc madit Cecar.” ⁹ Ento Festo onoŋo mito ni Lujudaya gupwoye, ci owaco bot Paulo ni, “Imito giteri i Jerucalem wek aŋol kop i komi pi adot magi ki kunnu?” ¹⁰ Paulo ogamo ni, “Acuŋ kany i nyim kom me ŋolo kop pa Cecar, en aye ka ma myero giŋolla iye kop. Pe abalo bal mo bot Lujudaya, meno in bene iŋeyo maber. ¹¹ Ka abalo bal ma romma to, lok mo pe, gitwero neka, pe akwero; ento ka adotgi i koma tere pe, ci pe tye ŋat mo ma twero miya i ciŋgi. Abolo pi Cecar.” ¹² Ka Festo otyeko poro lok ki lukikone, odok iye ni, “Ibolo pi Cecar; ibicito bot Cecar.” ¹³ Ka nino okato manok, kabaka Agripa ki Bernike guo i Cecaria ka jolo Festo. ¹⁴ Ka gudikke kunnu pi kare malac, Festo oketo adot i kom Paulo i nyim kabaka kun wacci, “Tye laco mo kany ma Pelici oweko i mabuc. ¹⁵ I kare ma atye i Jerucalem, ajwagi madito pa Lubaŋa ki ludoŋo pa Lujudaya gutitta lok i kome, ci gulega ni aŋol ni kop oloye. ¹⁶ Adok iye botgi ni, pe kitwa wan Luroma me miyo dano mo i ciŋ ludote ma peya gimiye kare me cuŋ i nyimgi waŋ ki waŋ wek opid pidone i kom lok ma gidote iye. ¹⁷ Ka gubino kany, ci an bene pe adikke, ento orwone abedo i kom me ŋolo kop ci aciko ni kigele. ¹⁸ Ka ludote gua ka lok, pe gukelo adot mo i kome ma mako bal mo marac, macalo yam atamo; ¹⁹ ento gubedo ka laro lok kwede ma dok i kom dinigi, ki i kom ŋat mo ma nyiŋe Yecu ma yam oto, ma Paulo waco ni tye makwo. ²⁰ Yeko te lok macalo meno oloya, mumiyo apenye ka en mito cito i Jerucalem wek giciŋol lokke ki kunnu. ²¹ Ento Paulo okoko apil ni myero gigwoke i mabuc pi kuro ŋolo kop pa laloc madit ma won deyo-ni. Ci aciko ni gigwoke nio ka abicwale bot Cecar.” ²² Agripa owaco bot Festo ni, “An kikoma amito winyo lok pa danonu ka twerre.” Ogamo ni, “Diki ibiwinyo lokke.” ²³ Orwone Agripa ki Bernike gucito ki deyo madwoŋ, ci gudonyo i kicika me winyo ŋolo kop kacel ki kapten mogo me mony ki jo ma giŋene ma i gaŋ meno. Ka Festo ociko, ci gikelo Paulo. ²⁴ Festo owacci, “Kabaka Agripa ki wun ducu ma wutye kwedwa kany, wun doŋ wuneno dano man ma lwak Lujudaya ducu gubako doggi bota pire i Jerucalem wa ki kany bene, kun gidaŋŋe ni pe myero obed kwo. ²⁵ Ento an pe anoŋo otimo gin mo ma romo miyo giŋolle kop me to. Doŋ macalo en aye gire okoko apil pi laloc madit, an bene amoko ni abicwale. ²⁶ Ento peya atye ki lok mo kikome ma myero aco i kome bot rwoda, en gin mumiyo akele i nyimwu, ki makato i nyimi, in Kabaka Agripa, wek ka wabipenye abed ki lok mo me acoya. ²⁷ Pien aneno ni kony mo pe me cwalo lamabuc ka pe ginyuto lok ma i kome.”