¹ Ka nino abic okato, ajwaka madit Anania obino ki ludoŋo mogo, kacel ki laplida mo ma nyiŋe Tertulo, ci gutero adotgi i nyim laloyo pi doto Paulo. ² Ka doŋ gilwoŋe, Tertulo ocako adotte kun waco ni, “Laloyo Maber, ladit Pelici, wabedo ki kuc piri nia wa con, dok itamo pi rokwa, ikelo alokaloka mapol ma okonyowa ³ i kit yo ducu ki i kabedo ducu, wan bene wajolo ki yomcwiny madwoŋ, ladit. ⁴ Ento pe doŋ agal wii, abako doga boti pi kicani iwiny lokwa macegocego-ni. ⁵ Wanoŋo ni dano man lanek piny, en aye lakel jemo i kin Lujudaya ducu ma i lobo ducu, en latel wi dul pa Lunajaret. ⁶ En bene otemo pyedo wa ot pa Lubaŋa maditte, ci wamake woko. [Onoŋo wamito ŋolo kop i kome kun walubo cikwa-ni, ⁷ Ento kapten Licia obino omaye woko ki i ciŋwa tektek, ⁸ ci ociko ni ludote myero guo i nyimi.] Ka in kikomi ipenye, ibiniaŋ ki bote lok ducu ma wadote iye.” ⁹ Luyudaya bene guribbe i adot meno, kun gimoko ni lok man ducu tye kit meno. ¹⁰ Ka laloyo ocime ni oloki, Paulo odok iye ni, “Ladit, aŋeyo ni ibedo ka ŋolo kop i rok man pi mwaka malac, mumiyo apido lokka i nyimi ki yomcwiny. ¹¹ Macalo ni bene itwero noŋo ka ipenyo dano, wel nino ma okato nia i kare ma acito i Jerucalem ka woro Lubaŋa peya okato apar wiye aryo. ¹² Pe ginoŋo ni atye ka pyem ki dano mo, nyo tubo lwak, kadi i ot pa Lubaŋa, nyo i kacokke me lega, nyo i dye gaŋ. ¹³ Dok bene pe gitwero nyuto ni lok ma gikelo i koma kombeddi tye kakare. ¹⁴ Ento aye lok man boti ni, aworo Lubaŋa pa kwarowa kun alubo kit Yo ma gin gilwoŋo ni dul. Aye lok ducu ma gicoyo i cik pa Moses ki i buk pa lunebi. ¹⁵ Pi niyena i kom Lubaŋa atye ki gen ni dano gibecer woko, jo ma kitgi atir wa ki jo ma kitgi pe atir, ci gin bene gitye ki kit gen acel-lu. ¹⁶ Pi meno an bene atemo mada kare ducu wek abed ma cwinya leŋ i nyim Lubaŋa ki i nyim dano. ¹⁷ “Ma doŋ abedo cen pi mwaka mapolpol acito i Jerucalem ka tero mot bot jo me rokka pi konyo lucan, ki ka tyero gitum. ¹⁸ I kare ma atye ka tiyo man, gunoŋa i ot pa Lubaŋa ma doŋ atyeko lonnye woko i kit ma mitte. Pe abedo ki lwak mo, woo bene obedo pe. Ento Lujudaya mogo ma gua ki i Acia, ¹⁹ gin aye kono myero gubed kany i nyimi gukel adotgi, ka gitye ki lok mo i koma. ²⁰ Nyo wek jo man kikomgi gunyut gin marac ma gunoŋo i koma i kare ma acuŋ i nyim Lukiko. ²¹ Tye lok man keken, i kare ma acuŋ i kingi adaŋŋe ni, ‘Pi lok kom cer pa jo muto aye omiyo wutye ka ŋolo lok i koma tin.’ ” ²² Ento Pelici obedo ki ŋec muromo i kom Yo pa Rwot, ci pe otyeko lok woko cut. Owacci, “Abiŋolo kopwu ka kapten Licia bibino kany.” ²³ Ka ociko ladit mony ma loyo dano miya ni myero ogwok Paulo i buc ento obed laboŋo ayela mo, pe gigeŋ lureme ka gimito mine kony. ²⁴ Ka kare okato manok,, Pelici obino ki dakone Drucila ma anyira Judaya. Olwoŋo Paulo, ci obedo ka winyo ka loko i kom niye i kom Kricito Yecu. ²⁵ I kare ma en tye ka lok i kom kit ma atir ki gwokke kekene, ki ŋolo kop ma bibedo i kare me anyim, lworo omako Pelici omiyo owacci, “Koŋ doŋ iciti; ka dok anoŋo kare ci abilwoŋi.” ²⁶ Onoŋo bene en geno ni Paulo bimiye lim, pienno obedo ka lwoŋe jwijwi ci boko lok kwede. ²⁷ Ento ka mwaka aryo okato, Porcio Festo oleyo ka tyen Pelici. Pelici onoŋo mito ni Lujudaya gupwoye, omiyo oweko Paulo i mabuc.