¹ Ka doŋ opokke kwedgi, wacako kwaŋ wakemo yo atir nio wa i Koc. Orwone wao i Rodec, ka dok waa kunnu wao i Patara. ² Ka wanoŋo mel ki kunnu ma cito Poiniki, ci wadonyo iye, wacako wot. ³ Ka doŋ wao ka ma waneno Caiprac, ci warabo ŋete kun waweko odoŋ tuŋ lacam, wacito wa i lobo Ciria ka wakato woko i wi tura i Turo, pien onoŋo myero gikwany yec woko ki i mel ki kunnu. ⁴ Wayenyo lupwonnye ci wari kunnu nino abiro. Cwiny Maleŋ omiyo gujuko Paulo ni pe ocit i Jerucalem. ⁵ Ka doŋ watyeko karewa, wapokke kwedgi ci wamedde ki wotwa. Gin ducu gulwokowa, wa mon ki litino, gukelowa wa i ŋe gaŋ; ka warumo coŋwa i dog nam, walego, wacikke kwedgi. ⁶ Lacen wan wadonyo i mel, ci gin gudok paco. ⁷ Ka watyeko kwaŋ nia ki i Turo, ci wao i Potolemai; ka wamoto utmego, ci wabedo kwedgi nino acel. ⁸ Orwone wapokke kwedgi, wacito i Cecaria, ci wadonyo i ot pa Pilipo latuc lok me kwena maber, ma yam en ŋat acel i kom jo abiro ca, wabedo bote. ⁹ Yam en tye ki anyirane aŋwen ma pe ginyomogi, ma yam gitito lok pa Lubaŋa. ¹⁰ Ka wadikke kunnu pi nino mapolpol, lanebi mo ma nyiŋe Agabo obino kunnu nia ki i Judaya. ¹¹ Ka obino botwa okwanyo del pyer Paulo otweyo ki tyene ki ciŋe kene, ci owaco ni, “Cwiny Maleŋ owaco kit man ni, Lujudaya ma i Jerucalem gibitweyo won del pyer man kit man, ci gibimiye i ciŋ Lurok.” ¹² Ka wawinyo lok man, wan ki jo ma kunnu walego Paulo ni pe ocit i Jerucalem. ¹³ Paulo odok iye ni, “Wun wumito gin aŋo, ma wukok wubalo ki cwinya-ni? An pe ayubbe pi mabuc keken, ento wa pi to i Jerucalem pi nyiŋ Rwot Yecu.” ¹⁴ Ka doŋ pe oye, ci waweko kun wawaco ni, “Gin ma Rwot mito myero otimme.” ¹⁵ Ka kare meno otum, wayubbe ci wacito i Jerucalem. ¹⁶ Wawoto ki lua pwonnye mogo ma guwoto kwedwa nia ki i Cecaria ci guterowa i ot pa Munacon dano me Caiprac ma yam odoko lapwonnye wa con, ka ma myero wagony iye. ¹⁷ Ka wao i Jerucalem, utmego gujolowa ki yomcwiny. ¹⁸ Orwone Paulo ocito kwedwa bot Yakobo ma onoŋo ludoŋo ducu gitye. ¹⁹ Ka doŋ omotogi, Paulo otito kikore gin mapol ma Lubaŋa otiyo i kin Lurok pi ticce. ²⁰ Ka guwinyo, gupako Lubaŋa. Ci guwaco bote ni, “Koŋ inen, ominwa, tye Lujudaya alip adi ma gitye i kin jo ma doŋ guye Kricito. Gin ducu giryek twatwal i kom cik pa Moses. ²¹ Gin gubedo ka winyo lok i komi ni ipwonyo Lujudaya ducu ma gitye i kin Lurok ni gubwot cik pa Moses woko, dok bene ni itito lok botgi kiloŋ ni pe gulir litinogi, pe gulub kitwa. ²² Gin aŋo doŋ ma myero watim? Pien gin gibiwinyo ni ibino. ²³ Mumiyo doŋ itim gin ma waciki. Watye ki jo aŋwen kany ma yam gukwoŋo kwoŋ. ²⁴ Ter jo meno ci ilonnye kwedgi kacel, ci icul lim ma mitte pigi, wek gulyel wigi. Kit meno dano ducu gibiŋeyo ni lok ma gibedo ka loko i komi pe kakare, ento in bene itye ka gwoko cik. ²⁵ Ento ki tuŋ bot Lurok ma guye Rwot watyeko cwalo waraga botgi ki lok ma waŋolo ni, pe gucam gin ma gityero bot jogi, pe gucam remo, ki riŋo lee ma gideyo adeya, gukwer bene tim tarwaŋ.” ²⁶ Paulo otero jo meno ci orone olonnye kacel kwedgi ka gucito i ot pa Lubaŋa pi nyuto kare ma nino me lonynye megi doŋ bitum, wek gutyer tyer pi gin ki acel acel. ²⁷ Ka onoŋo nino abiro me lonnyegi doŋ cok tum, Lujudaya ma gua ki i Acia guneno Paulo i ot pa Lubaŋa, ci gutugo lwak ducu, gumake, ²⁸ kun gidaŋŋe matek ni, “Wun jo Icrael, wumi kony. Man aye laco ma tye ka pwonyo dano i kabedo ducu marac, kun kwero rokwa ki cikwa wa ki kabedo man bene. Ki makato ducu en okelo Lugrik bene i ot pa Lubaŋa, opyedo kabedo man maleŋ woko.” ²⁹ Pien onoŋo guneno Tropimo ma Laepeco ma gitye kacel kwede i gaŋ, ci gutamo ni Paulo okele i ot pa Lubaŋa. ³⁰ Ci gaŋ ducu otwarre woko, ka dano guriŋo kacel. Gumako Paulo, guywaye woko ki i ot pa Lubaŋa, ci giloro doggola woko cut. ³¹ Gimito neke woko, ento lok oo bot kapten me mony ni Jerucalem doŋ otugge woko. ³² En olaro kunnu ki ŋwec ki lumony mapol kacel ki luditogi ma loyo dano miya miya, gujuko lugo Paulo. Ka lwak guneno kapten ki lumony, guweko goyo Paulo. ³³ Kapten ocito ka make, ka ociko ni gitweye ki nyor aryo. Ka openyo ni en aŋa, dok obalo gin aŋo? ³⁴ Jo mogo ma i kin lwak gudaŋŋe ni pi man, ki mukene ni pi man. Ka kapten doŋ pe oniaŋ i kom lok kikome pi woo ma obedo madwoŋ, ociko ni gitere i gogo. ³⁵ Ka guo i rwom me ito malo, lumony gutiŋo Paulo atiŋa pi gero pa lwak, ³⁶ pien lwak dano ma otubbe gilubo korgi kun gidaŋŋe ni, “Wuneke woko!” ³⁷ I kare ma onoŋo gidonyo ki Paulo i gogo, Paulo owaco bot kapten ni, “Ber koŋ alok boti lok mo?” Ci ogamo ni, “In iŋeyo leb Grik? ³⁸ Pe in aye Laejipt ma yam otubo dano ci otero lunek alip aŋwen woko i tim?” ³⁹ Paulo ogamo ni, “An Lajudaya, ginywala i Taruco ma i Cilicia, gaŋ ma ŋene mada. Alegi miya alok ki lwak.” ⁴⁰ Ka oye, Paulo ocuŋ i rwom ci ojuko lwak ki ciŋe. Ka piny oliŋ litik. Ocako lok kwedgi i leb Ibru kun waco ni,